ރައްޔިތުންގެ މަޖުލީހުގެ މިލަންދޫ ދާއިރާގެ އެމްޑީޕީގެ މެމްބަރު އަލީ ރިޒާގެ މައްޗަށް ހިއުމަން ޓްރެފިކިންގެ ދައުވާކޮށްފިއެވެ.
ޕީ.ޖީ އޮފީހުން ވިދާޅުވި ގޮތުގައި ބ. ބޮޑުފިނޮޅު ރިސޯޓު ތަރައްޤީ ކުރަމުން ދިޔައިރު، ގަވައިދާ ޚިލާފަށް ބިދޭސީން ރާއްޖެ އެތެރެކޮށް، މުވައްޒަފުންނަށް މުސާރަ ނުދީ މަސައްކަތް ކުރުވިކަމުގެ ތުހުމަތު ކުރެވިފައިވާ ކަމަށެވެ.
އަދި ބިދޭސީންނަށް އޮޅުވާލައި ބިދޭސީ މަސައްކަތްތެރީން ރާއްޖޭގެ ރަށްތަކުން ހޯދައި އެ ބިދޭސީން އާރް.އައި.އެކްސް (ރިޒްޕްރައިވެޓް ލިމިޓެޑް) ކުންފުނީގެ ބެލުމުގެ ދަށުން ރާއްޖޭގެ އެއްރަށުން އަނެއްރަށަށް ގެންގޮސް، ބިދޭސީ މަސައްކަތްތެރިންގެ ނިކަމެތިކަމާއި މަޖުބޫރީ ހާލަތުގެ ބޭނުން ނަހަމަގޮތުގައި ހިފާފައިވާކަމަށާއި މަޖުބޫރުކޮށްގެން ބޮޑުފިނޮޅު ރިސޯޓުގެ މަސައްކަތް އުޖޫރައެއް ނުދީ ކުރުވިކަމުގެ ތުހުމަތު އަލީ ރިޒާގެ މައްޗަށް ކުރެވޭ ކަމަށް ޕަބްލިކް ޕްރޮސެކިއުޓާ އަހުމަދު ޝަފީއު ވިދާޅުވިއެވެ.
މުސާރައާއި އިނާޔަތް ހޯދުމަށް އަޑުއުފުލާ މީހުން ވަޒީފާއިން ވަކިކޮށް، ބިރުދައްކައި، ބޮޑުފިނޮޅުގައި މަސައްކަތުގައި ދެމިތިބުމަށް ބިދޭސީންނަށް މަޖުބޫރުކުރުވިކަމަށް އަދި އެފަރާތްތަކުގެ މައްޗަށް އެކްސްޕްލޮއިޓޭޝަންގެ އަމަލުތަކެއް ހިންގައި މީހުން ޓްރެފިކްކުރުމަށް މަގުފަހިވާގޮތަށް ޢަމަލުކުރި ކަމަށް ތުހުމަތުވެސް ކުރެވޭ ކަމަށް ޝަފީއު ވިދާޅުވިއެވެ.
ޝާފިއު އިތުރަށް ވިދާޅުވީ ބިދޭސީ މަސައްކަތްތެރިންގެ ފަރާތުން އެކުންފުނިން ދައުލަތަށް ދައްކަންޖެހޭ ފީއާއި މަސައްކަތްތެރީންގެ ހައްގުތަކާ ގުޅުންހުރި އެހެން ފީ އާއި ފައިސާ ނުދައްކައި، މަސައްކަތްތެރީންގެ ހައްގުތައް ނިގުޅައިގަނެފައިވާ މައްސަލާގައި އެ މައްސަލައިގައި ރިޒާގެ މައްޗަށް މީހުން ޓްރެފިކް ކުރުމުގެ ކުށުގެ ދައުވާ އަދި އަދުލު އިންސާފު ގާއިމު ކުރުމަށް ހުރަސްއެޅުމުގެ ކުށުގެ ދައުވާކޮށް ކްރިމިނަލް ކޯޓަށް ހުށަހަޅާފައިވާކަމަށެވެ.
އަލީ ރިޒާގެ މައްޗަށް ކޮށްފައިވާ ދައުވާތައް ސާބިތުވެއްޖެނަމަ އޭނަގެ މައްޗަށް ބޮޑު ޖަލުހުކުމެއް އައިސް އޭނަގެ ގޮޑި ގެއްލޭނެއެވެ.
