އައްޑޫ ސިޓީގެ އިންޓަނޭޝަނަލް މެޑިކަލް އެންޑް ޑައިގްނޯސްޓިކް ސެންޓަރު (އައިއެމްޑީސީ) ގައި ސިޒޭރިއަން ހެދި ދިވެހި އަންހެނަކު މިއަދު ނިޔާވެއްޖެއެވެ. މި ހާދިސާގައި ނިޔާވީ އައިޝަތު ނަޒާހަތު އަހުމަދު ދީދީ ކިޔާ ޒުވާނެކެވެ.
މި ހިތާމަވެރި ޙާދިސާއާ ގުޅިގެން ހޮސްޕިޓަލުން ވަނީ ފުން ހިތާމަ ފާޅުކޮށް، އެ އާއިލާއަށް ތައުޒިޔާ ކިޔާފައެވެ.
އައިއެމްޑީސީގެ ބެލުމުގެ ދަށުގައި އެޑްމިޓްކޮށްގެން ވިހެއުމުގެ ކަންތައްތައް ކުރިއަށް ގެންދިޔަ މާބަނޑު އަންހެނާ ވިހަން ޝެޑިއުލްވެފައި އޮތީ މިއަދު ހެނދުނުގެ ވަގުތެއްގައެވެ. ހޮސްޕިޓަލުން ބުނީ، މި ޙާދިސާ ހިނގުމާ ހަމައަށް އެ އަންހެންމީހާ ރަނގަޅު ސިއްޙަތެއްގައި ހުރި ކަމަށާއި، ފަރުވާދެއްވަމުން ގެންދެވި ޑޮކްޓަރުގެ ފަރުވާއާއި މެދުވެސް ހިތްހަމަޖެހި، މެޑިކަލް ޓީމާއެކު ދިޔައީ ކަންތައްތައް ހިއްސާކޮށް ވާހަކަ ދައްކަމުން ކަމަށެވެ.
ނަމަވެސް މިއަދު ފަތިހު ގާތްގަނޑަކަށް 4:39 ގައި ހަމަ ކުއްލިއަކަށް ބަލިމީހާގެ ސިއްޙީ ޙާލަތު ބަދަލުވުމާ ގުޅިގެން ވަގުތުން އިމަޖެންސީގައި ފަރުވާދޭން ފެށުނެވެ. މީގެ ކުރިން ބަލިމީހާގެ ފަރާތުން މިފަދަ ޙާލަތެއް ފެނިފައިނުވާ ކަމަށް ހޮސްޕިޓަލުން ފާހަގަކުރެއެވެ. އިމަޖެންސީ ހާލަތާ ގުޅިގެން އޮޕަރޭޝަން ތިއޭޓަރު ޓީމުގެ ފުރިހަމަ އެހީތެރިކަމާއެކު ކުއްލި އޮޕަރޭޝަނެއް ވަގުތުން ފެށި، ކުޑަ ދަރިފުޅު ވަނީ ރައްކާތެރިކަމާއެކު ދުނިޔެއަށް ގެނެސްފައެވެ.
އައިއެމްޑީސީން ބުނީ، ޑޮކްޓަރުންނާއި ނަރުހުންނާއި ކްލިނިކަލް ސްޓާފުން ވަރުބަލިކަމެއްނެތި މަސައްކަތްތައް ކުރި ނަމަވެސް، ކުއްލި ޞިއްޙީ ހާލަތާ ގުޅިގެން މައިމީހާގެ ފުރާނަ ސަލާމަތް ކުރެވިފައި ނުވާ ކަމަށެވެ.
މިއީ 2011 ވަނަ އަހަރު އައިއެމްޑީސީގައި އޮބްސްޓެޓްރިކްސް އެންޑް ގައިނަކޮލޮޖީގެ ޚިދުމަތްތައް ތަޢާރަފްކުރި ފަހުން މިފަދަ ހާދިސާއެއް ހިނގި ފުރަތަމަ ފަހަރު ކަމަށްވެސް އެ ހޮސްޕިޓަލުން ހާމަކުރެއެވެ. ހޮސްޕިޓަލުގެ ސްޕެޝަލިސްޓް ޓީމުން މި ކުއްލި ހާލަތުގައިވެސް އަވަހަށް، އެންމެ މަތީ ފެންވަރުގެ އަވަސް ފަރުވާއެއް ބަލިމީހާއަށް ދިނުމަށް މަސައްކަތް ކޮށްފައިވާނެ ކަމަށް ބުނެފައިވެއެވެ.
މި ހިތާމަވެރި ޙާދިސާއާ ގުޅިގެން އެ އާއިލާއަށް ދިމާވެފައިވާ ފުން ހިތާމައިގައި ބައިވެރިވެ، ނިޔާވި އަންހެންމީހާގެ ފުރާނައަށް ހެޔޮ ރަޙްމަތް ލެއްވުން އެދި އައިއެމްޑީސީން ވަނީ ދުޢާކޮށްފައެވެ.
އަދި މި މައްސަލަ ސިއްޙީ ވުޒާރާއާއި، ގުޅުންހުރި އެހެނިހެން ހުރިހާ އިދާރާތަކުން ބަލައި ދިރާސާކުރަމުންދާއިރު، އައިއެމްޑީސީން ފުރިހަމައަށް އެއްބާރުލުން ދެމުންދާނެ ކަމަށް ބުނެފައިވެއެވެ. މީގެ އިތުރުން އެ އާއިލާއަށް އެހީތެރިކަން ފޯރުކޮށްދެވެން އޮތް ހުރިހާ ކަމެއްގައިވެސް އެހީތެރިކަން ފޯރުކޮށްދެމުންދާނެ ކަމަށް ހޮސްޕިޓަލުން ބުނެއެވެ.
