ރާއްޖޭގައި ވިއްކަމުންދާ ކަނޑުމަހުގެ ބާވަތްތަކުގައި ކާބަން މޮނޮކްސައިޑް ޓްރީޓްކޮށްފައިވާތީ އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އަންގައިފިއެވެ.
އެމްއެފްޑީއޭ އިން ވިދާޅުވާ ގޮތުގައި ރާއްޖޭގެ ބާޒާރުގައި ވިއްކާ ކަނޑުމަހުގެ ބާވަތްތަކުގައި ރަތްކުލަ ހިފެހެއްޓުމަށްތަކައި އޭގައި ކާބަން މޮނޮކްސައިޑް ޓްރީޓްކޮށްފައި ލޭބަލްތަކުގައި އެމައުލޫމާތު ނުހިމަނާ ވިއްކަމުންދާކަމަށާއި އެއޮތޯރިޓީން ނެގި ސާމްޕަލްއަކުން އެކަން ޔަޤީންކޮށްފައިވާ ކަމަށެވެ.
ކަނޑުމަހުގެ ބާވަތްތަކުގައި ކާބަންމޮނޮކްސައިޑް ޓްރީޓް ކުރުމުން މަހުގެ ތާޒާކަން ކެނޑިގެން ދިޔަނަމަވެސް މަހުގައި ހުންނާނީ ތާޒާ މަހުގައި ހުންނަ ރަތްކުލައެވެ. އޭގެ ސަބަބުން މަސް ގަންނަ މީހުންނަށް ތާޒާ މަސް ވަކިކުރަން އުދަގޫވާކަން އެއޮތޯރިޓީން ވަނީ ފާހަގަކޮށްފައެވެ.
އަދި މިފަދަ އުފެއްދުން ވިއްކަން ހުރިނަމަ ނުވަތަ ޝައްކުވާނަމަ އެ އޮތޯރިޓީގެ ވައިބާ ނަންބަރު 7603204 އަށް ފޮޓޯއާއެކު މައުލޫމާތު ހިއްސާ ކުރުމަށް އެ އޮތީރިޓީއިން ވަނީ އެދިފައިއެވެ.
