ވިލިމާލެވީމާ އިހުމާލުކޮށްލެވިފައި، ތަފާތުކުރެވިފައި އޮންނަންޖެހޭނެ ކަމަކަށް ގަބޫލެއް ނުކުރައްވާ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ވިލިމާލެ ރައްޔިތުންނާއި ބައްދަލުކުރެއްވުމަށް ރޭ ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.
ސަރުކާރަށް ދެ އަހަރުވުމުގެ މުނާސަބަތުގައި ބޭއްވި ޕްރެޒެންޓޭޝަނުގައި ވެވަޑައިގެންނެވި ވަޢުދުފުޅާ އެއްގޮތަށް، މާލޭގެ ރައްޔިތުންނާ ބައްދަލުކުރެއްވުމުގެ ސިލްސިލާގެ ފުރަތަމަ ބައްދަލުވުން ވިލިމާލޭގައި ރޭ ވަނީ ބާއްވާފައެވެ. މި ބައްދަލުވުމުގައި، ރައީސް ވަނީ ރިޔާސީ އިންތިޚާބުގައި ވެވަޑައިގެންނެވި ވަޢުދުތައް ހަނދާންކުރައްވައި، ވިލިމާލެއަށް ހާއްސަ ތަރައްޤީއެއް ގެނެސްދެއްވުމަށް އަޒުމު ކަނޑައަޅުއްވާފައެވެ.
މި ބައްދަލުވުން އިންތިޒާމުކުރެވިފައިވަނީ، ވިލިމާލޭ ރައްޔިތުންނަށް އެބޭފުޅުންގެ ކަންބޮޑުވުންތަކާއި، ޚިޔާލުތަކާއި، މަޝްވަރާތަކާއި، މައްސަލަތައް ސީދާ ރައީސާ ހިއްސާކުރުމުގެ ފުޅާ ފުރުސަތެއް ދިނުމަށެވެ. ރައީސް މުޢިއްޒު ވަނީ، ރިޔާސީ އިންތިޚާބުގައި ވިލިމާލޭ ރައްޔިތުންނަށް ވެވަޑައިގެންނެވި ވަޢުދުތައް އެއްވެސް މިންވަރަކަށް ހަނދާން ނައްތާނުލައްވާކަން ފާހަގަކުރައްވާފައެވެ. އެމަނިކުފާނު ވިދާޅުވީ، ބައެއް ކަންކަން ފުރިހަމަކުރެވިފައިވާ ކަމަށާއި، ބައެއް ކަންކަން ހިނގަމުންދާ ކަމަށެވެ. އަދި، އެންމެ މުހިންމު ބޮޑެތި މަޝްރޫޢުތައް ހިންގުމަށްޓަކައި ކުރަންޖެހޭ ތައްޔާރީތައް ހުރުމާއެކު، އެކަންކަން ޢަމަލީގޮތުން ފެށުމާ ހަމައަށް ދާދި އަވަހަށް ދާނެކަމުގެ ޔަޤީންކަން ދެއްވިއެވެ.
ރައީސް މުޢިއްޒު ވަނީ ވިލިމާލޭ ހޮސްޕިޓަލުގެ މަޝްރޫޢަށް ހާއްސަ އަލިއަޅުއްވާލައްވާފައެވެ. އެމަނިކުފާނު ވިދާޅުވީ، ޗައިނާގެ ހިލޭ އެހީގެ ދަށުން 100 އެނދުގެ ޓަރޝަރީ ހޮސްޕިޓަލެއް ވިލިމާލޭގައި އެޅުމަށް ހުރިހާ ކަމެއް ހަމަޖެހިފައިވާ ކަމަށާއި، ފަންޑިންގގެ އެއްވެސް މައްސަލައެއް ނެތް ކަމަށެވެ. މި މަޝްރޫޢުގެ ހުރިހާ މަރުޙަލާތަކެއް ރަނގަޅަށް ކުރިއަށްދާކަންވެސް އެމަނިކުފާނު ފާހަގަކުރެއްވިއެވެ.
މި ބައްދަލުވުން ނިންމަވާލައްވަމުން ރައީސް މުޢިއްޒު ވިދާޅުވީ، ވެވަޑައިގެންނެވި ވަޢުދުތަކުގެ އިތުރުންވެސް ގިނަ ކަންތައްތަކެއް ކުރިއަށް ގެންދަވާނެ ކަމަށެވެ. އެމަނިކުފާނު ވަނީ ވިލިމާލޭ ރައްޔިތުންނަށް މިއޮތްހާ ދުވަހު ނުކުރެވި، އަދި ހާސިލުކޮށް ނުދެވި އޮތް ހުރިހާ ކަމެއް ފުރިހަމަކޮށްދެއްވައި، އިތުރަށްވެސް ކުރައްވާނެ ކަމަށް ވިދާޅުވެފައެވެ.
”އަޅުގަނޑު ބޭނުންވަނީ ވިލިމާލޭ ރައްޔިތުންނަށް މިއޮތްހާ ދުވަހު ނުކުރެވި، އަދި ހާސިލުކޮށް ނުދެވި، ސަރުކާރުތަކުން އޮތް ހުރިހާ ކަމެއް ފުރިހަމަކޮށްދޭން އަދި އިތުރަށްވެސް ކުރަން. މާލޭ ސިޓީގެ އެއްބައި، މާލޭ ސިޓީގެ ހުރިހާ ރައްޔިތުންނަށް އެއްވަރަކަށް ތަރައްޤީ އަންނަންޖެހޭނީ. ވިލިމާލެވީމާ އިހުމާލުކޮށްލެވިފައި، ނޫނީވިއްޔާ ތަފާތުކުރެވިފައި އޮންނަންޖެހޭނެ ކަމަކަށް އަޅުގަނޑު ގަބޫލެއް ނުކުރަން.“ ރައީސް ވިދާޅުވިއެވެ.
މާލޭ ސިޓީގެ އެއްބަޔެއްގެ ގޮތުން، ވިލިމާލެއަށްވެސް މާލޭގެ އެހެން ސަރަހައްދުތަކާ އެއްވަރަށް ތަރައްޤީ ގެނައުމަށް އެމަނިކުފާނު ވަނީ ބުރަ މަސައްކަތްޕުޅު ކުރައްވާނެ ކަމަށް ވިދާޅުވެފައެވެ. ވިލިމާލެއަކީ އިހުމާލުކޮށްލެވިފައި ނުވަތަ ތަފާތުކުރެވިފައި އޮންނަންޖެހޭ ތަނެއް ކަމަށް ގަބޫލުފުޅު ނުކުރައްވާ ކަމަށްވެސް އެމަނިކުފާނު ވިދާޅުވިއެވެ.
އަދި، މާލޭގެ މޭޔަރެއްގެ މަޤާމުގައި ހުންނެވި ދުވަސްވަރު ވެސް ވިލިމާލެއަށް ކުރެވެން އޮތް އެންމެ ރަނގަޅަށް މަސައްކަތް ކުރެއްވި ކަމަށާއި، މިހާރު ސަރުކާރުގެ ތެރެއިން މާ ފުރިހަމައަށް ކަންކަން ވާނެކަމުގެ ޔަޤީންކަން ވިލިމާލޭ ރައްޔިތުންނަށް ރައީސް ދެއްވިއެވެ.
