ރާއްޖޭގައި ތިބި ތެލެސީމިއާ ކުދިންނަށް ހިލޭ ބޯންމެރޯ ހެދޭނެ ގޮތް ހަމަޖައްސައިދެއްވާނެކަމަށް ޕީޕީއެމް، ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިފަދައިން ވިދާޅުވީ ބޮޑުތިލަދުންމައްޗަށް މިހާރު ކުރައްވާ ދަތުރުގައި ހއ. އުތީމަށް ވަަަަޑައިގެން ދެއްކެވި ވާހަކަފުޅުގައެވެ.
ހއ އުތީމުގެ ރައްޔިތުންނާ ބައްދަލުކުރައްވާ މުއިއްޒު ވިދާޅުވީ، ތެލެސީމިއާ ކުދިންނަށް ބޯންމެރޯ ހަދައިދިނުމަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އިސްކަމެއް ދެއްވި ކަމެއް ކަމަށާއި ޒަކާތު ފަންޑުން އޭރުގައި ގިނަ ކުދިންތަކެއްގެ ބޯންމެރޯ ހަދައިދިން ކަމަށެވެ.
މުއިއްޒު ވިދާޅުވީ ބޯންމެރޯ ހެދުމަކީ ދެމެހެއްޓެނިވި ގޮތެއްގައި ނިޒާމުގެ ތެރެއިން ކުރެވެން ޖެހޭ ކަމެއް ކަމަށާއި އެ ކަން އޭނާގެ ސަރުކާރެއްގައި ނިޒާމުގެ ތެރެއިން ހިލޭ ކުރެވޭނެ ގޮތް ހަމަޖައްސައިދެއްވާނެ ކަމަށެވެ.
މީގެ އިތުރުން ވެސް މުއިއްޒުވަނީ މިރަށަށް ވައުދުތަކެއް ވެވަޑައިގެންފައެވެ. އެ ގޮތުން، މި ރަށުގެ ބަނދަރު ބޮޑުކޮށް، އިތުރަށް ތަރައްގީކޮށްދޭނެކަމަށް ވިދާޅުވުމުގެ އިތުރުން މި ރަށުގެ ބަންޑާރައިންގެ މިސްކިތް، މަރާމާތުކޮށް ރަނގަޅު ފެންވަރަކަށް ހަދާނެކަމަށް ވެސް އޭނާ ވިދާޅުވިއެވެ. މީގެ އިތުރުން އެ ރަށުގެ ރަށް ގިރުމުގެ މައްސަލައާއި ގެދޮރުގެ މައްސަލަ ހައްލުކުރައްވާނެކަމަށާއި އޭޓީއެމް ބަހައްޓައި ބޮޑެތި މަގުތައް ވެސް ހަދައިދޭނެކަމަށް މުއިއްޒު ވިދާޅުވިއެވެ.
