އެމިރޭޓް އެއަރލައިންސްގެ ފްލައިޓް އެޓެންޑެންޓެއްގެ ޔުނީފޯމުގައި ހުރި އަންހެނަކު ބްރިޖް ޚަލީފާ މަތީގައި ހުއްޓާ ކުޅެފައިފާ އެމިރޭޓްސް އެއާލައިންގެ އާ އިޝްތިހާރަށް ވަރަށް ގިނަ ބަޔެއްގެ ތާއީދު ލިބިއްޖެއެވެ.
ޑުބާއީގައި ހުންނަ ދުނިޔޭގެ އެންމެ އުސް އިމާރާތް ކަމަށްވާ ބްރިޖް ޚަލީފާގެ މަތީގައި ކުޅެފައިވާ މިއިޝްތިހާރު ފެނިފައި އެބަޔަކު ބިރުން ފިތްކަނޑައިގެންދާވަރުވާއިރު އަނެއްބަޔަކު ތިބީ ބަސްހުއްޓި ބުނާނެ އެއްޗެއް ނޭގިފައެވެ.
ޔޫއޭއީ އަށް ނިސްބަތްވާ މި އެއާރލައިންގެ ޕްރޯޝަނަލް އިޝްތިހާރުގައި ފެނިގެންދަނީ އެއަރލައިން އެޓެންޑެންޓުގެ ޔުނީފޯމުގައި ހުރި އަންހެނަކު އަތުގައި މެސެޖްތަކެއް ލިޔެފައިވާ ބޯޑުތަކެއް ހިފައިގެން ހުއްޓާއެވެ. އެބޯޑުތަކުގައި ލިޔެފައިވަނީ ޔޫއޭއީ އާއި ޔޫކޭ އާ ދެމެދު ކުރާ ދަތުރުތަކާ ބެހޭ މެސެޖުތަކެކެވެ.
އެއްތިރީސް ސިކުންތުގެ މިއިޝްތިހާރުގެ ބޭނުމަކީ އިނގިރޭސި ވިލާތާއި ޔޫއޭއީ އާ ދެމެދު ކަރަންޓީނާ ނުލާ މީހުންނަށް ދަތުރުފަތުރު ކުރުން ހުއްދަ ކޮށްފައިވާކަން އިއުލާން ކުރުމެވެ.
މިއީ އެއްވެސް ގްރީން ސްކްރީން ނުވަތަ ސްޕެޝަލް އިފެކްޓްސް އާ ނުލާ ޝޫޓްކޮށްފައިވާ އިޝްތިހާރެކެވެ.
މިއިޝްތިހާރަށް ވަރަށްގިނަ ބަޔެއްގެ ފާޑުކިޔުންތައް ދަނީ އަމާޒުވަމުންނެވެ. އެގޮތުން އެއްވެސް ރައްކާތެރިކަމެއްނެތި އެގޮތަށް އަންހެންކުއްޖަކު ބްރިޖް ޚަލީފާ މައްޗަށް އެރުމުން ލިބިދާނެ ނުރައްކަލަކަށް ނުވިސްނާ ކަމަށް ބުނަމުންދިޔައެވެ. އެހެންކަމުން އެމިރޭޓްސް އިން ވަނީ މި އިޝްތިހާރު ޝޫޓްކުރި ގޮތް ދައްކުވައިދޭ ވިޑިއޯއެއް ރިލީޒްކޮށްފައެވެ. މިވީޑިޔޯގައި ފެނިގެންދާގޮތުން އެއަންހެންކުއްޖާގެ ސޭފްޓީއަށް ވަރަށް ގިނަ ފިޔަވަޅުތައް އަޅާފައިވާކަން ހާމަވެގެންދެއެވެ.
ހަމަ ހަޤީގަތުގައިވެސް އެފްލައިޓް އެޓެންޑެންޓް އަރާ ހުރީ ބުރުޖް ޚަލީފާ މައްޗަށެވެ. ނަމަވެސް އިޝްތިހާރުން ފެންނަ އަންހެންމީހާ އަކީ ފްލައިޓް އެޓެންޑެންޓެއް ނޫން ކަމަށާއި އެއީ ތަމްރީނު ލިބިފައިވާ ސްޓަންޓް އާޓިސްޓެއް ކަމަށްވާ ނިކޯލް ސްމިތު-ލުޑްވިކް ކަމަށް މީޑިޔާތަކުގައި ހާމަކޮށްފައިވެއެވެ.
ބްރިޖް ޚަލީފާގެ އެންމެ މައްޗަށް އަރަން ލިބުނު ފުރުސަތަކީ އެންމެ ހިތްހަމަ ޖެހުނު އަދި އެންމެ އަޖައިބުކުރުވަނިވި ސްޓަންޓެއް ކަމަށާއި މިފަދަ ޚިޔާލެއް އުފަންކުރުވީތީ އެމިރޭޓްސްއަށް ތައުރީފް ކުރަމުން ނިކޯލް ވަނީ އިންސްޓާގްރާމްގައި މެސެޖެއް ޝެއަރކޮށްފައެވެ.
