ކުރިއަށް އޮތް މަޖިލިސް އިންތިޚާބުގައިވެސް މާލޭ ރައްޔިތުންގެ ފަރާތުން ވޯޓެއް ބޭނުން ނަމަ ފްލެޓާއި ގޯތި މިއަދުން މިއަދަށް ހަވާލު ކުރުމަށް ކުރީގެ ރައީސް އަދި އެމްޑީޕީގެ ރައީސް އިބްރާހިމް މުހައްމަދު ޞާލިހު، ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ގޮވާލައްވައިފިއެވެ.
ރައީސް ޞާލިހު މިފަދައިން ގޮވާލެއްވީ އާދަމް އާޒިމް މާލޭގެ މޭޔަރު ކަމަށް ހޮވުމާއި ގުޅިގެން އެމްޑީޕީން އުފާ ފާޅު ކުރުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ރައީސް ޞާލިހު ވިދާޅުވީ ރައްޔިތުން ފުށި ދިއްގަރުފަޅަށް ނުގެންގޮސް، ކުރީގެ ސަރުކާރުން މާލޭގެ ރައްޔިތުންނަށް ދޫކުރި ގޯއްޗާއި ފްލެޓް މިއަދުން މިއަދަށް ހަވާލު ކުރުމަށް ގޮވާލާކަމަށެވެ.
މީގެ އިތުރުން ރައީސް ޞާލިހު ވިދާޅުވީ ރައީސް ޑރ.މުއިއްޒު މިހާރުވެސް ކުރައްވާ ކަމަކީ ވެރިކަމަށް އައުމަށްްޓަކައި ކުރެއްވި މަސައްކަތް ކަމުގައިވާ ދޮގު ހެދުމާއި އޮޅުވާލުމާއި ނަފްރަތަށް ގަދަ ބަސް ބުނުން ކަމަށެވެ.
މި ސަރުކާރަކީ މަޑުމައިތިރި ކަމާއި އެކު ރައްޔިތުންގެ އަޑު އަހައިގެން ރައްޔިތުން ބޭނުންވާ ގޮތަށް ވެރިކަން ކުރުމަށް ގެނައި ސަރުކާރެއް ކަމަށާއި އެކަން އެގޮތަށް ނުކުރާ ކަމަށް ވަންޏާ ރައްޔިތުން ޖަވާބު ދާރީ ކުރުވާނެ ކަމަށް ޞާލިހު ވިދާޅުވިއެވެ.
