މިއަދު މި ފެންނަމުން ދަނީ ބާރެއް ނެތް ވެރިއަކު ބާރު ހުރިކަން ދައްކަމުންދާ މަންޒަރު ކަމަށް މާލެސިޓީގެ މޭޔަރުގެ މަގާމަށް އެމްޑީޕީގެ ޓިކެޓުގައި ވާދަކުރައްވާ އާދަމް އާޒިމް ވިދާޅުވެއްޖެ އެވެ.
އާޒިމް މިހެން ވިދާޅުވެފައިމިވަނީ ސަރުކާރުގެ އިސްވެރިން ހިމެނޭހެން އިންޑިއާގެ ބޮޑުވަޒީރު ނަރެންދްރަ މޯދީއަށް ބޭއަދަބީ ބަސްތަކުން މަލާމާތްކޮށް ފުރައްސާރަ ކުރި މައްސަލައިގައި އިންޑިއާ އާއި ރާއްޖޭގެ ރައްޔިތުންގެ މެދުގައި ވަރުގަދަ ކޯޅުމެއް ހިނގަމުން ދާ ދަނޑިވަޅެއްގައެވެ.
މާލޭގައި ރޭ ބޭއްވި ކެމްޕޭނު އިވެންޓެއްގައި ވާހަކަދައްކަމުން އާޒިމް ވިދާޅުވީ ރައީސް މުއިއްޒު ހުންނެވީ ފިތިފައިކަމަށާއި އެމަނިކުފާނުގެ އެއްވެސް ބާރެއް ނެތްކަމަށެވެ. އަދި ރައީސް މުއިއްޒުގެ ކިބައިގައި ބާރެއް އޮތްނަމަ ޑެޕިއުޓީ މިނިސްޓަރުން ސަސްޕެންޑު ކުރުމުގެ ބަދަލުގައި މަގާމުތަކުން ވަކިކުރާނެ ކަމަށްވެސް އާޒިމް ވިދާޅުވި އެވެ. އާޒިމް ވިދާޅުވީ ސަރުކާރުގެ މިނިސްޓަރުން ފެންވަރުގެ ބޭފުޅުން އިންޑިއާގެ ބޮޑުވަޒީރު ނަރެންދްރަ މޯދީއަށް ފުރައްސާކުރުން މިއީ ގައުމީ ބޮޑު މައްސަލައެއް ކަމަށާއި ސަރުކާރުގެ ބައެއް ފަރާތްތަކުން ދެއްކި ވާހަކަތަކަކީ މުޅި ދިވެހި ރައްޔިތުންގެ އަޑު ނޫން ކަމަށް އާޒިމް ވިދާޅުވި އެވެ.
އާޒިމް ވިދާޅުވީ ފިތުނަ އުފައްދައިގެން ވެރިކަމަށް އާދެވުމުން ދެން ގައުމު ސުންނާފަތި ކުރުމުގެ ބޭނުމެއް ނެތް ކަމަށާއި ނަމަވެސް ފެންނަމުން ދަނީ ގައުމުގެ އިގްތިސާދު ހަލާކުކުރަމުންދާ މަންޒަރު ކަމަށެވެ. އަދި ފެންނަހާ މީހަކަށް މަގާމުތައް ދިނުމުގައި ބަދަލުގައި މަގާމުތައް ދޭން ޖެހޭނީ ގާބިލު މީހުންނަށް ކަމަށާއި މޯދީ އަށް މަލާމާތްކޮށް ސަރުކާރުގެ ޑެޕިއުޓީ މިނިސްޓަރުންތަކެއް ޓްވީޓުތައް ކުރީ ރައީސް މުއިއްޒުގެ ރުހުމާއެކު ކަމަށްވެސް އާޒިމް ތުހުމަތު ކުރެއްވި އެވެ.
”އެހެން ނޫނީއްޔާ ޑރ. މުހައްމަދު އެ ހުންނެވީ ވަރަށް ބޮޑަށް ފިތިފައި. ހެދޭނެ ގޮތެއް ނެތިފައި، އެ ބޭފުޅުންގެ ދަށުވެފައި. ކޮންމެވެސް ގޮތެއް ވެގެން އެ ބޭފުޅާއަށް ހެދޭނެ ގޮތެއް ނެތިފައި އެހެރީ،“ އާޒިމް ވިދާޅުވި އެވެ.
