ރާއްޖޭގެ ކުރީގެ ރައިސް އަބްދުﷲ ޔާމީން އަބްދުލް ޤައްޔޫމް ވެރިކަމަށް ގެނައުމަށްޓަކާ ”މަވެސް ޕީޕީއެމް“ ނަމުގައި ކެމްޕެއިން ދަތުރުތަކެއް މިއަދު ފަށައިފިއެވެ.
އަތޮޅުތެރެޔަށް ކުރުމަށް ހަމަޖެހިފައިވާ މިސިލްސިލާ ދަތުރުތަކުގެ ބޭނުމަކީ އިދިކޮޅު ކޯލިޝަންގެ އިސް ޕާޓީ ޕީޕީ އެމަށް މެމްބަރުން އިތުރުކުރުމާއި ޕީޕީއެމްގެ ރިޔާސީ މެނިފެސްޓޯއަށް ޚިޔާލުތައް އެއްކުރުން ކަމުގައި އެޕާޓީން ވަނީ ވިދާޅުވެފައެވެ.
ޕީއެންސީގެ ނައިބް ރައީސް އިބްރާހީމް ޝުޖާ ވިދާޅުވީ، މިދަތުރަކީ، ކުރިއަށް 2023 ވަނަ އަހަރުގެ ރިޔާސީ އިންތިޚާބަށް ޕީޕީއެމް، ޕީއެންސީން އެކުލަވާލާ ރައީސް ޔާމީންގެ މެނިފެސްޓޯ އެކުލާލުމަށާއި، ޕާޓީއަށް މެމްބަރުން އިތުރު ކުރުމަށާއި، މެމްބަރުންގެ އަޑު ގާތުން އެހުމަށް ރޭވިފައިވާ ދަތުރުތަކެއްކަމަށެވެ.
ހއ. ގެ އަތޮޅުތަކުން ފަށައިގަންނަ މިދަތުރުތައް ވަނީ ދެޓީމަކަށް ބަހާލާފައެވެ. އެއް ޓީމުގައި އެންމެ އިސްކޮށް ހަރަކާތްތެރިވާނީ ޕީޕީއެމްގެ ނާއިބް ރައީސް އަދި ގުރައިދޫ ދާއިރާގެ މެމްބަރު މުހައްމަދު ޣައްސާން މައުމޫނެވެ. އަދި ދެވަނަ ޓީމުގައި އިސްކޮސް ބައިވެރިވަނީ ކުރީގެ އިކޮނޮމިކް މިނިސްޓަރ އަދި ޕީއެންސީގެ ނާއިބް ރައީސް މުހައްމަދު ސައީދުއެވެ.
ޝުޖާ އިތުރަށް ވިދާޅުވި ގޮތުގައި ހއ.އަތޮޅުން ޕީޕީއެމަށް ލިބިފައިވާ އިތުބާރާ ތަރުހީބު ދެމެހެއްޓުމަށްޓަކައި ލީޑަރޝިޕުން ދޭންބޭނުންވާ ޔަގީންކަމާއި، މުހިންމު މެސެޖްތައް މިދަތުރުގައި ދެވޭނެ ކަމަށާއި މުޅި ރާއްޖެ ހިމެނޭހެން ހުރިހާ އަތޮޅުތަކަށް މިދަތުރުތައް ކުރެވޭނެ އިންތިޒާމު ދަނީ ހަމަޖައްސަމުންނެވެ.
ކުރިޔަށް އޮތް ދައުރުގައި ރާއްޖޭގެ ރައީސް ކަމަށް ކުރީގެ ރައީސް ޔާމީން އަބްދުލް ޤައްޔޫމް ގެނައުމަށްޓަކައި ޕީޕީއެމުން ދަނީ ހިތްވަރާއެކު ކެނޑިނޭޅި މަސައްކަތް ކުރަމުންނެވެ. އެހެންކަމުން އެމަނިކުފާނަށް ކެމްޕެއިން ދަތުރުތައް މުޅި ރާއްޖެ ކަވަރ ކުރެވޭހެން މިވަނީ ފަށާފައެވެ.
