ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ އަސްކަރިއްޔާއިން ހިންގަމުން ގެންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު 30،000 އިން މައްޗަށް ގޮސްފައިވާ ކަމުގައި ޣައްޒާގެ ޞިއްޙީ ވުޒާރާއިން ހާމަކޮށްފިއެވެ.
ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުން ގެންދާ ލާއިންސާނީ ގަތުލުއާންމަށް ފަސްމަސް ވެފައިވާއިރު، އަދިވެސް މިކަމަށް ނިމުމެއް ނާދެއެވެ.
ޣައްޒާގެ މުސްލިމުންނާއި ދެކޮޅަށް ޢުދުވާނެއް ފަށައި ޔަހޫދީ ފައުޖުން މުސްލިމުންގެ ގެދޮރަށް ބޮންއަޅައި އެ ސަހަރަށް އަރައި ޤަތުލުޢާންމުތައް ހިންގަން ފަށާފައި ވަނީ މީގެ ފަސް މަސް ދުވަސް ކުރިން ނިނިގެން ދިޔަ އަހަރުގެ އޮކްޓޫބަރު 7 ވަނަ ދުވަހުއެވެ.
ޔަހޫދީންގެ ރަޙުމެއް ނެތް ޢުދުވާނާ ގުޅިގެން ޣައްޒާގެ ރައްޔިތުން ވަނީ ބިކަވެފައެވެ. އެ ސަހަރުގެ 2.3 މީހުން ވަނީ ނިކަމެތިވެފައެވެ. އެ މީހުން ގެދޮރު ވަނީ ސުންނާފަތި ކޮށްލާފައެވެ. ހަސްފަތާލުތައް ވަނީ ބަންދު ކުރަން މަޖުބޫރު ކުރުވާފައެވެ. ޞިއްޙީ ޚިދުމަތްތައް ވަނީ ހުއްޓުމަކަށް ގެނުވާފައެވެ. ޣައްޒާއަށް ކާބޯތަކެތި ވެއްދުމަށް ހުރަސް އަޅައި، ޔަހޫދީން ދަނީ ޣައްޒާގެ ކުޑަކުދިން ހައިހޫނު ކަމުގައި މަރަމުންނެވެ.
ފައިދާ ހުރި ކާނާ ނުލިބުމާއި، ފެން ނުލިބުމާއި ބަލިމަޑުކަމުގައި ގިނަ ޢަދަދެއްގެ ކުޑަކުދިން ވަނީ ޝަހީދުވެފައެވެ. ޔަހޫދީންގެ ލާއިންސާނީ ޢުދުވާންތައް ހުއްޓުވައި އިތުރު ކުޑަކުދިން ޝަހީދު ކުރުން ހުއްޓުވުމަށް ވަނީ ބައިނަލްއަޤުވާމީ މުޖުތަމަޢަށް ގޮވައިލާފައެވެ.
ޔަހޫދީ ފައުޖުން ދަނީ މެދުކެނޑުމެއް ނެތި ޣައްޒާއަށް ބޮން އަޅަމުންނެވެ. ފާއިތުވި 24 ވަރަކަށް ގަޑިއިރުގެ ތެރޭގައި ވެސް ފަލަސްޠީނުގެ 79 މީހުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޙީ ވުޒާރާއިން ބުނެއެވެ.
އޮކްޓޫބަރުން ފެށިގެން ހިންގަމުންދާ ޢުދުވާނުގައި ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 70،000އަށް އުފުލިފައެވެ.
