ކުރިއަށް އޮތް ރިޔާސީ އިންތިހާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ފަރާތުން ވާދަކުރާނެ ކެންޑިޑޭޓަކު ހޮވުމަށް ބާއްވާ ޕްރައިމަރީގެ ފޯރި ގަދަވެފައިވަނިކޮށް، ބައެއް ކެންޑިޑޭޓުން ރަނިންމޭޓުން އިއުލާން ކުރައްވަމުން ގެންދަވާތީ އެ ޕާޓީގެ ޗެއާޕާސަން މުހައްމަދު ނަޝީދު ކަންބޮޑުވުން ފާޅުކުރައްވައިފިއެވެ.
އެމްޑީޕީގެ ވަޓްސްއެޕް ގްރޫޕަކަށް ފޮނުއްވި މެސެޖެއްގައި ނަޝީދު ވިދާޅުވީ، ރިޔާސީ އިންތިހާބަށް އެ ޕާޓީން ނުކުންނައިރު އެހެން ސިޔާސީ ޕާޓީތަކާ އެކު ކޯލިޝަން މަޝްވަރާތައް ކުރުމުގެ ފުރުސަތު އޮންނަންޖެހޭ ކަމަށެވެ. އަދި ރަނިންމޭޓުގެ މަގާމަކީ އެފަދަ މަޝްވަރާތަކުގައި އެމްޑީޕީއަށް އޮންނަ މުހިންމު ސިޔާސީ ބާރެއް (ލެވަރެޖެއް) ކަން ފާހަގަކުރައްވަމުން، އެ ފުރުސަތު ގެއްލޭ ގޮތަށް ކެންޑިޑޭޓުން އަމަލުނުކުރެއްވުމަށް އެމަނިކުފާނު ވަނީ އިލްތިމާސް ކުރައްވާފައެވެ.
އެމްޑީޕީގެ ރިޔާސީ ޓިކެޓް ހޯއްދެވުމުގެ ޝައުގުވެރިކަން މިހާތަނަށް ފާޅުކުރައްވާފައިވަނީ ކުރީގެ ނައިބު ރައީސް ފައިސަލް ނަސީމްގެ އިތުރުން ކުރީގެ ޗެއާޕާސަން ފައްޔާޒް އިސްމާއީލާއި، އެ ޕާޓީގެ ކުރީގެ ރައީސް އަބްދުﷲ ޝާހިދު އަދި ހުޅުމާލެ ދެކުނު ދާއިރާގެ މަޖިލިސް މެންބަރު ޑރ. އަހުމަދު ޝަމްހީދެވެ. މި ބޭފުޅުންގެ ތެރެއިން ޕާޓީގެ ޓިކެޓުގައި އިންތިހާބަށް ނުކުންނަވާނެ ފަރާތެއް ކަނޑައަޅާނީ ބާއްވާ ޕްރައިމަރީންނެވެ.
ނަޝީދުގެ މި ކަންބޮޑުވުން އަމާޒުވެފައި މިވަނީ، ރިޔާސީ ޕްރައިމަރީގައި ވާދަކުރައްވާނެކަން އިއުލާން ކުރެއްވުމާއެކު، މާލެ ސިޓީގެ މޭޔަރު އާދަމް އާޒިމް ރަނިންމޭޓަކަށް ހަމަޖައްސަވާފައިވާކަން ފައިސަލް ނަސީމް ހާމަކުރައްވާފައި ވަނިކޮށެވެ. ނަމަވެސް، ޕްރައިމަރީގައި ވާދަކުރައްވާ އެހެން އެއްވެސް ބޭފުޅަކު މިހާތަނަށް ރަނިންމޭޓަކު އިއުލާނެއް ނުކުރައްވައެވެ.
އެހެންކަމުން، ޕާޓީގެ މަސްލަހަތު އިސްކޮށް، ކުރިއަށް އޮތް ތަނުގައި އެހެން ފަރާތްތަކާ އެކު އެއްބަސްވުންތަކަށް ދިއުމަށް ހުރަސްއެޅޭ ފަދަ ނިންމުންތައް ކެންޑިޑޭޓުން ނުނިންމެވުމަށް ޗެއާޕާސަން ވަނީ އެދިވަޑައިގެންފައެވެ.
