ދިވެހިރާއްޖޭގެ އެންމެ ބޮޑު އިދިކޮޅު ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަންކަމުގެ އިންތިހާބުގައި ވާދަކުރައްވަން ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް ނިންމަވައި، މިރޭ އެކަން ރަސްމީކޮށް އިއުލާންކުރައްވައިފިއެވެ.
އެމްޑީޕީގެ ލީޑަޝިޕަށް އާ ޖީލެއް ގެނައުމުގެ މި މުހިންމު މަސައްކަތުގައި އެ ޕާޓީގެ އާންމު މެމްބަރުންގެ އެއްބާރުލުމަށާއި ތާއީދަށް އެދިވަޑައިގަންނަވާ ކަމަށް މީކާއީލް ވިދާޅުވި އެވެ.
އެމްޑީޕީގެ ޗެއާޕަސަންގެ މަގާމު ހުސްވީ، މިދިޔަ ހަތަރު އަހަރެއްހާ ދުވަހު އެ މަގާމު ފުރުއްވި ފައްޔާޒު އިސްމާއިލް މި މަހުގެ 23 ވަނަ ދުވަހު އިސްތިއުފާ ދެއްވުމުންނެވެ. ޕާޓީގެ ތެރޭގައި ހިޔާލު ތަފާތުވުންތައް ހައްލު ނުކުރެވުމަކީ ފައްޔާޒު އިސްތިއުފާ ދެއްވި އެއް ސަބަބެވެ. ޗެއާޕަސަންގެ އިންތިހާބު ބާއްވާނެ ތާރީހެއް އަދި ކަނޑައަޅާފައި ނުވެ އެވެ.
ޗެއާޕަސަންގެ މަގާމު ހުސްވުމާ ގުޅިގެން، އިންތިހާބު ބާއްވައި، އާ ޗެއާޕަސަނަކު އިންތިހާބު ކުރެވެންދެން ވަގުތީ ގޮތުން މަގާމު އަދާކުރާނެ ބޭފުޅަކު ކަނޑައެޅުމަށް އެމްޑީޕީގެ ގައުމީ މަޖިލިހުގެ ބައްދަލުވުމެއް ރޭގައި ބާއްވާފައިވެ އެވެ. ނަމަވެސް މި ބައްދަލުވުން ވަނީ ހޫނުވެ، އަރައިރުން ބޮޑުވެ، ނިޒާމު ގެއްލުމުން ވަކި ހިސާބަކުން ހުއްޓާލާފަ އެވެ.
ގައުމީ މަޖިލިހުގެ ރޭގެ ބައްދަލުވުމުގައި ވަގުތީ ޗެއާޕަސަންގެ މަގާމަށް ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދުގެ ނަން ހުށަހަޅައި، ވޯޓަށް އެހި އެވެ. މި ބައްދަލުވުމުގައި ޖުމުލަ 95 މެމްބަރުން ބައިވެރިވެވަޑައިގެންނެވި އިރު، ވަހީދަށް ލިބިވަޑައިގަތީ 47 ވޯޓެވެ. ޗެއާޕަސަންގެ މަގާމަށް ބޭފުޅަކު ކަނޑައެޅުމަށް 48 ވޯޓު ބޭނުންވާއިރު، ވަހީދަށް 47 ވޯޓު ލިބި، ނުފެންނަ ކަމަށް 48 މެމްބަރު ވޯޓު ދެއްވުމާ ހިސާބުން ޒުވާބު ހޫނުވެ، ނިޒާމު ގެއްލި ބައްދަލުވުން ނިންމާލަން ޖެހުނެވެ. އެހެންކަމުން ވަގުތީ ޗެއާޕަސަނަކު ރޭގައި އިންތިހާބު ކުރެވިފައެއް ނުވެ އެވެ.
ވަގުތީ ޗެއާޕަސަންގެ މަގާމަށް އަބްދުﷲ ވަހީދުގެ ނަން ހުށަހެޅުނީ ކުރީގެ ރައީސް މުހައްމަދު ނަޝީދުގެ ފަރާތްޕުޅުންނެވެ. ވަހީދުގެ އިތުރުން ޗެއާޕަސަންގެ މަގާމަށް އައްޑޫ ހިތަދޫ އުތުރު ދާއިރާގެ ކުރީގެ މެމްބަރު މުހައްމަދު އަސްލަމާއި ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ (ގަޕޯ) ގެ ނަން ވެސް ގައުމީ މަޖިލިހުގެ މެމްބަރުންގެ މެދުގައި ދެކެވުނެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ފެކްޝަނުން އަސްލަމާއި ގަޕޯގެ ނަމަށް ވޯޓަށް އެހުމަށް މަސައްކަތްކުރި އެވެ. އެހެން ނަމަވެސް އަސްލަމަކީ ގައުމީ މަޖިލިހުގެ މެމްބަރަކަށް ނުވާއިރު، އޭނާ އަށް ޗެއާޕަސަންގެ މަގާމު ފުރުއްވިދާނެތޯ ބައެއް މެމްބަރުން ސުވާލު އުފެއްދުމުން، ރިޔާސަތުން ނިންމީ އަސްލަމްގެ ނަމަށް ވޯޓަށް ނޭހުމަށެވެ.
ފައްޔާޒު އިސްތިއުފާ ދެއްވުމާ ގުޅިގެން ޗެއާޕަސަންގެ މަގާމު ވަގުތީ ގޮތުން ކުރައްވާނެ ބޭފުޅަކު ކަނޑައެޅުމުގެ މަސައްކަތް ގައުމީ މަޖިލިހަށް ދޫކޮށްލަން އެމްޑީޕީގެ ގައުމީ ހިންގާ ކޮމިޓީން ދާދި ފަހުން ވަނީ ނިންމާފަ އެވެ.
