މި އަހަރު ރަމަޟާން މަހު މާލެ ސަރަހައްދުގައި 30 މިސްކިތެއްގައި ހިފްޒުކޮށް ތާރާވީސް ނަމާދު ކުރާނެ ކަމަށް އިސްލާމީ ކަންތައްތަކާއި ބެހޭ ވުޒާރާއިން ބުނެފިއެވެ.
އިސްލާމީ ކަންތައްތަކާއި ބެހޭ ވުޒާރާއިން ބުނީ މި ރަމަޟާންމަހުގައި މާލެ ސަރަހައްދުގައި 30 މިސްކިތެއްގައި ހިފްޒުކޮށް ތަރާވީސް ނަމާދު ކުރާނެ ކަމަށާއި އެގޮތުން ހިފްޒުކޮށް ތަރާވީސް ކުރާނީ މާލެއިން 18 މިސްކިތަކާއި ހުޅުމާލެއިން 11 މިސްކިތެއްގެ އިތުރުން ވިލިމާލެއިން އެއް މިސްކިތުގައި ކަމަށެވެ.
އަދި މާލެ ސަރަހައްދުގައި ހިފްޒު ނުކޮށް 18 މިސްކިތެއްގައި ތާރާވީސް ނަމާދު ކުރާނެ ކަމަށް ވެސް އެ ވުޒާރާއިން ބުނެފައި ވެއެވެ. މީގެ ތެރޭގައި މާލޭގެ 13 މިސްކިތަކާއި ހުޅުމާލެއިން ތިން މިސްކިތެއްގެ އިތުރުން ވިލިމާލެއިން ދެ މިސްކިތެއް ހިމެނޭ ކަމަށް ބުނެފައި ވެއެވެ.
މި ރަމަޟާން މަހު ތަރާވީސް ކުރާ ދިވެހިންގެ ތެރޭގައި އަލަށް ތަމްރީންކޮށް ތަރާވީސް ކުރުމުގެ ހުއްދަ ހޯދާފައިވާ 16 ޒުވާނަކުވެސް ހިމެނޭ ކަމަށާއި މާލެ ސަރަހައްދުގައި ތަރާވީސް ކުރުމަށް 32 ދިވެހި ހާފިޒުން ހަމަޖައްސާފައި ވާއިރު ބިދޭސީ 18 ހާފިޒަކު ހަމަޖައްސާފައިވާ ކަމަށް އެ ވުޒާރާއިން ހާމަކުރެއެވެ.
