އަންނަ ރަމަޟާންމަހު އަލްއަޤްސާ މިސްކިތަށް މުސްލިމުން އަޅުކަން ކުރަން ވަނުން މަނާކުރުމަށް އިސްރާއީލުގެ ސަލާމަތީ ވަޒީރު އަދި ބޮޑުވަޒީރު ބެންޖަމިން ނަތަންޔާހޫގެ ކެބިނެޓް މެމްމަރު އިޓަމާ ބެން ގްވީރު ގޮވާލައްވައިފިއެވެ.
އިސްރާއީލުގެ ކެބިނެޓު ބައްދަލުބުމެއްގައި ވާހަކަދައްކަވަމުން ހަރުކަށި ފިޔައިގެ ވަޒީރު އިޓަމާ ބެން ގްވީރު ވިދާޅުވީ އަންނަ ރަމަޟާން މަހަކީ ގިނަ އަދަދަކަށް މުސްލިމުން މަސްޖިދު އަލްއަޤްޞާއަށް އަޅުކަން ކުރަން އަންނާނެ މަހެއް ކަމަށާއި އެކަން ހުއްޓުވާ މަނާކުރަން ޖެހޭކަމަށެވެ.
ބެން ގްރީވް ވިދާޅުވީ އަޤްޞާއަށް ރަމަޟާން މަހު ގިނަ އަދަދަކަށް މުސްލިމުން އެއްވުމަކީ ސަލާމަތަށް ނުރައްކާތެރިވެދާނެ ސަބަބެއް ކަމަށާއި އެކަން ހުއްޓުވައި ފިޔަވަޅުއަޅަން ޖެހޭކަމަށެވެ. އަދި މި ކަމާއި ގުޅިގެން އިސްރާއީލުގެ ސަލާމަތީ ކަންކަމާއި ބެހޭ ފަރާތްތަކާއި މަސްވަރާކުރައްވާނޭ ކަމަށް ވެސް އޭނާ ވިދާޅުވިއެވެ.
ނިމިގެން ދިޔަ ރަމަޟާން މަހުގައިވެސް ބެން ގްރީވް ވަނީ މިފަދައިން މުސްލިމުން އަޤްޞާއަށް ވަނުމަށް ހުރަސްއެޅުމަށް ގޮވާލާފައެވެ. ނަމަވެސް އެފަހަރު އޭނާގެ މި ގޮވާލުމަށް ބާބޮޑު އިޖާބައެއް ނުދީ ގިނަ އަދަދެއްގެ މުސްލިމުން ވަނީ އަޅުކަން ކުރުމަށް އަޤްޞާއަށް ވަދެފައެވެ.
ބެން ގްރީވް މިފަދައިން ގޮވާލާފައިވާއިރު، އިސްރާއީލުގެ އަސްކަރިއްޔާއިން މިހާރުވެސް ދަނީ އަޤްޞާ މިސްކިތައް މުސްލިމުން އެރުމަށް ހުރަސްތައް ކުރިމަތިކުރުވަމުންނެވެ. ޚާއްސަކޮށް ހުކުރު ދުވަހު ހުކުރަށް ދާ މުސްލިމުންނަށް ބޮޑެތި ހުރަސްތަކެއް ކުރިމަތި ކުރުވައެވެ.
