ތުނޑީ ފުޓްސަލް ޗެލެންޖް 2023: ސެމީގެ ފުރަތަމަ ދެ ޖާގަ ސްޕާކް ޕްލަގް އަދި ޖީޖީއެސްސީއަށް!

މިހާރު ކުރިއަށް ދާ ތުނޑީ ފުޓްސަލް ޗެލެންޖް 2023 ގެ ސެމީ ފައިނަލުގެ ފުރަތަމަ ދެ ޖާގަ ސްޕާކް ޕްލަގ އަދި ޖީޖީއެސްސީން ކަށަވަރުކޮށްފި އެވެ.

މުބާރާތުގެ ކުއާޓާ ފައިނަލުގެ ފުރަތަމަ މެޗުގައި މިރޭ ބައްދަލުކުރީ އެފްސީ ކިންގް އަދި ސްޕާކް ޕްލަގް އެވެ. މި މެޗު 10-0 ގެ ނަތީޖާއިން ކާމިޔާބު ކޮށްފައިވަނީ ސްޕާކް ޕްލަގް އިންނެވެ.

ސްޕާކް ޕްލަގްގެ ފަރާތުން މޮޅު ކުޅުމެއް ފެނިގެން ދިޔަ މި މެޗުގައި އެޓީމަށް ލަނޑުތައް ޖަހައިދިނީ އަލީ އަޖުމަލް، މުޙައްމަދު އަކްމަލް، އަބްދުﷲ ޝުއާއު، ހުސެއިން ނިމާސް، ހުސެއިން ނާޝިދު އަދި މުޙައްމަދު ފިރުޝާންއެވެ. މީގެ ތެރެއިން ހުސެއިން ނާޝިދު ތިން ލަނޑު ޖަހައިދިން އިރު، އަބުދުﷲ ޝުއާއު އަދި ހުސެއިން ނިމާސް، މީގެން ކޮންމެ ކުޅުންތެރިއެއް ވެސް ވަނީ ދެ ލަނޑު ޖަހާފައެވެ. މެޗުގެ މޮޅު ކުޅުންތެރިއަކަށް ހޮވިފައިވަނީ ސްޕާކް ޕްލަގް އަށް ތިން ލަނޑު ޖަހައިިދިން ހުސެއިން ނާޝިދުއެވެ.

ކުއާޓާގެ ދެވަނަ މެޗުގައި ބައްދަލުކުރީ ޖީޖީއެސްސީ އާއި އެލްވައިޑީ އެވެ. މި މެޗު 7-0 ގެ ނަތީޖާއިން ކާމިޔާބު ކޮށްފައިވަނީ ޖީޖީއެސްސީން އެވެ. މި މެޗުގައި ޖީޖީއެސްސީއަށް ލަނޑުތައް ޖަހައިދިނީ އަހުމަދު ސޮބާހު، މުޙައްމަދު ސޮބާހު، އަހުމަދު އަޔާޒް، މުޙައްމަސު ޝިޔާމް އެވެ. މީގެ ތެރެއިން އަހުމަދު ސޮބާހު، އަހުމަދު އަޔާޒް އަދި މުޙައްމަސު ޝިޔާމް، މީގެން ކޮންމެ ކުޅުންތެރިއަކުވެސް ވަނީ ދެ ލަނޑު ޖަހާފައެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ އަހުމަދު އަޔާޒްއެވެ.

މާދަމާ ރޭ ވެސް ކުއާޓާ ފައިނަލުގެ ދެމެޗު ކުޅޭނެއެވެ. މާދަމާ ރޭ 8:30 ގައި ކުޅޭ ކުއާޓާގެ ފުރަތަމަ މެޗުގައި ބައްދަލުކުރާނީ ޑިޓްރޮއިޓްސް އަދި ފެނަކަ މާބައިދޫ ބްރާންޗްއެވެ. އަދި ދެވަނަ މެޗުގައި ބައްދަލުކުރާނީ ބީއީއެސްޓީ (ބެސްޓް) އަދި ފޮއެމަތި އެވެ. މި މެޗު ފަށާނީ 9:30 ގައެވެ.