ރައީސް މުހައްމަދު މުއިއްޒުގެ ހަފްތާ 14ގެ ވައުދުތަކުގެ ތެރެއިން ސޯޝަލް ހައުސިން ފްލެޓްތަކަށް އަރާފައިވާ ޖޫރިމަނާ މާފުކޮށްދީފިއެވެ.
އާބަންކޯއިން މިއަދު ކުރި އިއުލާނުގައި ބުނެފައިވަނީ ސޯޝަލް ހައުސިން ފްލެޓްތަކުގެ ކުލި ނުދެއްކުމުގެ ސަބަބުން އަރާފައިވާ ޖޫރިމަނާތައް މިއަދާ ހަމައަށް މާފު ކޮށްދޭނެ ކަމަށާއި ’ޕެނަލްޓީ ރިލީފް’ގެ ދަށުން ފްލެޓަށް މިހާތަނަށް ދައްކަން ޖެހި، ނުދެއްކިފައިވާ ފައިސާ ބަހާލައިގެން ދެއްކޭނެކަމަށެވެ.
މީގެ އިތުރުން، ފައިސާ ނުދެއްކިގެން އަރާ ޖޫރިމަނާ ’ފިކްސްޑް ޕެނަލްޓީ’އަކަށް ބަދަލު ކުރުމުގެ ފުރުސަތު ވެސް ބޭނުންވާ ފަރާތްތަކަށް ދިނުމަށް ވަނީ ނިންމާފަ އެވެ. އެގޮތުން: ފައިސާ ދެއްކުން ލަސްވެގެން ނަގާ ޖޫރިމަނާއަކީ މަހަކު ދައްކަން ޖެހޭ އަދަދުގެ %1 ކަމުގައި ކަނޑައެޅުމަށް ހަމަޖެހިފައިވާ ކަމަށް ވަނީ ބުނެފައެވެ.
އާ އުސޫލުތަކުގެ ދަށުން ތައާރަފުކޮށްފައިވާ ’ފިކްސްޑް ޕެނަލްޓީ’ގެ ދަށުން ޖޫރިމަނާ ކުރެވޭ ގޮތަށް ބަދަލު ކުރެވޭނީ، ހަމައެކަނި އެ އުސޫލުގައި ބައިވެރިވުމަށް އެދި ފޯމު ހުށަހަޅާ ފަރާތްތަކަށެވެ. ފޯމު ހުށަހަޅާނީ އަންނަ ޖެނުއަރީ 10 އެއްގެ ކުރިން އާބަންކޯގެ އޮފީހަށް ނުވަތަ އީމެއިލް މެދުވެރިކޮށް [email protected] ނުވަތަަ [email protected] އަށް ކަމަށް ބުނެފައިވެއެވެ.
