އުތުރުގައި ޤާއިމުކުރާ އެންމެ ބޮޑު ސިފައިންގެ މަރުކަޒުގެ ބިންގާ ހދ.ހަނިމާދޫގައި އަޅައިފިއެވެ.
އެމްއެންޑީއެފް ނޮދަން އޭރިއާ ކޮމާންޑްގެ އާ ހެޑްކުއާޓަރުގެ ބިންގާ އަޅައިދެއްވީ ޑިފެންސް މިނިސްޓަރު މާރިއާ އަހުމަދު ދީދީ އާއި ޗީފް އޮފް ޑިފެންސް ފޯސް ލެފްޓިނެންޓް ޖެނަރަލް އަބްދުﷲ ޝަމާލެވެ.
ދެ ފޭސްއަށް ބަހާލައިގެން ކުރިޔަށް ގެންދާ މި ޕްރޮޖެކްޓުގެ ދަށުން އެތަން ހެދުމުގެ މަސައްކަތްތައް ކުރުމަށް ރާވާފައި ވާއިރު ފޭސް އެކެއްގެ މަސައްކަތް ފަށާތާ އަށް މަސް ދުވަހުގެ ތެރޭގައި ނިންމުމަށް ވަނީ އެއްބަސް ވެފައެވެ. އަދި އެތަން އިމާރާތް ކުރުމަށް ހަމަޖެހިފައި ވަނީ އެންމެ ފަހުގެ ޒަމާނީ ވަސީލަތްތަކާއި ހިމަނައިގެންނެވެ.
އެމްއެންޑީއެފުން ބުނީ ނޮދަން އޭރިއާ ކޮމާންޑްގެ އާ ހެޑްކުއާޓާރު ގާއިމް ކުރުމަށްޓަކައި، އެރަށުން ހަތަރު ލައްކަ އަކަފޫޓަށް ވުރެ ބޮޑު ބިމެއް ސަރުކާރުން ހަމަޖައްސައިދީފައި ވާ ކަމަށެވެ. މި މަޝްރޫއަކީ ސަރުކާރު ބަޖެޓުން 35 މިލިއަން ރުފިޔާ ހަރަދުކޮށްގެން އުތުރުގައި ގާއިމްކުރާ ސިފައިންގެ އެންމެ ބޮޑު މަރުކަޒެވެ.
ހދ.ހަނިމާދޫގައި ޤާއިމްކުރާ އެމްއެންޑީއެފް ނޮދަން އޭރިއާ ކޮމާންޑްގެ އައު ހެޑްކުއޯޓަރޒްގެ ބިންގާ، ދިފާޢީ ވަޒީރު އަލްއުސްތާޛާ މާރިއާ އަޙްމަދު ދީދީ އާއި، ޗީފް އޮފް ޑިފެންސް ފޯސް ލެފްޓިނެންޓް ޖެނެރަލް ޢަބްދުﷲ ޝަމާލް އަޅުއްވައިދެއްވައިފިhttps://t.co/EFZYpr0Y6b pic.twitter.com/IyE4Lu4qD7
— Maldives National Defence Force (@MNDF_Official) August 26, 2023
ނޮދަން އޭރިއާ ކޮމާންޑްގެ ހެޑްކުއާޓާރުގެ ދާއިމީ މަރުކަޒަކަށް މި މަރުކަޒު ބަދަލު ކުރުމުން އަސްކަރީ ގާބިލްކަށް މިހާރަށްވުރެ އިތުރުވެގެން ދާނެ ކަަމަށްވެސް އެމްއެންޑީއެފް އިން ވަނީ ބުނެފައެވެ.
އެމްއެންޑީއެފްއިން ބުނީ އޭރިއާ ކޮމާންޑްތަކުގެ އޮޕަރޭޝަނަލް ގާބިލުކަން އިތުރުކުރުމުގެ އިތުރުން އާލާތްތަކާއި ވަސީލަތްތައް ގާއިމު ކުރުމުގެ މަސައްކަތްތައް ބާރަށް ކުރަމުންދާ ކަމަށާއި މިހާރު ވެސް އެމްއެންޑީއެފް ނޮދަން އޭރިއާ ކޮމާންޑްގެ ހަ ރަށެއްގައި ސިފައިންގެ ހަތް މަރުކަޒު ގާއިމްކޮށް، ރައްޔިތުންނަށް ބޭނުންވާ ހިދުމަތްތައް ފޯރުކޮށްދެމުން ދާ ކަަމަށެވެ.
