ދިވެހި މީޑިއާތަކަށް އެއް ޕްލެޓްފޯމަކުން ކޮންޓެންޓް ފޯރުކޮށްދިނުމަށްޓަކައި، ”ނެޝަނަލް ނިއުސް އެޖެންސީ“ (އެންއެންއޭ)ގެ ނަމުގައި އާ ޕްލެޓްފޯމެއް އިފްތިތާޙުކޮށްފިއެވެ.
މިއީ ރައީސުލްޖުމްހޫރިއްޔާގެ އޮފީހާއި، ޒުވާނުން ބާރުވެރިކުރުމާއި މަޢުލޫމާތާއި ފަންނާ ބެހޭ ވުޒާރާއާއި ޕަބްލިކް ސަރވިސް މީޑިއާ (ޕީއެސްއެމް) ގުޅިގެން ޕްރައިވެޓް މީޑިއާތައް ކުރިއެރުވުމަށް ފެށި މަސައްކަތެކެވެ.
މި ޕްލެޓްފޯމް މެދުވެރިކޮށް ޕީއެސްއެމްގެ ވީޑިއޯ ކޮންޓެންޓްތަކާއި، މުހިންމު އިވެންޓްތަކުގެ ފޮޓޯއާއި ވީޑިއޯ، އަދި ހާދިސާތަކާއި ކާރިސާތަކުގެ ރޯ ފައިލްތައްވެސް ހިލޭ ލިބޭނެއެވެ. ޒުވާނުން ބާރުވެރިކުރުމާއި މަޢުލޫމާތާއި ފަންނާ ބެހޭ ވުޒާރާގެ ސްޓޭޓް މިނިސްޓަރ އަލީ ޝަމްޢާން ވިދާޅުވީ، ރެޖިސްޓްރީކޮށްފައިވާ އޮންލައިން އަދި ބްރޯޑްކާސްޓް މީޑިއާތަކަށް ގިނަ ކޮންޓެންޓްތަކެއް ހިލޭ ލިބޭނެކަމަށާއި، މިއީ ޒިންމާދާރުކަމާއެކު ޚަބަރާއި މަޢުލޫމާތު ފެތުރުމަށް ލިބޭ ފުރުޞަތެއް ކަމަށެވެ.
ޕީއެސްއެމްގެ މެނޭޖިން ޑިރެކްޓަރ އިބްރާހިމް ނަސްރީން ވިދާޅުވީ، ހިލޭ ކޮންޓެންޓްތަކުގެ އިތުރުން ޕްރިމިއަމް ޕެކޭޖްތައްވެސް ހިމެނޭނެ ކަމަށާއި، ބައިނަލްއަޤްވާމީ މީޑިއާތަކުގެ ކޮންޓެންޓް ހިއްސާކުރުމަށް މަޝްވަރާ ކުރެވެމުންދާ ކަމަށެވެ.
ނެޝަނަލް ނިއުސް އެޖެންސީ އިފްތިތާޙުކުރުމަށްފަހު، ފުރަތަމަ 20 މީޑިއާއާއެކު އެއްބަސްވުމުގައި ސޮއިކޮށްފައިވާއިރު، އިތުރު މީޑިއާތަކަށްވެސް މި ޕްލެޓްފޯމުގައި ބައިވެރިވުމުގެ ފުރުޞަތު އަބަދުވެސް ހުޅުވިފައި ހުންނާނެއެވެ. މުސްތަޤުބަލުގައި މީޑިއާތަކަށް ތަފާތު ތަމްރީން ޕްރޮގްރާމްތަކާއި ބައިނަލްއަޤްވާމީ ފުރުޞަތުތައް ހޯދައިދިނުމަށް މަސައްކަތްކުރާނެ ކަމަށްވެސް ޕީއެސްއެމްގެ މެނޭޖިން ޑިރެކްޓަރ ވިދާޅުވިއެވެ.
