ރާއްޖޭގެ ކުރީގެ ޓޫރިޒަމް މިނިސްޓަރ އަލީ ވަހީދުގެ ޝަރީއަތުގެ މިއަދު ތާވަލުކުރި އަޑުއެހުން ކެންސަލްކޮށްފިއެވެ.
އަލީ ވަހީދުގެ މައްޗަށް އުފުލާފައިވާ ޖިންސީ ގޯނާގެ މައްސަލައިގެ އަޑުއެހުން މއަދަށް ތާވަލްކުރެވިފައިވަނިކޮށް މިއަޑުއެހުން މިވަނީ ކެންސަލްކުރެވިފައެވެ.
ޕަބްލިކް ޕްރޮސެކިއުޓަރު އަދި ޕީޖީ އޮފީހުގެ މީޑިއާ އޮފިޝަލް އަހްމަދު ޝަފީއު މީޑީޔާއަށް މައުލޫމާތުދިން ގޮތުގައި، މިއަދުގެ އަޑުއެހުން ކެންސަލް ކޮށްފައިވާކަން ކްރިމިނަލް ކޯޓުން ވަނީ އެ އޮފީހަށް އަންގާފައެވެ. އަދި އޮންލައިންކޮށް ޝަރީއަތުގައި ބައިވެރިވާން އަލީ ވަހީދު އެދިވަޑައިގަތުމުންނާއި ސިއްހީ ހާލަތާ ގުޅުން ހުރި ލިޔެކިއުންތަކެއް ފޮނުވާފައިވާތީ އަޑުއެހުން އެހެން ދުވަހަކަށް ފަސްކޮށްފައިވާ ކަމަށާއި އެހެންނަމަވެސް މި ލިޔެކިއުންތައް ދައުލަތާ ޚިއްސާ ކުރައްވާފައި ނުވާ ކަމަށް ޝަފީއު ވިދާޅުވިއެވެ.
އަލީ ވަހީދު ޓޫރިޒަމް މިނިސްޓަރަކަށް އުޅުނުއިރު، އެމިނިސްޓްރީގެ މުވައްޒަފުންތަކަކަށް އަލީ ވަހީދު ޖިންސީ ގޯނާ ކުރި ކަމުގެ ތުހުމަތު ކުރެވޭ މައްސަލާގައި ހަ ދައުވާއެއް އޭނާގެ މައްޗަށް އުފުލާފައިވެއެވެ.
ޖިންސީ ގުނުވަން ދެއްކި ކަމުގެ ކުށުގެ ދައުވާއާއި، ޖިންސީ އަނިޔާ ކުރުމުގެ ކުށުގެ ދައުވާއާއި، ރޭޕް ކުރަން އުޅުމުގެ ކުށުގެ ދައުވާއާއި، ޖިންސީ ގޯނާ ކުރުމުގެ ކުށުގެ ދައުވާއާއި، ޖިންސީ ގޯނާ ކުރަން އުޅުމުގެ ކުށުގެ ދައުވާއާއި، ހުއްދަ ނޫން ޖިންސީ މުއާމަލާތެއް ހިންގުމަށް އެދުނު ކުށުގެ ދެ ދައުވާ ވަނީ އޭނަގެ މައްޗަށް އުފުލާފައެވެ.
އަލީ ވަހީދު މިވަގުތު ހުންނެވީ ބޭސް ފަރުވާއަށް ރާއްޖެއިން ބޭރުގައެވެ. އަލީ ވަހީދުގެ ޣައިރު ހާޒިރުގައި މި މައްސަލައިގެ އަޑުއެހުންތައް ނުގެންދެވޭނެ ކަމަށް މަތީ ދެ ކޯޓުގެ މަރުހަލާގައި އޮތީ ކަނޑައަޅައިފައެވެ.
