ރައްޔިތުންގެ މަޖިލީހަށް މެމްބަރުން ހޮވަން އަންނަ މާޗްމަހު ބާއްވާ އިންތިހާބުގައި އިދިކޮޅު އެމްޑީޕީގެ ފަރާތުން ވާދަކުރާނެ ކެންޑިޑޭޓުން ކަނޑައަޅަން ބާއްވާ ޕްރައިމަރީ އަންނަ ފެބުރުއަރީ މަހުގެ ތިންވަނަ ދުވަހު ބޭއްވުމަށް ނިންމައިފި އެވެ.
ޕާޓީގެ އެތެރޭގެ ޕްރައިމަރީތައް ބާއްވާނެ ދާއިރާތަކާއި އެ ދާއިރާތަކަށް ވާދަކުރާ ކެންޑިޑޭޓުންގެ ލިސްޓު އާންމުކުރުމަށް ފަހު އެމްޑީޕީން ކުރި އިއުލާނުގައި ބުނީ ޕްރައިމަރީ ބޭއްވުމަށް ހަމަޖެހިފައިވާ ތާރީހަކީ ފެބްރުއަރީ މަހު ތިންވަނަ ދުވަސްކަމަށެވެ.
ޕްރައިމަރީއަށް ކުރިމަތިލާން ހުޅުވައިލި ފުރުސަތުގައި އެންމެ ކެންޑިޑޭޓަކު ކުރިމަތިލާފައިވުމުން 36 ދާއިރާއެއްގެ ޕްރައިމަރީއެއް ނޯވެ އެވެ. އެމްޑީޕީން މިއަދު އާންމުކުރި ޕްރައިމަރީ އޮންނަ ދާއިރާތަކުގެ ލިސްޓުގައިވާ ގޮތުން އެޕާޓީން ބާއްވާނީ 43 ދާއިރާގެ ޕްރައިމަރީ އެވެ.
ވިހިވަނަ ރައްޔިތުންގެ މަޖިލީހަށް 93 ދާއިރާއަށް މެންބަރުން އިންތިހާބު ކުރާއިރު، އެމްޑީޕީގެ ޓިކެޓަށް ކުރިމަތިލާން ހުޅުވާލި ފުރުސަތުގައި 14 ދާއިރާއަކަށް ކުރިމަތިލާފައިނުވާ ކަން ފާހަގަކޮށްލެވެއެވެ.
