ފަލަސްތީނުގެ ދިފާއުގައި ހަނގުރާމަކުރަމުން އަންނަ ހަމާސް ޖަމާއަތުން، ޣައްޒާގައި ހުރި އިސްރާއީލުގެ ޔަހޫދީ ކޮމާންޑް ސެންޓަރެއް ގޮއްވާލައި އެ ތަނުގައި ތިބި ސިފައިން މަރާލައިފިއެވެ.
ޣައްޒާ އައްސޭރިފަށުގެ އުތުރު ފަރާތުގައި ހުންނަ އިސްރާއީލުގެ ކޮމާންޑް ސެންޓަރަކަށް ހަމަލާދީ، އެތަން ގޮއްވާލައިފައިވާއިރު، އެތަނުގައި ތިބި ޔަހޫދީ ފައުޖުގެ ހުރިހައި ސިފައިން ވަނީ މަރުވެފައެވެ.
ހަމާސްގެ ހަތިޔާރު އެޅި ވިންގުގެ ނަމުން މަޝްހޫރު އެޒެއްދީން އަލް ގައްސާމް ބްރިގޭޑްސް އިން މި ކަން އިއުލާންކޮށްފައިވަނީ ހުކުރު ދުވަހު ނެރުނު ބަޔާނެއްގައިއެވެ.
ހަމާސް އިން ބުނެފައިވާ ގޮތުގައި ޔަހޫދީންގެ ކޮމާންޑް ސެންޓަރަށް ހަމަލަދީފައިވަނީ ޑްރޯން ބޭނުންކޮށްގެންކަމަށެވެ. އަދި އެތަން ގޮއްވާލުމަށް ބޭނުންކުރީ އެންޓި ޕާސަނަލް ރޮކެޓް ހަމަލާކަމަށްވެސް އެ ޖަމާއަތުން ބުނެ އެވެ.
މީގެ އިތުރުން އިސްރާއީލުގެ ފައުޖުގެ އިސް އޮފިޝަލަކުވެސް މަރާލާފައިވާ ކަމަށް ހަމާސްއިން ބުނެއެވެ. އަދި މީގެ އިތުރުން ޣައްޒާގެ ގެއެއްގެ ތެރޭގައި ތިބި ޔަހޫދީ ސިފައިންގެ ހަމ މީހަކު މަރާލާފައިވާކަމަށްވެސް ރިޕޯޓުކޮށްފައިވެއެވެ..
ޔަހޫދީން ޣައްޒާއަށް މެދު ނުކެނޑި ދެމުން ގެންދާ ހަމަލާތަކުގައި މިހާތަނަށް ފަލަސްތީނުގެ 30،800 އަށް ވުރެ ގިނަ މީހުންގެ ފުރާނަ ވަނީ ގެއްލިފައިއެވެ.
