ވަފާތެރި މަވީމޭ- 11 ވަނަބައި

ޝައިންގެ- ވަފާތެރި މަވީމޭ- 11 ވަނަބައި

އާދައިގެމަތިން ޝާނީއަށް ހޭލެވުނީ އޭނާގެ ބައްޕަ މިސްކިތަށް ދިއުމުގެ ކުރިން އޭނާއަށް ގޮވުމުންނެވެ. ރަނގަޅަށް ލޯ ނުހުޅުވެނީސް އޭނާ އެނދުން ފުންމާލިއެވެ. ދޮންތަ އޭނާ ބަލާ އަންނަންވާއިރަށް އޭނާ ނަމާދުކޮށް ތައްޔާރުވާން ޖެހެއެވެ. އެހެންކަމުން އޭނާ އަވަހަށް ކޮޓަރިން ނުކުމެ ގިފިއްޔާ ދިމާއަށް ދުއްވައިގަތެވެ.

“ ދަރިފުޅާ ނިކަން ސަމާލުވެގެން އުޅެބަލަ!“ ޝާނީ އަވަސް އަރުވާލާފައި ގޮސް ދޮރުން ނުކުންނަން އުޅެނިކޮށް ދޮރުކަނީގައި ލައިގަތުމުން އޭނާގެ ބައްޕަ ބުންޏެވެ.

“ ބައްޕާ ލަސްވެގެންނޭ މިދަނީ…ދޮންތަ އަންނަންވާއިރަށް ނަމާދުކުރަން ޖެހެއޭ..“ ޝާނީ އެނބުރިލާފައި ބުނެލިއެވެ.

“ ދަރިފުޅު ކިތަންމެ އަވަސްކުރިޔަސް ބަންގިގޮވީމައެއްނު ނަމާދު ކުރެވޭނީ….އަދި އެބަހުރި ބައިގަޑިއެއްހާއިރު ވަގުތު ޖެހެން…“ ފާރުގައިހުރި ބޮޑުގަޑިއަށް ބަލާލަމުން މުދިންބޭ ބުންޏެވެ.

“ ދެންވެސް އަވަހަށް ބައްޕަދޭބަލަ ބަންގިގޮވަން…އޭރުންނެއްނު އަވަސްވާނީ…“ ޝާނީ އަނެއްކާވެސް ހިނގައިގަންނަމުން ބުންޏެވެ.

“ އަޖާއިބެއްނުވާނެތަ؟..ވަގުތު ނުޖެހެނީސް މީހުން ބަންގިގޮވާތަ؟…އެކަހަލަ މޮޔަ ވާހަކަ މުޅިން ދައްކާނީ“ ގިފިލިން ނުކުމެގެން ގޭތެރެއަށް ވަންނަން އައި އާބިދާ ބުނެލިއެވެ. މުދިންބޭވެސް ހިނިއައިސްފައި ދެފަރާތަކަށް ބޯހޫރާލަމުން މިސްކިތަށް ދިއުމަށްޓަކައި ނުކުތެވެ.

ޝާނީ ނަމާދުކޮށްގެން އައިސް ވަލަށްދާން ތައްޔާރުވެ ހުއްޓައި ސަލްމާ އައުމުން، ކުޑަ ކަތިވަޅި ހިފައިގެން އޭނާ ނުކުތެވެ. ދެކުދިން ބޮޑުމަގަށް ނުކުތްއިރު ރަށުތެރެއޮތީ އަނދިރިކޮށެވެ.

“ މިހާ އަނދިރިކޮށް އޮއްވާވެސް މީހުނަށް ވަލުގަ ހިނގަން ކެރޭތަ؟…“ ކޮޅުކޮޅަށް ބަލާލަމުން ޝާނީ ބުނެލިއެވެ.

“ މިއަށްވުރެ އަނދިރިވާނެ އަދި ވަލުތެރެ…އެކަމު ޒަމާނުއްސުރެ އެކަން ކޮށްއުޅޭމީހުންނަށް ފަތިހެއް މެންދަމެއް ހެނދުނެއް ނޯންނާނެއްނު…އެހެންނޫނަސް ބައްތި ހިފައިގެންނެއްނު އަހަރެމެން ދާނީ“ ސަލްމާ ބުނެލިއެވެ.

“ އޯހ…އެބަ އަންނަން ބައްޕަ ގެންގުޅޭ ބައްތި ހިފައިގެން…“ ކުއްލިއަކަށް ހަނދާންވެގެން ޝާނީ ދުވެގޮސް އައީ ކުޑަ ޓޯޗް ބައްތިއެއް ހިފައިގެންނެވެ. ޝާނީ އައުމުން ދެކުދިން އެކީގައި ހިނގައިގަތެވެ.

“ ކޮބާ ޖިނާހް؟…“ ތަންކޮޅަކަށް ގޮސްފައި ޝާނީއަށް އަހާލެވުނެވެ.

“ މިސްކިތުން އައިސް ތައްޔާރުވާން މިހާރު އުޅޭނީ….“ ސަލްމާ ޖަވާބުދިނެވެ.

“ ހާރިޝްބެ ކޮބާ؟…“ ޖެހިލުންވެހުރެވެސް ޝާނީ އަހާލިއެވެ.

އޭނާ ދެންމެ އެނިދީ…ރޭގަ ވެލަޔާ ހިނގަން ގޮސް ނުނިދާ…..މިފަހަރު އައިފަހުން ކޮންމެރެޔަކު ވެލަޔާ ހިނގަންދޭ….އެކަމު އަދިއެއް ވެލައެއް ކީއްކުރަން ބިސްވަޅެއްވެސް ނުފެނޭ….މަ ބުނެފިން ކޮންމެ ރެޔަކު ދާކަށް ނުވާނޭވެސް…..“ ސަލްމާ ހިނއައިސްފައި ހުރެ އެވާހަކަ ކިޔައިދިން ނަމަވެސް، ޝާނީގެ ގާތަށް ކުޑަކޮށްވެސް ހިންޏެއް ނައެވެ. ހާރިޝް ކޮންމެ ރެޔަކު އެދަނީ ކޮންތާކަށް ކަން ސަލްމާއަށް ނޭނގިއޮތަސް އޭނާއަށް އެނގެއެވެ.

“ މާވަރުގަދަ ހުޝިޔާރު ވެލަޔަކީ ތީ….ހާރިޝް ބެޔާއެކީ ދޮންތަވެސް ދާނަމަ އެވެލާ ހިފޭނެކަން ޔަޤީން…“ ހާރިޝްގެ މަކަރުވެރިކަމުން ރުޅިއައި ނަމަވެސް އެކަން ނުދައްކާ ޝާނީ ބުނެލިއެވެ.

ދެކުދިން ވާހަކައިގައި ތިބެގެން ސަލްމާގެ ގެޔާ ހަމައަށް ދެވުނުއިރު ޖިނާހްހުރީ ވަޅިއާއި ބަރޯއާއި ތަކެތި ހިފައިގެން ނުކުމެ އިންތިޒާރުގައެވެ. ޝާނީވެސް އެމީހުނާއެކީ ދާކަން އެނގުނީއްސުރެ އޭނާވެސް ހުރީ ދާހިތުން ކެތްމަދުވެފައެވެ. މީގެކުރިން ސަލްމާ ނުވަތަ އޭނާގެ މަންމައާއެކީ ކިތަންމެ ފަހަރަކުވެސް އޭނާ ވަލަށް ދެއެވެ. ނަމަވެސް އޭނާ ދަނީ ދާހިތަކުން ނޫނެވެ. ވަލުގައިވެސް އޭނާ އުޅެން ބޭނުންވަނީ އެކަންޏެވެ. ނަމަވެސް ޝާނީއާ އެކީ އޭނާ ކޮންމެތާކަށްވެސް ދާހިތްވެއެވެ.

ވަލަށްދާން އޮންނަ މައިމަގުން ވަދެގެން ތިންމީހުން ހިނގަމުން ދިޔައިރު، ޖިނާހް އޭނާގެ އަތުގައި އޮތް އަލިގަދަ ބައްތިން ދިމަދިމާއަށް އަލިކުރަމުން ދިޔައެވެ. ޝާނީ އޭނާގެ އަލިފަނޑު ބައްތިން ފައިދަށަށް އަލިކުރަމުން ކުރިޔަށް ދިޔައެވެ.

“ އެއޮތީ ފަނެއް….މިކޮޅަށް އަލިކޮށްބަލަ!….“ ޖިނާހްގެ އަތުގައި ކޮއްޓާލަމުން ސަލްމާބުނިއެވެ. ޖިނާހްއަށް ސަލްމާބުނި އެއްޗެއް ނޭނގުމުން އޭނާ ޝާނީގެ އަތުގައި އޮތް ކުޑަ ޓޯޗް ބައްތި އަތުލައިގެން އެދިމާއަށް އަލި ކޮށްލިއެވެ. ސަލްމާ އަލިކޮށްލި ދިމާއަށް ބަލާލުމާއެކު ޖިނާހްއަށް އެފަން ފެނުނެވެ. އޭނާ ހަލުވިކަމާއެކު ގޮސް ގަސްތަކުގެ ތެރެއަށް ވެއްޓިފައިވާ ފަން ދަމާފައި ގެނެސް ބުޑުގަނޑު ވަކިކޮށްލުމަށްފަހު މަގުގެ އެއްކައިރީގައި ބޭއްވިއެވެ.

“ މީހަކު ނުގެންދާނެތަ އެޔެއް..“ ފަން ބާއްވާފައި ކުރިޔަށް ހިނގައިގަތުމުން ޝާނީއެހިއެވެ.

“ އާނ…ބުރިކޮށްލާފަ އޮންނަ ފަނެއް ނުގެންދާނެ…އެއީ މީހެއްގެ އެއްޗެއްކަން އެނގޭނެ ފަންތޮށިބުޑު ވަކިކޮށްލާފަ އޮތީމަ…“ ސަލްމާ އޮޅުން ފިލުވައިދިނެވެ. އެމީހުން ކުރިޔަށް ހިނގަމުން ދިޔައިރު މީހުން ބުރިކޮށް، އެއްކައިރިކޮށްފައިހުރި ފަންވެސް ފެންނަމުން ދިޔައެވެ. ސަލްމާ ބޭނުންވީ ރަށުގެ އެންމެ އިރުމަތީ ފަރާތުގައި އޮންނަ ބޮޑު ރުއްގަނޑަށްދާށެވެ. އެހެންކަމުން ތިންމީހުން ހަލުވި ހިނގުމެއްގައި އެދިމާއަށް މިސްރާބު ޖެހިއެވެ. އެމީހުންނަށް މަގުގެ ކޮޅަށް ދެވުނުއިރު ޝާނީހުރީ ވަރުބަލިވެފައެވެ.

“ ދޮންތާ…ދެން ނުހިނގޭނެ…މިހާރު ވަރުބަލި ވެއްޖެ….އަދިވެސް ނުދެވޭތެ ތިބުނާ ތާކަށް…“ ޝާނީ ކުޑަކުއްޖަކު ފަދައިން ކުސްތަޅާލިއެވެ.

“ މިހެން ގޮނޑުދޮށުން  ފައިބައިގެން ތަންކޮޅަކަށް ދާއިރު އޮންނާނެ ރުއްގަނޑުފެންނަން….ޝާނީއަށް ކިހިނެއް އެނގޭނީ މިރަށުގެ ތަންތަންވެސް….ދުވަހަކު އަންނަނީކީ ނޫންވިއްޔަ…“ ޝާނީއާ ދިމާކޮށްލުމުގެ ގޮތުން ސަލްމާބުނެލިއެވެ.

“ ދެން ތިހެން ކިޔާ….ދުވަހަކު މަގޮވައިގެން އައިންތަ މީގެކުރިން….މަމީ އަބަދުވެސް އެއްޗެއް ނޭނގޭމީހާ….ދެން މަށަށް ދަސްކޮށްދިނީމައެއްނު އެނގޭނީ…“ ޝާނީ ޝަކުވާކުރިއެވެ. އެދެމީހުންގެ މެދުގައި ހިނގާ ދެބަސްވުމުގެ އެއްވެސް ކަމެއް ރޭކާނުލާހުރި ޖިނާހް އެހުރިގޮތަށް ގޮނޑުދޮށަށް ފައިބައިގެން ދިޔައެވެ. ސަލްމާވެސް ބަރޯ މަގުގެ ކޮޅުގައި ބަހައްޓާފައި ގޮނޑުދޮށަށް ފޭބިއެވެ. ސަލްމާ ހަލުވި ފިޔަވަޅުތަކެއް އަޅަމުން ޖިނާހްއާ އެއްވަރަށް ހިނގޭތޯ މަސައްކަތްކުރަމުން ދިޔައެވެ. ޝާނީވެސް ދުވަމުން ކަހަލަ ގޮތަކަށް އެމީހުންގެ ފަހަތުން އައެވެ.

ގޮނޑުދޮށަށް ފޭބުމާއެކު، އިރުއަރަން އުޅޭކަމުގެ ކުލަވަރު އުދަރެހުން ފެންނަން ފެށިއެވެ. އިރުގެ ދޯދިތަކުގެ ސަބަބުން ކުލަބަދަލުވަމުން ދިޔަ އުދަރެހަށް ޝާނީގެ ނަޒަރު ހުއްޓުނެވެ. ފަތިހުގެ ފިނިރޯޅި ޖެހިލުމާއެކީ ގައިން ހީބިހި ނަގައިގެން ދިޔައެވެ. ދިޔަވަރު ހިކިފައި ވުމުގެ ސަބަބުން ލޮނުގަނޑުން މައްޗަށް ހިކިފައިވާ ގާތަށް ފެންނަނީ ލޮނުގަނޑު ތެރެއިން ބޯދިއްކޮށްގެން ތިބި ބިރުވެރި ކަޅު މަޚްލޫޤުތަކެއްގެ ސިފައިގަތެވެ. އެގާތަކުން އަންނަ ފަރުކަހި ވަސް ނޭފަތުގައި ޖެހުމާއެކު ޝާނީގެ މޫނަށް ގޮތެއް ހަދާލެވުނެވެ. ރަށަކީ ގާމަތީ ރަށެއްކަމުން ބޮޑު ފުއްޓަރެއް ނެތްނަމަވެސް، ރަށުގެ ހުޅަނދު ފަރާތާއި ޚިލާފަށް އިރުމަތީ ފަރާތު ގޮނޑުދޮށުގައި ވެއްޔަށްވުރެ ގިނައީ ގަލާއި އަކިރިއެވެ. އެހެންކަމުން އެތާނގައި ހިނގުންވެސް ވީ ޝާނީއަށް ނުހަނު ދަތި ކަމަކަށެވެ.  ކޮންމެ ފިޔަވަޅެއްވެސް އޭނާއަޅަނީ ބައްތި އަލިކުރަމުން ވަރަށް ބަލައިގެންނެވެ. އަލިކޮށްލާ ކޮންމެ ފަހަރަކު ލޯދިއްލައިގެން ތިބެ ކުދި ކުދި ކަކުނިތައް ދުވާ މަންޒަރު ފެނިފައިވެސް އޭނާ ބިރުގަނެއެވެ. ނަމަވެސް ސަލްމާއާއި ޖިނާހްއަށް އެއިން އެއްވެސް ކަމެއް ރޭކާނުލައެވެ. އެމީހުންގެ ވިސްނުންހުރީ އެހެންދިމާއަކަށެވެ.

“ ކޮބާ މިއޮއް އާދެވުނީއެއްނު….“ ޝާނީއާ ދިމާއަށް އެނބުރިލަމުން ސަލްމާ ބުނެލިއެވެ. އޭރު ޝާނީހުރީ ވަރުބަލިވެގެން މާނޭވާ ލެވިފައެވެ.

“ ތިއީ ތަންތާކަށް ގެނެވޭވަރު މީހެއްނޫން…“ ޗޮކެއް ކަނޑާލަމުން ސަލްމާ ބުނެލިއެވެ.

“ އަދިވެސް ހާދަ އަނދިރިއޭ ދޮންތާ؟…“ ރުއްގަނޑުތެރެއަށް ވަންނަން ދިމާކޮށްލުމާއެކު ޝާނީ ބުންޏެވެ.

“ ވާހަކަ ގިނަނުކޮށް އާދޭ….“ ޝާނީގެ އަތުގައި ހިފާ ދަމަމުން ކަހަލަގޮތަކަށް ސަލްމާ ރުއްގަނޑުތެރެއަށް ވަނެވެ. އޭރު ޖިނާހް ގޮސް ދެތިން ފަން ބުރިކޮށްލައިފިއެވެ. އޭނާ ކޮޅުކޮޅު މައްޗަށް އަލިކުރަމުން ދަނިކޮށް ރުއްގަނޑުގެ ބިއްދޮށުންވެސް ބައްތިއެއްގެ އަލިފެނުނެވެ. އެހެންކަމުން  އެމީހުން ނޫނަސް މީހުން އެރުއްގަނޑު ތެރޭގައި އުޅޭކަން އެނގި، އޭނާގެ ހަރަކާތްތައް އަވަސްކޮށްލައި ދިމަދިމާއަށް އަލިކޮށް ފަން ހޯދަން ފެށިއެވެ. ސަލްމާވެސް ޖިނާހްގެ ފަހަތުން ގޮސް ފަންބުރިކުރަން ފެށިއެވެ. ޝާނީ އެހުރި ފިޔަވަޅުމަތީގައި ގުޑާލަންވެސް ނުކެރިފައިހުރީ ދިރޭއެއްޗަކަށް ވެސް އެރިދާނެތީ ބިރުންނެވެ. އެހެންހުރެ، އޭނާގެ އަތުގައި އޮތް ބައްތިން ދިމަ ދިމާއަށް އަލިކުރަމުން ދިޔައެވެ. ސަލްމާއާއި ޖިނާހް ފޯރީގައި ފަންބުރިކުރަމުން ދާ މަންޒަރު ބަލަންހުއްޓައި އެމީހުން ކަށިކެޔޮ ގަސްތަކެއްގެ ބިއްދޮށަށް ވަދެ އިސާހިތަކު އޭނާގެ ލޯމަތިން ގެއްލިއްޖެއެވެ. އެމީހުންގެ ފަހަތުން ދާން ބޭނުންވި ނަމަވެސް އޭނާ ގޮސްފިނަމަ ވާވަދެދާނެކަމަށްޓަކައި ބިރުން މަޑުކުރިއެވެ.

އެމީހުން ގޮސް ގިނައިރުވާން ފެށުމުން އޭނާ އިތުރަށް ބިރުގަންނަ ގޮތްވިއެވެ. ނަމަވެސް އިރުއިރުކޮޅުން ފަނެއް ބުރިކޮށްލާ އަޑު އިވޭތީ އެމީހުން އަދިވެސް ތިބީ އަޑުފޯރާ ފަށުގައިކަން އޭނާއަށް ޔަޤީންވިއެވެ. އަދި އެމީހުން އޭނާ އެކަނި އެތަނަށް ދޫކޮށްލާފައި ނުދާނެކަންވެސް ޔަޤީންވިއެވެ. ޝާނީ ރުކެއްބުޑުގައި ހިމޭނުން އިންދައި މަދިރީގެ ގޯނާ ފެށުނެވެ. އޭނާގެ ކަންފަތް ބުޑުގައި މަދިރި ބޫން ލައްވަން ފެށުމުން އުނދަގޫވެގެން އިރު އިރުކޮޅުން ފޮޅާލެވެ. އަނެއްކޮޅުން ފައިގައިއާއި އަތުގެ އުޅަނބޮށީގައިވެސް މަރިދިހަފާވަރުން އިރުއިރުކޮޅުން ޖަހާލެވެއެވެ. އޭނާ ބައްތިން އަލިކޮށްލާއިރު، މަދިރީގެ ބައިގަނޑެއް އޭނާގެ ވަށައިގެން އެނބުރޭ މަންޒަރު ފެނެއެވެ. އެންމެފަހުން ކެތްނުވެގެން އޭނާ ކޮޅަށް ތެދުވެ ހިނގަން ފެށިއެވެ. އޭނާ އެހެން ހިނގަ ހިނގާ ހުއްޓައި ބިންމަތިން ފަތްތަކުގެ ތެރެއިން އެއްޗެއް ހިރޭހެން ހީވެގެން އަލިކޮށްލިއިރު، ބޮޑުރަތްކަކުންޏެކެވެ. ބައްތީގެ އަލިއެޅުމުން ކަނުނީގެ ދެލޯވެސްހުރީ ދިއްލިފައެވެ. އޭނާގަތްބިރުން ދުވެގޮސް ކައްޗަށް އޮތް ޅަރުކަކަށް އެރިއެވެ. އޭނާއަށް އެރުނު އެންމެ މައްޗަކަށް އަރާއޮވެ ބައްތިން އަލިކުރަން ފެށިއެވެ. އެއްކަހަލަ ކަކުނި އިރުކޮޅަކު ހުއްޓިގެން އޮވެފައި ދުވެގޮސް ރުކެއްގެ ބުޑުގައިވާ ހޮރަކަށް ވަދެފިލައިފިއެވެ.

ޝާނީ އޭނާ އަރާއިން ރުކުން މަޑުމަޑުން ތިރިއަށް ފައިބައި ރުކުގެބުޑުގައި އިށީނދެ ސަލްމާއާއި ޖިނާހްއަށް އިންތިޒާރު ކުރަން ފެށިއެވެ. އެމީހުން އޭނާ ކޮބައިތޯ ބަލަން އަންނާނެކަން އޭނާއަށް ޔަޤީންވާތީ އެތަނުން ދުރަށް ނުގޮސް މަޑުމަޑުން އިނެވެ. ޝާނީ އެހެން އިންދައި އޭނާގެ ދާދިގާތަށް ކާއްޓެއް ވެއްޓުމާއެކު ބިރުން ހަޅޭއްލަވައިގެންފައި އިންތަނުން ފުންމައިގެން ތެދުވެވިއްޖެއެވެ. އޭނާ ބިރުގަތްވަރުން އެތާ އިންނަންވެސް ނުކެރިގެން ސަލްމާ ފެނޭތޯ ހިނގައިގަތެވެ. އެވަގުތު ރުއްތަކުގެ ތެރެއިން އުދަރެހުން ބޮޑު އަލިފާން ބޯޅައެއް ފެނިފައި އޭނާގެ ބިރު ދެގުނައަށް އިތުރުވެގެން ދިޔައެވެ. ފަޔަށް ބާރުލާފައި އޭނާއަށް ދުއްވައިގަނެވިއްޖެއެވެ. ތަންކޮޅަކަށް ގޮސްފައިވެސް އޭނާއަށް ފަހަތް ބަލާލެވުނީ އަލިފާންގަނޑު ފަހަތުން އަންނަނީ ކަމުގައި ހީކޮށްފައެވެ. ނަމަވެސް އެއީ އަލިފާން ގަނޑެއްނޫންކަން އޭނާއަށް ރޭކާލީ ހިސާބަކަށް ދުވިފަހުންނެވެ. އަމިއްލަ މޮޔަކަމާހުރެ އޭނާއަށް ހެވުނެވެ. އޭނާ ފުން ނޭވާއެއް ދޫކޮށްލަމުން އައިސް ރުކެއްގައި ލެނގިލައިގެން އަރަމުންދިޔަ އިރަށް ނަޒަރު ހުއްޓާލިއެވެ.

އިރުފެނުން ތޮޅިލީ ވަގުތުކަމުން އޭގައި ލޮލަށް އުނދަގޫވާފަދަ ގަދަ އަލިކަމެއްނެތެވެ. އަލިފާން ބޯޅައެއްފަދައިން އިރު ދިއްލިފައިހުރިއިރު، ވަށައިގެންވީ އުދަރެސްވަނީ ގަދަރަތްކުލައާއި އޮރެންޖް ކުލައިން ފެވިފައެވެ. ލޮނުގަނޑުވެސް އޮތީ އުދަރެހާއި އެއްކުލައިން ދިއްލިފައެވެ. އެއަޖާއިބުކުރުވަނިވި މަންޒަރުބަލަން އާޝޯޚްވެފައި ޝާނީއަށް ހުރެވުނެވެ. އިރުއެރި ވަރަކަށް އޭގެ ސައިޒު ކުޑަވެ އަލިގަދަވަމުން ދިޔައެވެ. އުދަރެހާއި އެކީ ލޮނުގަނޑުގައިވީ ގަދަ ރަތްކުލަވެސް މަޑުވަމުން ގޮސް އޭގެކުލަ ގަދަ ރަން ކުލައަކަށް ބަދަލުވެއްޖެއެވެ.

ގުދުރަތުގެ އެރީތިކަމަށް ހިތްދޫކޮށްލައިގެން ހުއްޓައި އޭނާ ސިހުނީ އެއްޗެހިތަކެއް ދަމަމުން ފަހަތުން މީހަކު ނުކުންނަ އަޑުއިވުމުންނެވެ. ޝާނީ ފަހަތަށް އެނބުރި ބިރުން އެދިމާ ބަލަން ހުއްޓައި ނުކުތީ ޖިނާހްއެވެ. އޭނާ އައީ ބައިވަރު ފަންތަކެއް ހިފައިގެންނެވެ. ސަލްމާގެ ޚަބަރެއް ނުވެއެވެ. ޖިނާހް ފަންތައް ބަހައްޓާފައި  މަޑުމަޑުން އައިސް ޝާނީގެ ގާތަށް ހުއްޓުނެވެ. އިރުއަރަމުން ދިޔަ ހިތްގައިމު މަންޒަރު ފެނިފައި އޭނާގެ ނަޒަރުވެސް އެދިމާއަށް ހުއްޓުނެވެ. މިއީ އޭނާ އާއްމުކޮށް ދެކޭ މަންޒަރެއް ނަމަވެސް ކޮންމެ ފަހަރަކުވެސް އެމަންޒަރު ބަލަނީ ނުހަނު ޝައުޤުވެރިކަމާއެކުއެވެ. މިހާރުވެސް އޭނާގެ ކެމެރާގައި އިރުއަރާ މަންޒަރުތައް އެކިފަހަރުމަތިން ރައްކާކޮށްފައި ވާނެއެވެ. ޖިނާހް ހިނިތުން ވެލައިގެން އެމަންޒަރު ބަލަންހުރިއިރު، ޝާނީގެ ނަޒަރު ޖިނާހްގެ މޫނަށް ހުއްޓިފައި ހުއްޓެވެ. އިރުގެ ދޯދިތައް އެޅުމުގެ ސަބަބުން އެމޫނަށް އަރާފައިވަނީ ހިތްގައިމު ރަން ކުލައެކެވެ. ޖިނާހްގެ ދިގު އެސްފިޔަތައް ރަންކުލައިން ފާޅުވާންހުރިއިރު، އެލޮލުގެ ވިދުންވެސް އިތުރުވެފައިވާ ފަދައެވެ. ޝާނީ ބަލާހެން ހީވެގެން ޖިނާހް ބަލާލިއެވެ. ހިނދުކޮޅަކަށް ދެމީހުންގެ ނަޒަރު ސީދާވުމާއެކު ޝާނީ އަވަސް އަވަހަށް ދުރުބަލަން ފެށިއެވެ.

އިރުއެރުމާއެކު އޭގެ ރަން ދޯދިތަކުން ދުނިޔެ އުޖާލާކޮށްފިއެވެ. އިސާހިތަކު ވަލުތެރޭގައިވާ އަނދިރިކަންވެސް ނެތިކޮށްލައި ގަސްގަހާގެހީގެ ފެހިކަން ފާޅުވާން ފަށައިފިއެވެ. ހިމޭންކަމުގެ ވަގުތުކޮޅަކަށްފަހު ކުއްލިއަކަށް ޖިނާހް ހިނގައިގަތީ ޝާނީވެސް އޭނާގެ ފަހަތުން އައުމަށް އެދެމުންނެވެ. ޝާނީ ޖެހިލުންވެހުރެ ޖިނާހްގެ ފަހަތުން ހިނގައިގަތީ އެތާނގައި އެކަނި ހުންނަން ބޭނުން ނުވާތީއެވެ. ތަންކޮޅަކަށް ގޮސްފައި ޖިނާހް ހުއްޓުނެވެ. އަދި ޝާނީގެ އަތުގައި އޮތް ކަތިވަޅިއާ ޓޯޗް އަތުލިއެވެ.  ޓޯޗް އޭނާގެ ސޯޓްގެ ޖީބަށްލުމަށްފަހު، ކަތިވަޅި ގެންގޮސް ފަންތައް ބަހައްޓާފައިވާ ރުއްބުޑުގައި ހަރުކޮށްލިއެވެ. އަދި އޭނާގެ އަތުގައިވާ ކަތިވަޅިވެސް ހަމަ އެތާނގައި ހަރުކޮށްލިއެވެ. އޭނާ އެގޮތަށް ކަންތައްކުރީ ޝާނީގޮވައިގެން އޭނާ ދާން ގަސްތުކުރިތަނަކީ ކަތިވަޅި ހިފައިގެން އުޅެން އެންމެ ރައްކާތެރިތަކެއް ނޫކަން ޔަޤީންވާތީއެވެ. ޝާނީ ސުވާލު އުފެދިފައި ހުއްޓައި ޖިނާހް އަނެއްކާވެސް ހިނގައިގަންނަމުން ޝާނީވެސް އޭނާއާއެކު އައުމަށް އެދުނެވެ. ޝާނީވެސް ދެބަހެއްނެތި ޖިނާހްގެ ފަހަތުން ދިޔައެވެ.

ޖިނާހް ރުއްގަނޑުގެ ބިއްދޮށަށް ވަންނަމުން ދިޔަވަރަކަށް ޝާނީ ކަންބޮޑުވާން ފެށިއެވެ. އެއީ އޭނާ ދުވަހަކުވެސް ދުށް ހިސާބެއްވެސް ނޫނެވެ. ހިނގާ ހިނގާ ރުއްގަނޑު ނިމޭހިސާބުން ނުކުމެވުނީ ތަފާތު ރީތި ގަސްތަކެއް ހެދިފައިވާ ބޮޑު ސަރަހައްދަކަށެއެވެ. އެތާނގައި އެންމެ ރުކެއްވެސް ނެތެވެ. އަދި ގަސްތަކުގެ ދަށުގައި ޗަކަފެންގަނޑެއް ހެދިފައިވުމުން އެއީ ކަނޑޫފާކަން އޭނާއަށް އެނގުނެވެ. މަންމަގެ ފަރާތުން ކަނޑޫފާ ހުންނަ ސިފަ އޭނާއަށް އެނގުނު ނަމަވެސް މިނޫނީ ދުވަހަކުވެސް ކަނޑޫގަހެއް އޭނާ ނުދެކެއެވެ. އެއީ ދާދި އެއްވަރަކަށް ދަނޑިއެއްހެން އުސްކޮށް ހެދިފައިވާ ރީތި ގަސްތަކެކެވެ. އެތާނގައި އެކި ސައިޒަށް ހެދިފައިވާ ކަނޑޫގަސްތައް ހުއްޓެވެ. އެންމެ ކުދިގަހާއި ތަންކޮޅެއް ބޮޑެތިގަހާއި ނުހަނު މައްޗަށް ހެދިފައިވާ ބިޔަ ގަސްތައްވެސް ހުއްޓެވެ. ކުދިގަސްތަކަށް ބަލާލުމުން އޭނާއަށް ސިފަވީ ހިންދީ ފިލްމްތަކުގައި ފެންނަފަދަ ސައިފަތް ދަނޑުތަކެވެ. ކަނޑޫ ގަހުގެ ފަތްތައް ހުންނަނީ ދާދި އެކަހަލަ ގޮތަކަށެވެ.

ފެންގަނޑު ހެދިފައިވާ ހިސާބަށް ދެވުމާއެކީ ޝާނީ ހުއްޓުނެވެ. ފެންގަނޑުތެރެއަށް ފައިބާފައިވާ ފަތްތަކާއި ކަނޑޫތައް ވީފެ ޗޮކްލެޓްކުލައަކަށްވަނީ ބަދަލުވެފައެވެ. ފެންގަނޑުވެސް ހީވަނީ ގިނަދުވަސްތަކެއްވާންދެން ކައްކާފައިހުރި ގަރުދިޔަގަނޑެއް ހެންނެވެ. މުޅިހިސާބުގައި ދުވަނީވެސް ފާވަހެވެ. ފެންގަނޑުތެރެއިން އޫކޮށް މައްޗަށް އަރާފައިހުރި މޮށަވައްތައް ފެނިފައިވެސް އޭނާ ބިރުގަތެވެ. ޖިނާހް ކަނޑޫފަލަށް ވަދެގެން ދިޔައިރު ފަހަތުން ޝާނީ ނާންނަހެން ހީވެގެން އޭނާ ހުއްޓިފައި ބަލާލިއެވެ. ޝާނީ ހުއްޓި ހުރި މަންޒަރު ފެނިފައި އަތުގެ އިޝާރާތުން އައުމަށް އެދުނެވެ. ޝާނީ ނުހަނު ބިރުންހުރެ ފެންގަނޑުތެރެއަށް ފައިއެޅުމާއެކު އަޑިއަށް ގަނބައިގަންނަގޮތްވުމުން ބިރުން ހަޅޭއްލަވައިގަނެވުނީ ވެއްޓެނީކަމުގައި ހީކޮށްފައެވެ. ޖިނާހް ހަލުވިކަމާއެކު ގޮސް ޝާނީގެ އަތުގައި ހިފައިގެން ކުރިޔަށް ހިނގައިގަތެވެ.

ފައިއަޅާ ކޮންމެ ފަހަރަކު ޗަކަގަނޑުގައި ފައިވާން ކިބަ ހަރުލައެވެ. އެހެންކަމުން ހިނގަންޖެހެނީ ގަދަބާރުންނެވެ. އެހާލުގައި ގޮސް ގޮސް ހުއްޓައި ކުއްލިއަކަށް އޭނާއަށް ފައިއެޅުނީ ކަންޒު ކަހަނބެއްގައެވެ. އޭތި ދުއްވައިގަތް ވަގުތު ގަތްބިރުން ޝާނީއަށް ފުންމައިގެންފައި އަރައި ޖިނާހް ގައިގާ ދެފައި ތަގުޅިކޮށްލަމުން ދެއަތުން ޖިނާހް ކަރުގައި ބައްދައިގަނެވުނެވެ. އެވަގުތު ލިބުނު ސިހުމުން ޖިނާހްގެ ފައިކައްސާލި ނަމަވެސް ޝާނީގެ އުނަގަނޑުގައި އެއްއަތްއަޅުވާލަމުން އަނެއް އަތުން ކައިރީގައިހުރި ކުޑަ ކަނޑޫގަހެއްގައި ބާރަށް ހިފައި އޭނާގެ ފައި ބިމުގައި ހަރުކޮށްލިއެވެ. ނުވެސް ވިސްނާހުއްޓައި މިފަދަ ގޮތަކަށް ޝާނީ އޮޅުލައިގަތުމުން އޭނާގެ ނޭވާވެސް މޭގެތެރޭގައި ތާށިވިހެން ހީވިއެވެ. ހަރަކާތެއްވެސް ކުރަން ނޭނގިގަނޑުވެފައި އޭނާއަށް ހުރެވުނެވެ.

ޖިނާހްގެ ގައިގާ ބައްދައިގެން އޮންނަތާ އިރުކޮޅެއްފަހުން ޝާނީއަށް މިކުރެވުނު ކަމެއް ރޭކާލިއެވެ. އޭނާއަށް ވިސްނާލެވުނުއިރު މިއޮތީ ހަމަ ރަނގަޅަށްވެސް ޖިނާހްގެ އުރަށްއެރިފައެވެ. އޭނާ އަވަސް އަވަހަށް ޖިނާހްގެ ގައިން ދޫކޮށްލަމުން ޗަކަގަނޑުގެ ތެރެއަށް ފޭބިއެވެ. ގަތްލަދުން އޭނާ ހުރިދިމާއަށް ގަނބައިގެން  ގޮސް ގެއްލޭނޭ ނަމައޭވެސް ހިތަށް އެރިއެވެ. ކުއްލިއަކަށް ޖިނާހުއާއި ދުރަށް ޖެހެވުނީވެސް ބޭއިޚްތިޔާރުގައެވެ. ޝާނީއަށް ވީގޮތުން ޖިނާހްގެ ގާތަށް ހިނިއައި ނަމަވެސް ޝާނީ އޭނާގެ ގައިގާ ބައްދައިގަތުމުން އޭނާވެސް ހުރީ ފާޑަކަށް ރަކިވެފައެވެ. ދެމީހުންކުރެ މީހަކުވެސް އެކަކު އަނެކަކަށް ބަލާލުމެއްވެސް ނެތި ތިބެގެން ދަނިކޮށް ނުކުމެވުނީ  ކަނޑޫގަސްތަށް ތަންކޮޅެއް މަދު ހާމަ ސަރަހައްދަކަށެވެ. އެތާނގައި މައިގަނޑުގޮތެއްގައިހުރީ ކަނޑޫގަހާއި ތަފާތުގޮތަކަށް ފަތްހުރި އެއްވަރުގެ ބޮޑު ފަލަ ތިންގަހެވެ. އޭނާ ސުވާލުގެ ނަޒަރަކުން ޖިނާހްއަށް ބަލާލީ އެކޮންކަހަލަ ގަސްތަކެއްތޯ އަހާލާފަދަ ގޮތަކަށެވެ. އެވަގުތު ޖިނާހް ކުރިޔަށްޖެހިލާފައި ގުދުވެ ޗަކަގަނޑުތެރެއިން ނަގައި ދިއްކޮށްލީ ބޮޑު ކުއްޅަވަކެކެވެ.

“ ކުއްޅަވަށް؟…އެއީ ކުއްޅަވަ ގަސްތަ؟“ ހައިރާންވެފައި ޝާނީއަށް އަހާލެވުނެވެ. ކުއްޅަވަށް ފެނުމުން އުފާވި ނަމަވެސް އޭގައި ޗަކަ އުނގުޅިފައި ހުރުމުން ޝާނީ އޭގައި ހިފުމަށް އިންކާރުކުރިއެވެ. އެހެންކަމުން ޖިނާހް އޭތި އެއްލާލުމަށްފަހު އޭނާ ގަސްތަކަށް ނަޒަރު ހިންގާލިއެވެ. ޝާނީވެސް ހައިރާންވެހުރެ ގަސްތަކަށް ކަޅިއެއް ހިންގާލުމާއެކީ އޭނާގެ ހައިރާންކަން އިތުރުވެގެން ދިޔައީ ގަސްތަކުގައި ކުއްޅަވަށް އަޅާ ބަރާވެފައިވާތަން ފެނުމުންނެވެ. މީގެކުރިން ދުވަހަކުވެސް އޭނާ ކުއްޅަވަށް ގަހުގައި ހުއްޓައެއް ނުދެކެއެވެ.

“ ވާއު…ހާދަބައިވަރު ކުއްޅަވަކެކޭ….އަޅެ ބޭނުން…“ ބޭއިޚްތިޔާރުގައި ޝާނީއަށް ބުނެވުނެވެ. ކުއްޅަވައްތަށް ފެނުމާއެކުވެސް އޭނާގެ ކުޅުދިޔާ ވެއްޖެއެވެ. ޝާނީގެ މޫނަށްއެރި ކުލަވަރުންވެސް އޭނާއަށް ކުއްޅަވައް ކަމުދާވަރު ޖިނާހްއަށް ދެނެގަނެވުނެވެ. އެހެންކަމުން ލަހެއް ފަހެއްނެތި ގޮސް ޖިނާހް ގަހަށް އަރަން ތައްޔާރުވިއެވެ. އޭނާ ގަސްކައިރިއަށް ހުއްޓި އަރަން ތައްޔާލުވެލާފައި އޭނާގެ ޖީބްގައި އޮތް ޝާނީގެ ޓޯޗްބައްތި ނަގައި ޝާނީއަށް ދިއްކޮށްލިއެވެ. ޝާނީ އޭގައި ހިފުމުން އޭނާ ފުން ނޭވާއެއް ދޫކޮށްލުމަށްފަހު ދެއަތް ދެއަތާ އުނގުޅާލައި ރަނގަޅަށް ތައްޔާރުވެލިއެވެ. އަދި ގަހުގެ ދެފަރާތުން ރަނގަޅަށް ހިފަހައްޓާލުމަށްފަހު ޅާނބަކައިވެސް ނުލައި ހުސްފަޔާ ގަހަށް އަރަންފެށިއެވެ. އެގަހަކީ ނުހަނު ރާޅު ތޮށްޓެއްލާފައިހުރި އެހާމެ ދިގު އަދި ފަލަވެސް ގަހެކެވެ. ދުވަސްވެފައިވާ ގަހެއްކަމުން ގަހުގެ ގޮފިތައްވެސްހުރީ ނުހަނު އުހުގައެވެ. ގަހުގެ ފަލަކަމުން ޖިނާހްގެ އަތްގުޅިވެސް ނުކައެވެ.

ޖިނާހް އަރަމުންދަނިކޮށް ގަހުގެ ތޮށިގަނޑެއް ނެއްޓި ފައިކައްސާލި ވަގުތު ބިރުންގޮސް ޝާނީއަށް އޭނާގެ މޫނުގައި އަތްއަޅައި ލެވުނެވެ. ނަމަވެސް ޖިނާހް ހުޝިޔާރު ކަމާއެކީ އޭނާގެ ފައި ގަހުގައި ހަރުކޮށްލިގޮތުން އެއީ އޭނާ ކޮށްފަރިތަ ކަމެއްކަން ދޭހަވިއެވެ. މި ނޫނީ ދުވަހަކުވެސް މީހަކު މިހާ ދިގު އަދި އެހާމެ ފަލަގަހަކަށް މިގޮތަށް ބިރެއް ޖެހިލުމެއްނެތި އަރަނިކޮށް އޭނާ ނުދެކެއެވެ. ޝާނީ ބިރުންހުއްޓައި ޖިނާހް ގަހަށްއަރައި ކުއްޅަވަށް ބިންނަން ފެށިއެވެ. ދެތިން ކުއްޅަވަށް ބިނދެލާފައި ޝާނީއާއި ދިމާއަށް ފަހަރަކު ކުއްޅަވަކެއް އެއްލިއެވެ. ޝާނީ ހިފަން މަސައްކަތްކުރި ނަމަވެސް އެކަތިވެސް ނުހިފި ހުރިހާ އެއްޗެއް ޗަކަގަނޑުތެރެއަށް ވެއްޓުނެވެ. ޝާނީ ދެރަވެފައި ޅަކުއްޖަކު ފަދައިން ތުންފުރޮޅާލިގޮތް ފެނިފައި ޖިނާހްގެ ގާތަށް ހިނިއައެވެ. އެންމެފަހުން ޖިނާހް ކުއްޅަވަށް ބިނދެފައި އޭނާ ލައިގެންހުރި ސޯޓްގެ ޖީބަށް އަޅަންފެށިއެވެ.

ޖިނާހް ފޯރީގައި ކުއްޅަވައް ބިންނަ މަންޒަރުބަލަން ޝާނީ ގަޔާވެގެން ހުއްޓައި ކުއްލިއަކަށް ޝާނީގެ ނަމުން މީހަކު ގޮވާލިއަޑު އިވުމުން އޭނާ ސިހުނެވެ. އެއީ ސަލްމާއޭ ހިތައި އަނގައިން ބުނަން އުޅެފައިވެސް އޭނާ ވިސްނާލިއެވެ. ވަލުތެރޭގައި ހުއްޓައި މީހަކު ގޮވިޔަސް އެއްފަހަރުން ޖަވާބު ދޭކަން ނުވާނެއޭ އޭނާގެ މަންމަ ބުނެއެވެ. އެހެންކަމުން އޭނާއަށް ގޮވަނީ ސަލްމާކަން ޔަޤީންކޮށްފައި ނޫނީ އަނގައިން ނުބުނަން އޭނާ ހުއްޓެވެ. އެހެން ހުއްޓައި ތަކުރާރުކޮށް އޭނާގެ ނަމުން ގޮވަން ފެށިއެވެ. އަދި ހިނދެއް ހިނދަކަށް އެއަޑު ކައިރިވަމުންވެސް ދިޔައެވެ. ޝާނީއަށް އެއީ ސަލްމާގެ އަޑުކަން ޔަޤީނާއި ގާތަށް އެނގުނު ނަމަވެސް ހުރެވުނުތަނެއްގެ ގޮތުން އޭނާ އިންތިހާއަށް ބިރުގަތެވެ. އޭނާއަށް ބޭއިޚްތިޔާރުގައި ގަހާދިމާ ބަލާލަމުން ޖިނާހްއަށް ގޮވާލެވުނެވެ. ނަމަވެސް ޖިނާހްއަށް އަޑުނީވޭނެކަންވެސް ހަނދާންވީ ދެފަހަރަކު ގޮވޭލެވުނު ފަހުންނެވެ.

ޝާނީ ކަންބޮޑުވެގެން ޖިނާހްއާ ދިމާއަށް އެއްޗެއް އެއްލަން ގަސްތުކުރިއެވެ. އެއްލާނެ އެއްޗެއް ފެނޭތޯ ހޯދާލުމުން އޭނާގެ ލޮލުގައި އަޅައިގަތީ ދާދި ދެންމެއަކު ޖިނާހް އެއްލި ތިން ކުއްޅަވަކެވެ. އޭނާ ފަކުރުންހުރެވެސް ގުދުވެ އެތަނުން ކުއްޅަވަކެއް ނެގިއެވެ. އަދި އަތުކުރިއަށް ބާރުލަމުން ގަހާދިމާއަށް އެއްލިއެވެ. ތަންކޮޅަކަށް މައްޗަށް އަރާފައި އެއަށްވުރެބާރަށް ކުއްޅަވަށް ވެއްޓިއްޖެއެވެ. އޭނާ އަނެއްކާވެސް އަނެއް ކުއްޅަވަށް ނަގައި އަތުގައި ހުރިބާރެލާފައި ހޫރާލިއެވެ. މިފަހަރުވެސް ވީހަމަ އެވަރެވެ. ދެންވެސް ހިތްވަރު އެލުވާނުލައި ތިންވަނަކުއްޅަވަށްވެސް ނަގައި އަތަށް ލެވުނުގައި ބާރެއްލާފައި ގަހާދިމާއަށް އެއްލިއެވެ. އެވަގުތު ގަހުގެ މެދާހިސާބުން ގަސްގަނޑުގައި ކުއްޅަވަށް ޖެހިފައި ވިއްސައިގެން އައި ބޮނޑީގައި ޖެހުނީ އޭނާގެ ބޮލުގައެވެ. ވީތަދުން އޭނާއަށް ބޮލުގައި ފިރުމާލެވުނެވެ. މިހުރިހާކަމެއް ވީއިރުވެސް ޖިނާހްއަކަށް ރޭކާނުލައެވެ.

“ ޝާނީ…ޝާނީ އަޑުއިވޭތަ؟ ކޮންތާކުތަ ތިއުޅެނީ؟…“ ކުއްލިއަކަށް ދާދިގާތުން ސަލްމާގެ އަޑުއިވިފައި ޝާނީ ސިހުނެވެ. ޝާނީ ގަތްބިރުން ދުވެގޮސް ކުއްޅަވަށް ގަހުގެ ބިއްދޮށަށް ވަދެފިލިއެވެ. ސަލްމާ ގޮވަމުން ގޮވަމުން އައިސް ކުއްޅަވަށް ގަސްދޮށަށް ނުކުތެވެ.

“ އަޅެ އެ ދެމީހުން ކޮންތާކަށްތަ އެވަނީ؟…މައެކަނި ބަހައްޓާފަ އަނެއްކާ ގެޔަށް ދިޔައީތަ؟…ފަންތައްވެސް އެހުރިގޮތަށް ނުވެސް ކިރިހާ ބަހައްޓާފަ ޖިނާހްވެސް ދިޔައީތަ؟…“ ސަލްމާ އަމިއްލަ ނަފްސާ މުޚާތަބުކޮށް ބުނަމުން ދިޔައެވެ. ޖިނާހް ކުއްޅަވަށް ބިނދެ ބިނދެފައި ތިރިބަލާލިއިރު ޝާނީއެއް ފެންނާކަށް ނެތެވެ. ނަމަވެސް ސަލްމާ ކޮޅުކޮޅަށް ލޯހިންގަމުން ދާ މަންޒަރު ފެނުނެވެ. ޖިނާހް ބަލާކަށް ނުކުރެ ސަލްމާއާ ދިމާއަށް ކުއްޅަވަކެއް އެއްލުމާއެކު އޭނާ ސިހިފައި ގަހަށް ބަލާލިއެވެ. އޭރު ޖިނާހް ހިނިއައިސްފައި ބަލަންއިނެވެ.

“ މީދޯ  މިސޮރު ޖަހާ ސަކަރާތަކީ؟ ކޮބާ ޝާނީ؟..“ ސަލްމާ އިޝާރާތުން އެހިއެވެ. އެވަގުތު ޖިނާހް ޝާނީ އެތާތިރީހައި ހުރިކަމަށް ދެއްކިއެވެ. ސަލްމާ ވަށައިގެން ހޯދާލުމުންވެސް ޝާނީއެއް ނުފެނުނެވެ. އެހެންކަމުން ޖިނާހް ގާތު ގަހުން ފޭބުމަށް ސަލްމާ ބުންޏެވެ. ޖިނާހްވެސް އަވަސް ހަރަކާތަކާއެކު ގަހުން ފައިބަންފެށިއެވެ. ވަކި ހިސާބަކަށް ފޭބިތަނާ ގަސްބުޑުގައި ފިލާހުރި ޝާނީ އޭނާއަށް ފެނުނެވެ. ޖިނާހް ސަލްމާއަށް ހަނާއަޅާލަމުން ޝާނީ ފިލާހުރިތަނަށް އިޝާރާތްކޮށްލިއެވެ. ސަލްމާ މަޑުމަޑުން ގޮސް ގަހުގެ ބިއްދޮށް ބަލާލިއިރު ޝާނީހުރީ ދެލޯމަރާ ތަގުޅިކޮށްގެންނެވެ.

“ ޝާނީ…ކީއްވެ ފިލާތިހުރީ؟..“ ޝާނީގެ ކައިރިއަށް ހުއްޓި ސަލްމާ އަހާލުމާއެކީ ސިހިފައި އޭނާ ލޯހުޅުވާލިއެވެ.

“ ކީއްވެތަ މިތާ ތިހުރީ؟….މަ ގޮވާ ގޮވާ ކަރުން ހަންދިޔައިރުވެސް އިވޭކަމަށްވެސް ނުހަދާތިހުރީ މަށަށް ޖެއްސުންކުރަންދޯ…“ ޝާނީ އަނގައިންވެސް ނުބުނެ ހުރުމުން ނުރުހިފައި ސަލްމާ ބުންޏެވެ.

“ ތީ ހަމަ ދޮންތަދޯ…“ ޝާނީ ބިރުންހުރެ ސުވާލުކޮށްލިއެވެ. ޝާނީހުރީ އަނގައިން ނުބުނެހުރީ ބިރުންކަން ޔަޤީންވުމުން ސަލްމާގެ ރުޅިފިލައި ބާރަކަށް ހެވުނެވެ.

“ ނޫނޭ މަމީ ހަންޑިއެއް….ޝާނީ ކާލަން މިއައީ…“ ސަލްމާ ހެމުން ހެމުން ބުންޏެވެ. އެއީ ސަލްމާކަން ޔަޤީންވުމުން ޝާނީ ތުންއޫކޮށްލަމުން ލޯއަޅާލިއެވެ.

ޖިނާހް ގަހުން ފޭބުމަށްފަހު އޭނާގެ ޖީބުން ކުއްޅަވަކެއްނަގައި ޝާނީއަށް ދިއްކޮށްލިއެވެ. އެވަގުތު ޝާނީ ޖިނާހްއަށްވެސް ލޯއަޅާލިއެވެ. ޖިނާހް ބޯކަހާލަމުން ކުއްޅަވަށް ޖީބަށްލިއެވެ.

“ ދެންވެސް ހިނގާބަލަ ފަން ކިރިއްސަން ދެވޭތޯ….ހާދަފަނެއް ހޮވާފައޭ މިއައީ….މިސޮރުވެސް ފަންތައް ދޫކޮށްލާފަ މިސަކަރާތެއް ޖަހަން ވިއްޔަ މިއައީ…“ ޖިނާހްގެ ކޮނޑުގައި ބޮނޑިއެއް އަޅާލުމަށްފަހު ކުދިކިޔަމުން  ސަލްމާ އެތަނުން ނުކުތުމަށް ހިނގައިގަތެވެ.

ޝާނީގެ މޫޑު އޮފްވި ސަބަބެއް ނޭނގި ހައިރާންވެފައި ހުރެގެން ޖިނާހްވެސް އެމީހުންގެ ފަހަތުން އައެވެ. ރުއްގަނޑުތެރޭގައި އެމީހުން އެއްކުރި ފަންފުނި ކައިރިއަށް ގޮސް ސަލްމާ ފަން ކިރިއްސަން ފެށުމުން ޖިނާހްވެސް ސަލްމާއާއި ބައިވެރިވިއެވެ. ނަމަވެސް ޝާނީއަށް އެކަންކުރަން ނޭނގޭތީ ތަންކޮޅެއް ދުރުގައި ރުކެއްގައި ލެނގިލައިގެން އެމަންޒަރު ބަލަން ހުއްޓެވެ. ސަލްމާއަށްވުރެ ދެގުނަ ޖިނާހް އަވަހެވެ. އެންމެފަހުން ސަލްމާ ޖިނާހް ފަން ކިރިއްސާވަރަކަށް ފަންހުޅި ހުޅިއަށް ބަންނަމުން ދިޔައެވެ. ޝާނީ އެމަންޒަރު ބަލަން އާޝޯޚްވެފައިހުރިއިރު، ޖިނާހްއަށް ނޭނގޭކަމެއް ދުނިޔެމަތީ ވޭބާއޭ އޭނާގެ ހިތަށްއަރަމުން ދިޔައެވެ. ޖިނާހްގެ ކަންފަތަށް އަޑުނީވުން ފިޔަވައި އޭނާގެ ކިބައިގައި އުނިކަމެއްނުވެއެވެ. ނަމަވެސް އެބޮޑު ނިއުމަތަކީވެސް ކިހާ މުހިއްމު ނިޢުމަތެއް ހެއްޔެވެ؟ އެހެންނޫންނަމަ މިއަދު އޭނާ ގޮވާލާތަނުން ޖިނާހްއަށް އަޑުއިވިގެން ގަހުން ފޭބީހެވެ. އެވަގުތު ކޮޅުގައި ޖިނާހްއަކީވެސް އެހެންމީހުން ފަދަ ފުރިހަމަ މީހަކަށްވީނަމައޭ ފުރަތަމަ ފަހަރަށް އޭނާގެ ހިތަށްއެރިއެވެ. ނަމަވެސް ދެވަނަ ސިކުންތުގައި އޭނާއަށް މިވިސްނެނީ ކިހާ ގޯސްވިސްނުމެއްކަން އޭނާގެ ޒަމީރު އޭނާއަށް އަންގައިދިނެވެ. އަހަރެމެންގެ ކައުއިތުރު ރަސޫލާ ފިޔަވައި ފުރިހަމަ އިންސާނަކު ދުނިޔޭގައި ވޭހެއްޔެވެ؟ ކޮންމެ އުނިކަމަކީވެސް އެމީހަކަށް ކޮންމެވެސް ގޮތަކުން ލިބޭ ރަޙުމަތަކަށް ނޫނީ ނުވާނެއެވެ. ފަންތައް ބަނދެ ނިމުމުން ސަލްމާއާއި ޖިނާހް ކޮންމެމީހަކު ބޮޑު ފަންބޮނޑިއެއް ހިފައިގެން ރުއްގަނޑުން ނުކުންނަން ދިމާކޮށްލިއެވެ. ޝާނީވެސް ހިތްވަރުކޮށްފައި ފަންބޮނޑިއެއްގައި ހިފޭތޯ އުޅުނެވެ. ނަމަވެސް ބަރުކަމުން އޭނާއަށް ތަންކޮޅަކަށްވެސް ނުގެންދެވުނެވެ.

“ ޝާނީ ތިބަހައްޓާފަ އާދޭ….ޖިނާހް އަންނާނެ ބަލާ….“ ސަލްމާ އެހެންބުނުމުން ކަތިވަޅިތައް ހިފައިގެން ޝާނީ ހިނގައިގަތެވެ. އެމީހުންނަށް ހުރިހާ ފަންތަކެއް ހިފައިގެން މައިމަގަށް ނުކުމެވުނުއިރު ދަމަކަށް އިރުއަރައިފިއެވެ. އެމީހުން ގެނައި ބަރޯއަށް ފަންއަޅައި ފުރުމުން ބާކީ އޮތް ފަންބޮނޑި ސަލްމާގެ ބޮލަށް ލައިގެން ގެޔަށް ދިއުމަށް މިސްރާބު ޖެހިއިރު ޝާނީވެސް ހިމޭންކަމާއެކު އެމީހުންގެ ފަހަތުން އާދެއެވެ. އަވަށާ ދިމާއަށް ދިޔައިރު ވަލުތެރެއިން ނުކުމެގެން އަންނަ އަންހެންވެރިންނާވެސް އެމީހުންނާ ބައްދަލުވިއެވެ.

“ ސަލްމާ މިއަދު ހާދަ ފަނެކޭ ހޮވައިގެން ތިއުޅެނީ….“ ފަންބޮނޑިއެއް ބޮލަށްލައިގެން ދިޔަ އަންހެނަކު ބުނެލިއެވެ. “ އާނ…ގިނަކުދިން ގޮވައިގެން އުޅޭތީ ގިނައިން ލިބުނީ….“ ހީލަމުން ސަލްމާ ޖަވާބުދިނެވެ.

ނުނިމޭ- ވާހަކަ ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކެއް ދެއްވާ. އަދި ވާހަކަ ޝެއަރ ކޮށްލަދެއްވާ.