ދިގުމުއްދަތަކަށް މެދުކެނޑިފައި އޮތުމަށްފަހު މެލޭޝިޔާގެ ބަޖެޓް އެއާލައިން، އެއާ އޭޝިޔާއިން ބެންކޮކާއި ރާއްޖެއާ ދެމެދު ދަތުރުތައް ފަށައިފިއެވެ.
އެއަރ އޭޝިޔާއިން ނެރުނު ބާޔނެއްގައި ބުނާގޮތުން ބެންކޮކްގެ ޑޮން މުއާންގް އެއާޕޯޓުން ރާއްޖެއާ ދެމެދު ސީދާ ދަތުރުތައް މިވަނީ އިއްޔެ ފަށާފައެވެ. އެހެންނަމަވެސް ދުވާލެއްގެ މައްޗަށް އޮންނާނީ ކިތައް ފްލައިޓް ކަމާއި ޓިކެޓުގެ އަގު ހާމަކޮށްފައިނުވެއެވެ.
ތައިލެންޑުން ރާއްޖެ އަންނަ ފަތުރުވެރިން ކަރަންޓީނު ވާންޖެހޭ ގޮތަށް އުސޫލްތައް ބަދަލުކޮށްފައިވަނީ ކޮވިޑްގެ އައު ވޭރިއަންޓް އޮމިކްރޯންގެ ސަބަބުންނެވެ. ކޮވިޑް-19 އިން ސަލާމަތްވުމުގެ ފިޔަވަޅެއްގެ ގޮތުން ތައިލެންޑުގެ ބޯޑަރުތައް ބަންދުކޮށްފައި އޮތުމަށްފަހު އަލުން ހުޅުވާފައިވަނީ މިދިޔަ ނޮވެމްބަރ 18 ވަނަ ދުވަހުގައެވެ.
މި ހަފްތާގެ އަންގާރަ ދުވަހާ ހަމަޔަށް ތައިލެންޑް އަމަލުކުރަމުން އައީ ވެކްސިން ޖަހާފައި ތިބޭ މީހުންނަށް ހާއްސަކޮށްގެން ”ޓެސްޓު އެންޑް ގޯ“ ކިޔާ ޕްރޮގްރާމެއްގެ ދަށުންނެވެ. ވެކްސިން ޖަހާފައި ތިބޭ ފަތުރުވެރިން ތައިލެންޑަށް އެތެރެވުމަށް ފަހު އެއް ދުވަހުގެ ކަރަންޓީނުވެ ކޮވިޑްގެ ނައްސި ނަތީޖާއާ އެކު ކަރަންޓީނުން ދޫކޮށްލައެވެ.
ޗުއްޓީ ހޭދަކުރާ މީހުން ވަކި ސަރަހައްދެއްގައި ތިބޭ އަދި ހޮޓަލުން ބޭރަށް ދެވޭ ގޮތަށް އަމަލުކުރަމުން އައި ”ސެންޑް ބޮކްސް“ ޕްރޮގްރާމަށް ޕުކެޓް ފިޔަވާ އެހެން ސަރަހައްދުތަކުގައި އަމަލުކުރުން ވަނީ ހުއްޓާލާފައެވެ.
އަލަށް އަމަލުކުރަން ފަށާފައިވާ އުސޫލުގެ ދަށުން ތައިލެންޑަށް އެތެރެވާ އެންމެންވެސް ހަތް ދުވަހާ 10 ދުވަހުގެ މުއްދަތަކަސް ކަރަންޓީނު ވާންޖެހޭނެއެވެ.
