ދައްކާ ވާހަކަ އަޑުނާހާ ބައެއްގެ ތެރޭގައި ނޫޅެވޭނެކަމަށާއި ޕީޕީއެމް/ޕީއެންސީގެ ލީޑަރުން އަޅުގަނޑުމެން ކަހަލަ ބޮލުގައި ނުރަޖަހާފައި ތިބި މުސްކުޅިންގެ ބަސް ވެސް އަހާނެ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފު ވިދާޅުވެއްޖެއެވެ.
އެމްޑީޕީ މެންބަރުންތަކެއް ވެރިކަން ކުރާ ޕީއެންސީއާ ގުޅުމަށް ރޭ ބޭއްވި ޖަލްސާގައި ވާހަކަދައްކަވަމުން ޝަރީފް ވިދާޅުވީ، ދައްކާ ވާހަކަ އަޑުނާހާ ބައެއްގެ ތެރޭގައި ނޫޅެވޭނެކަމަށާއި ޕީޕީއެމް/ޕީއެންސީގެ ލީޑަރުން އަޅުގަނޑުމެން ކަހަލަ ބޮލުގައި ނުރަޖަހާފައި ތިބި މުސްކުޅިންގެ ބަސް ވެސް އަހާނެ ކަމަށެވެ. އަދި ޕީއެންސީއަށް އާދެވުމުން ކުރެވުނީ އަހަރުތަކެއް ވަންދެން އާއިލާއާ ދުރުގައި އުޅުމަށްފަހު އަނެއްކާވެސް އެނބުރި ގެއަށް އާދެވުނު ކަމުގެ އިހުސާސްކަމަށް ރޭ ޖަލްސާގައި ވާހަކަ ދައްކަވަމުން ޝަރީފް ވިދާޅުވިއެވެ.
ޝަރީފް ވިދާޅުވީ ޕާޓީ ބަދަލުކުރުމަކީ ވިކުމެއް އަދި އަމިއްލަ މަސްލަހަތު އިސްކުރުންވެސް ނޫން ކަމަށެވެ. އަދި ގައުމުގެ މުސްތަގުބަލު އުޖާލާ ކުރެވެން އޮތީ ކޮން ފިކުރެއްގައިކަން އެނގިވަޑައިގަންނަވާ ކަމަށްވެސް ޝަރީފް ވިދާޅުވިއެވެ.
އަދި އެކަމަކީ ފިތުނައާއި ހަސަދައާއި ޒާތީ ތައައްސަބުން ހާސިލުކުރެވޭނެ ކަންކަން ނޫން ކަމަށާއި، އޭގެ ބަދަލުގައި އެކަން ކުރެވޭނީ އިހުލާސްތެރިކަމާއެކު ބުރަށްކޮށް މަސައްކަތް ކޮށްގެން ކަމަށްވެސް ޝަރީފް ވިދާޅުވިއެވެ. އަދި ޑރ މުއިއްޒުގެ ގާބިލުކަމާމެދު އެމަނިކުފާނު އެއްވެސް ޝައްކެއް ނެތް ކަމަށްވެސް ޝަރީފް ވިދާޅުވިއެވެ.
ޕީޕީއެމް/ޕީއެންސީ އަކީ ޑީއާރްޕީގެ އުފަން ދަރިން ކަމަށާއި އެޕާޓީގެ ޑެޕިއުޓީ ލީޑަރުކަން އެމަނިކުފާނު ގިނަ އަހަރުތަކެއް ވަންދެން އަދާކުރެއްވިކަން ޝަރީފް ފާހަގަކުރެއްވިއެވެ. އަދި އެއްވެސް އިރެއްގައި ފައިސާއަށް ޕާޓީ ބަދަލުކޮށްފައި ނުވާނެ ކަމަށާއި، ޕީއެންސީއާ ގުޅުމުން އިހްސާސްކުރެވުނީ އަމިއްލަ ގެއަށް އެނބުރި އާދެވުނު ކަމުގެ އިހުސާސް ކަމަށް ޝަރީފް ވިދާޅުވިއެވެ.
