ސިވިލް ސާރވިސް މުވައްޒަފުންވެސް މިނިވަން ކަމާއެކު ސިޔާސީ ހަރަކާތްތަކުގައި އުޅެވެން ޖެހޭނެކަމަށް ޤަބޫލުކުރާކަމަށް ޔޫތު މިނިސްޓަރ އަހުމަދު މަހުލޫފް ވިދާޅުވެއްޖެއެވެ.
ސިޔާސީ ކަންކަމުގައި އުޅޭ މުވައްޒަފުންގެ ވަޒިފާ ގެއްލޭ ގޮތަށް ޤާނޫނަށް ގެނައި އިސްލާހާއި ބެހޭގޮތުން ޔޫތު މިނިސްޓަރ މަހުލޫފް ކުރެއްވި ޓްވީޓެއްގައި ވިދާޅުވެފައިވަނީ ސިޔާސީ ޚިޔާލުތަފާތުވުންތައް މުވައްޒަފުންގެ މެދުގައި ހުރިނަމަވެސް ހަމަހަމަކަމާއެކު ޚިދުމަތް ދީ ސަރުކާރުގެ ކަންތައްތައް ހުއްޓުމަކަށް ނާންނަ ހިނދުގައި އެމުވައްޒަފުންނަށްވެސް ސިޔާސީ މިނިވަންކަން އޮންނަން ޖެހޭ ކަމަށް ދެކޭކަމަށެވެ.
މަހުލޫފް އިތުރަށް ވިދާޅުވީ ޔޫތު މިނިސްޓްރީގައިވެސް ސިޔާސީ ގޮތުން ހިޔާލު ތަފާތު ބޭފުޅުން ތިއްބެވިކަމުގައިވިޔަސް މަސައްކަތަށް އޭގެ އަސަރެއް ކޮށްފައިނުވާ ކަމަށެވެ.
ޤާނޫނަށް ގެނައި އިސްލާހުގައި ބުނާގޮތުން ސިވިލް ސާވަންޓެއް ”ކުށެއް“ ކޮށްފިނަމަ ވަޒީފާ ގެއްލިގެންދާނެއެވެ. ބަޔާން ކޮށްފައިވާ ކުށްތަކުގެ ތެރޭގައި މަސައްކަތުގެ ރަސްމީ ގަޑީގައި ނުވަތަ ރަސްމީ ގަޑީގެ ބޭރުން ވެސް، ރަސްމީ މަސައްކަތުގައި އުޅޭ އެއްވެސް ވަގުތެއްގައި ސިވިލް ސާވިސް މުވައްޒަފުން ސިޔާސީ ހަރަކާތުގައި ބައިވެރިވާނަމަ އެމުވައްޒަފެއްގެ ވަޒީފާ ގެއްލޭނެއެވެ.
މީގެ އިތުރުން މުވައްޒަފުގެ މަޤާމުގެ މަސްއޫލިއްޔަތު އަދާކުރުމުގައި ވަކި ފަރާތަކަށް ޖެހިފައިވާކަން ދޭހަވާ ފަދަ ގޮތަކަށް ނުވަތަ އޭނާގެ ވާޖިބުތަކާއި މަސްއޫލިއްޔަތުތަކަށް ހުރަސްއެޅޭ ފަދަ ގޮތަކަށް އެއްވެސް ސިޔާސީ ހަރަކާތެއްގައި ބައިވެރިވުމާއި، މުވައްޒަފުގެ މަގާމުގެ މަސްއޫލިއްޔަތު އަދާކުރުމުގައި ނުވަތަ މަގާމުގެ ހައިސިއްޔަތުން ހިދުމަތް ދިނުމުގައި ސިޔާސީ އެއްވެސް ތަޢައްސުބެއް ގެންގުޅޭ ނަމަ ވެސް ވަޒީފާއިން ވަކި ކުރެވޭނެއެވެ. އަދި ރަސްމީ ގަޑީގައި ސިޔާސީ ވާހަކަދެއްކުމަކީ ފުރަތަމަ ދަރަޖައިގެ ކުށަކަށްވާއިރު، ސިޔާސީ ވާހަކަ ދެއްކުމާއި، ސިޔާސީ ބަހުސްކުރުމަކީ ދެވަނަ ދަރަޖައިގެ ކުށެއް ކަމަށް އެއިސްލާހުގައި ބަޔާންކޮށްފައިވެއެވެ.
މިއިސްލާހާއި ގުޅިގެން އެމްޑީޕީގެ އިސްވެރިންނާއި މެމްބަރުންވެސް ވަނީ މިކަމަށް ފާޑުކިޔާފައެވެ. އަދި ގިނަބަޔޔަކު ދަނީ ސަރުކާރުގެ ވައުދުތަކާ ޚިލާފަށް ކަންތައްތައް ނިންމަމުންދާ ކަމަށްބުނެ ޚިޔާލު ފާޅުކުރަމުންނެވެ.
