ބޯމަތިވަމުން އަންނަ ރައްޔިތުންގެ މަޖިލިސް އިންތިޚާބުގައި ރީ-ރަޖިސްޓްރީވުމަށް ކުރިން ދީފައިވާ ތާރީޚް އަވަސްކޮށް މިމަހުގެ 10 ވަނަދުވަހު ރީ-ރަޖިސްޓްރީ ވުމުގެ ފުރުޞަތު ހުޅުވާލައްވާނެކަމަށް އިލެކްސަންސް ކޮމިޝަނުން ނިންމަވައިފި އެވެ. 
ރީ ރަޖިސްޓްރީކުރަން ލިބޭނީ ތިން ދުވަސް ކަމަށްވާތީވެ އާއްމުންގެ ކަންބޮޑުވުންތަކެއް ހުރުމާއި ގުޅިގެން ރީ-ރަޖިސްޓްރީ ކުރުމަށް މީގެ ކުރިން ކަނޑައަޅާފައިވާ ތާރީޚަށްވުރެ އަވަސްކޮށް މި މަހުގެ 10 ވަނަ ދުވަހު ރީ ރަޖިސްޓްރީކުރަން ހުޅުވާލަން އީސީގެ ބައްދަލުވުމެއްގައި ވަނީ ނިންމަވާފަ އެވެ.
މީގެ ކުރިން މަހުގެ 17 ވަނަ ދުވަހު ބާއްވަން ތާވަލުކޮށްފައިވާ ރައްޔިތުންގެ މަޖިލިސް އިންތިޚާބު ރޯދަ މަހާ ދިމާވާތީވެ އިދިކޮޅު އެމްޑީޕީގެ މެޖޯރިޓީ އޮންނަ މަޖިލީހުން ވަނީ ރޯދަ މަހުގެ ތެރޭގައި އިންތިޚާބު ނުބޭއްވޭ ގޮތަށް ބިލެއް ފާސްކޮށްފަ އެވެ.
އެމްޑީޕީން ފާސްކުރި މި ބިލާއި އެކު ރައްޔިތުންގެ މަޖިލިސް އިންތިޚާބު ރޯދަ މަސް ނިމިގެން 10 ދުވަސް ފަހުން ބާއްވަން ނިމިފައިވާއިރު އީސީން މިހާރު ކަނޑައަޅާފައިވާ ގޮތުން 20ވަނަ ރައްޔިތުންގެ މިޖިލިސް އިންތިޚާބު އޮންނާނީ އަންނަ އޭޕްރީލް މަހުގެ 21 ވާ އާދިއްތަ ދުވަހު އެވެ.
މަޖިލިސް އިންތިޚާބު ބާއްވާ ތާރީޚް ފަސްވުމާއި ގުޅިގެން ވޯޓާސް ލިސްޓަށްވެސް ބަދަލުތަކެއް އަންނާނެތީއާއި ގުޅިގެން ރީ-ރަޖިސްޓްރީ ކުރުމަށް އިތުރު ވަގުތު ދިނުމަށް އީސީއިން ވަނީ ނިންމަވާފަ އެވެ.
އިލެކްސަން ކޮމިޝަންގެ ރައީސް ފުއާދު ތައުފީޤް ވިދާޅުވީ މިފަހަރު މި ހުޅުލާ މުއްދަތުގައި ރީ-ރަޖިސްޓްރީކުރުމަށް ހަތް ދުވަހުގެ މުއްދަތު ލިބޭނެ ކަމުގަ އެވެ. އެއީ މިމަހުގެ 10 ވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ކަމަށްވެސް ފުވާދު ވިދާޅުވި އެވެ.
މަޖިލިސް އިންތިޚާބު ފަސްކުރުމާއި ގުޅިގެން އިންތިޚަބު ބާއްވާ ތާރީޚަށް 18 އަހަރު ފުރޭ މީހުން ހިމެނުމުން ކުރިން ލިސްޓުގައި ނުހިމެނޭ އިތުރު 560 މީހަކަށް ވޯޓު ލިބުމުގެ ޙައްޤު ލިބިގެން ދާނެއެވެ. ލިބެއެވެ.
އަންނަ ރައްޔިތުންގެ މަޖިލިސް އިންތިޚާބުގައި 368 ކެންޑިޑޭޓަކު ވާދަކުރައްވާއިރު 326 ފިރިހެން ކެންޑިޑޭޓަކާއި 42 އަންހެން ކެންޑިޑޭޓަކު ހިމެނޭ 20 ވަނަ ރައްޔިތުންގެ މަޖިލީހުގައި 93 ދާއިރާއަކަށް މެންބަރުން އިންތިހާބު ކުރައްވާނެ އެވެ.
އަންނަ ރައްޔިތުމްގެ މަޖިލިސް އިންތިޚަބުގައި އަމިއްލަ ގޮތުން 130 ކެންޑިޑޭޓަކު ވާދަކުރައްވާ އިރު ހަތް ސިޔާސީ ޕާޓީއަކުން 22 އަންހެން ކެންޑިޑޭޓުންނާއި 216 ފިރިހެން ކެންޑިޑޭޓުންނާއި އެކު ޖުމުލަ 238 ކެންޑިޑޭޓުން ވާދަކުރައްވާނެކަމަށްވެސް އީސީން ހާމަކުރައްވަ އެވެ.
