ކުންފުނި ދަރަނަރިވެގެން ހިއްސާދާރެއްގެ ޕާސްޕޯޓް ހިފެހެއްޓޭނެ ޤާނޫނީ އެއްވެސް ހަމައެއް ނޯންނާނެ ކަމަށް ނޭޝަނަލް ޕާޓީ، އެމްއެންޕީގެ ނާއިބު ލީޑަރ އަދި ސައިރިކްސް ގްރޫޕްގެ ޗެއަރމަން އަހުމަދު ޝަރީފް ވިދާޅުވެއްޖެއެވެ.
ސަން ކުންފުނިން ހިލްޓަން ކުންފުންޏަށް 28 މިލިއަނަށް ވުރެ ގިނަ ޑޮލަރު ނުދެއްކި މައްސަލައިގައި އެކުންފުނީގެ ވެރިޔާ މީދޫ ދާއިރާގެ މެމްބަރު އަހުމަދު ސިޔާމް މުހައްމަދު (ސަން ސިޔާމް)ގެ ޕާސްޕޯޓް ހިފަހައްޓަން ސިވިލް ކޯޓުން ވަނީ އަމުރުކޮށްފައެވެ.
މިއަމުރާއި ގުޅިގެން ޝަރީފް ވިދާޅުވަނީ ސިޔާމަކީ އެކުންފުނީގެ ހިއްސާދާރެއް ކަމަށާއި ކުންފުންޏެއް ދަރަނިވެރިވެގެން ހިއްސާދާރެއްގެ ޕާސްޕޯޓް ނުހިފެހެއްޓޭނެ ކަމަށެވެ. އަދި ކުންފުންޏެއްގެ މައްޗަށް ލާޒިމްވާކަމެއްގެ ޒިންމާ ނަގަންޖެހެނީ ކުންފުނިންކަމަށާއި އެކަން ކުރާނެގޮތް ކުންފުންޏާބެހޭ ޤާނޫނުގައި އޮންނާނެކަމަށް ޝަރީފް ވިދާޅުވިއެވެ.
ޝަރީފް އިތުރަށް ވިދާޅުވީ ކުންފުނި ދަރައިފިއްޔާ ނުވަތަ ކޯޓުހުކުމެއްގެ ތެރެއިން ފައިސާދައްކަން ޖެހިއްޖެއްޔާ ކުންފުނީގެ މުދާވިއްކައިގެން ފައިސާ ދައްކަންޖެހޭނެ ކަމަށާއި އެގޮތަށްވެސް ނުދެއްކިއްޖެއްޔާ ދެންޖެހޭނީ ކުންފުނި އިފްލާސްކުރަން ކަމަށެވެ.
ޝަރީފް ވިދާޅުވީ އެއްވެސް ދިވެއްސެއްގެ ޕާސްޕޯޓެއް ނުހިފެހެއްޓޭނެކަމަށާއި ޕާސްޕޯޓު ހިފެހެއްޓުމުން އެ އަރައިގަނެވެނީ ޤާނޫނު އަސާސީގައި ބަޔާންކުރާ އަސާސީ ހައްގުތަކާއި މިނިވަންކަމަށްކަމަށެވެ. އަދި ކުންފުންޏަކަށް ދިމާވާކަމެއް ނިންމަންޖެހޭނީ ކުންފުނިތަކާބެހޭ ޤާނޫނުގެ ތެރެއިންކަމަށާއި، ހިއްސާދާރާއި ކުންފުނި އެއީ ޤާނޫނީ ވަކި ދެ ޝަހުސްކަމަށް ޝަރީފް ވިދާޅުވިއެވެ.
ޝަރީފް ފާހަނގަކުރެއްވި ގޮތުގައި ކުންފުންޏާއި އެކުންފުނީގެ ހިއްސާދާރުންނަކީ ވަކި ދެ ޝަހުސުންނެވެ. އެހެންކަމުން ސަން ސިޔާމްގެ ޕާސްޕޯޓް ކޯޓު އަމުރަކަށް ނުހިފެހެއްޓޭނެ ކަމަށް ޝަރީފްވަނީ ވިދާޅުވެފައެވެ.
