ޕާކިސްތާނުގެ ވެރިރަށް އިސްލާމްއާބާދުގެ ކޯޓެއްގެ ބޭރުގައި ދިން ބޮމުގެ ހަމަލާއެއްގައި 12 މީހުން މަރުވެ، 27 މީހުން ޒަޚަމްވެއްޖެއެވެ.
އެ ހަމަލާ ދިނީ އަމިއްލަ މަރުގެ ހަމަލާއެއް ކަމަށް ޕާކިސްތާނުން ބުނެފައިވާއިރު، އިންޑިއާއާއި އަފްޣާނިސްތާން މިކަމުގެ ތުހުމަތުކޮށްފިއެވެ.
އިސްލާމްއާބާދުގެ ޑިސްޓްރިކްޓް ކޯޓުގެ ކުރިމަތީގައި ދިން މި ހަމަލާ ދިނީ އާންމުކޮށް ގިނަ ބަޔަކު އެއްވެ ތިބޭ ސަރަހައްދެއްގައެވެ. ޕާކިސްތާނުގެ އެތެރޭގެ ކަންކަމާބެހޭ ވަޒީރު، މޮހްސިން ނަޤުވީ ނޫސްވެރިންނަށް ވިދާޅުވީ، ކޯޓުގެ ގޭޓު ބޭރުގައި ހުރި ފުލުހުންގެ އުޅަނދެއް އަމާޒުކޮށްގެން އަމިއްލަ މަރުގެ ހަމަލާދިން މީހަކު ބޮން ގޮއްވާލީ ކަމަށެވެ. އޭނާ ވިދާޅުވީ، ހަމަލާދިން މީހާ ކޯޓުގެ ގޯތިތެރެއަށް ވަނުމަށް މަސައްކަތްކޮށްފައިވީ ނަމަވެސް، އެކަން ކާމިޔާބު ނުވުމުން ފުލުހުންގެ އުޅަނދަކަށް އަމާޒުކުރީ ކަމަށެވެ.
ބޮމުގެ ހަމަލާ ސިފަކުރައްވައި ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވިދާޅުވީ، އިސްލާމްއާބާދުގައި ދިން މި ހަމަލާއާއި، ކެޑޭޓް ކޮލެޖަކަށް ދިން އެހެން ހަމަލާއަކީ އެ ސަރަހައްދުގައި އިންޑިއާއިން ދެމުންދާ ހަމަލާއެއް ކަމަށެވެ. ނަމަވެސް އެކަމަށް އެއްވެސް ހެއްކެއް އޭނާ ހުށަހަޅުއްވާފައެއް ނުވެއެވެ.
ހަމަލާގެ ތުހުމަތު ރަސްމީކޮށް އެއްވެސް ޖަމާއަތަކުން ހަވާލުވެފައިނުވި ނަމަވެސް، މިފަދަ ހަމަލާތައް ކުރިން ދީފައިވަނީ ޕާކިސްތާނު ތާލިބާން (ޓީޓީޕީ) ފަދަ ހަތިޔާރުއެޅި ޖަމާއަތްތަކުންނެވެ.
ފުލުހުންގެ ތަރުޖަމާނަކު ވިދާޅުވީ، ފޮރެންސިކް ޓީމުގެ ރިޕޯޓު ލިބުމުން އިތުރު ތަފްސީލު ލިބޭނެ ކަމަށެވެ. މީޑިއާ ރިޕޯޓުތައް ބުނާ ގޮތުގައި، ހަމަލާގައި މަރުވެފައިވަނީ ގިނައީ މަގުމަތިން ދަތުރުކުރި މީހުން ނުވަތަ ކޯޓު ކަންކަމަށް އައިސްތިބި ފަރާތްތަކެވެ.
ޕާކިސްތާނުގެ ރައީސް އާސިފް އަލީ ޒަރްދާރީ ވަނީ މި ހަމަލާ ކުށްވެރިކުރައްވައި، ހަމަލާގައި މަރުވި ފަރާތްތަކުގެ އާއިލާތަކަށް ތަޢުޒިޔާ ވިދާޅުވެ، ޒަޚަމްވި މީހުންނަށް އަވަސް ޝިފާއަކަށް އެދިވަޑައިގެންފައެވެ. އަދި ޤާނޫނު ތަންފީޒުކުރާ އިދާރާތަކުން ކުރަމުންދާ މަސައްކަތަށް ރައީސް ޝުކުރުއަދާކުރައްވާފައިވެއެވެ.
