ގުމަތީގެ އެކްސިޑެންޓްތަކުގައި އަނިޔާލިބުނު ފަރާތްތަކަށް ބަދަލުގެ ގޮތުގައި މި އަހަރުގެ މިހާތަނަށް 4437257.87 ރުފިޔާ ފުލުހުން މެދުވެރިވެގެން ނަގައިދީފައިވާ ކަމަށާއި މިކަން ކޮށްފައިވަނީ އެކްސިޑެންޓުގައި ހިމެނޭ ފަރާތްތައް ހާޒިރުކޮށް ވާހަކަދައްކައި އެއްބަސްވެ އަދި ގާނޫނާއި ގަވާއިދުތަކާއި އުސޫލުތަކުގެ ތެރެއިން ކަމަށް ރޯޑް ސޭފްޓީ އެވެއާނަސް އެންޑް ޕްރިވެންޝަން ހެޑް، ސުޕްރިންޓެންޑެންޓް އޮފް ޕޮލިސް އަޙްމަދު ފަޞީހް ވިދާޅުވެއްޖެއެވެ. އަޙްމަދު ފަޞީހް މިފަދައިން ވިދާޅުވީ މާލެ ޕޮލިސްގައި ހިމެނޭ ބަހާތަކުން ކުރަމުންދާ މަސައްކަތްތަކާއި އައު އަހަރާ ގުޅިގެން ކުރިއަށް ގެންދިއުމަށް ހަމަޖެހިފައިވާ މަސައްކަތްތަކާ ގުޅޭގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ.
އިސްކަންދަރު ބިލްޑިންގގައި ބޭއްވި މި ބައްދަލުވުމުގައި މައުލޫމާތު ދެއްވަމުން ސުޕްރިންޓެންޑެންޓް އޮފް ޕޮލިސް އަޙްމަދު ފަޞީހް އިތުރަށް ވިދާޅުވީ މާލެ އަދި ބުރިޖް ހައިވޭ ހިމެނޭހެން މި އަހަރުގެ މިހާތަނަށް 2217 މައްސަލައެއް ހުށަހެޅި މިހާތަނަށް 2327 މައްސަލަ ނިންމާފައިވާކަމަށެވެ. މީގެ ތެރެއިން ބުރިޖު އަދި ހައިވޭގައި ހިނގި އެކުސިޑެންޓް މައްސަލަތަކުގެ އަދަދަކީ 355 ކަމަށާއި ނިންމުނު މައްސަލަތަކުގެ ތެރެއިން، އަނިޔާ ލިބުނު ފަރާތްތަކަށް ބަދަލުގެ ގޮތުގައި 4437257.87 ރުފިޔާ ޓްރެފިކް ފުލުހުން މެދުވެރިވެގެން ނަގާދެވިފައިވާ ކަމަށާ މިއީ ފާއިތުވެ ދިޔަ އަހަރާ އަޅައިބަލާއިރު %76.09 ގެ އިތުރުވުމެއް ކަމަށެވެ. އަދި ހުށަހެޅިފައިވާ މައްސަލަތަކުގެ ތެރެއިން 270 މައްސަލައެއްގައި އިންޝުއަރެންސް ރިޕޯޓު ދޫކުރެވިފައިވާ ކަމަށް ވެސް ވިދާޅުވިއެވެ.
އޭގެ އިތުރުން، މާލެއާއި ބުރިޖު އަދި ހައިވޭ ހިމެނޭހެން މަގުމަތީގެ ސަލާމަތާއި ރައްކާތެރިކަން ކަށަވަރުކޮށް މާލޭގެ މަގުތަކަކީ އެންމެނަށް އަމާން ރައްކާތެރި ތަނަކަށް ހެދުމަށްޓަކައި ޓްރެފިކް ފުލުހުންގެ މަސައްކަތްތައް ތަރުތީބު ކުރެވިފައިވާގޮތުން ބުރިޖު އަދި ހައިވޭގައި ރައްޔިތުންނަށް ސަލާމަތާއި ރައްކާތެރިކަން ގާއިމުކޮށްދީ ރައްޔިތުންނަށް ފަސޭހަކޮށް ދިނުމަށްޓަކައި ޑިއުޓީކުރުމާއި ލައިޓް ގާއިމުކުރެވިފައިވާ 2 ސަރަހައްދުގައި ގިނަ ބަޔަކަށް ފަސޭހަ ކުރުމަށް ލައިޓް މެނޫވަލްކޮށް ކުރިއަށްގެންދިއުމުގެ މަސައްކަތް ކޮންމެ ދުވަހަކު ވެސް ކުރަމުންގެންދާ ކަމަށް ވިދާޅުވިއެވެ. ހަމަ އެއާއެކު ދަރިވަރުންގެ ސަލާމާތާއި ރައްކާތެރިކަން ކަށަވަރުކުރުމަށްޓަކައި މާލޭގެ 20 ސްކޫލުގައި ދުވާލަކު 141 ފަހަރު ޓްރެފިކު ފުލުހުން ޑިއުޓީ ގާއިމުކޮށް މަގަށް އެ ވަގުތަކަށް ގެންނަންޖެހުނު ކޮންމެ ބަދަލެއް ގެނެސް މަގުމަތި ބޭނުންކުރާ އެންމެހައި ފަރާތްތަކަށް ހާއްސަކޮށް ކުޑަކުދިންނަށް ރައްކާތެރި މާހައުލެއް ގާއިމުކުރުމުގެ މަސައްކަތް ކުރަމުންގެންދާ ކަމަށެވެ.
އަދި ގިނަ ބަޔަކަށް އެކިވަރުގެ ތަކުލީފު އުފުލަންޖެހިފައިވާ މާލޭގެ ޕާކިން މައްސަލައަށް ތަސައްލީއެއް ހޯދައިދިނުމަށް ކުރަމުންގެންދާ މަސައްކަތްތަކުގެ ތެރެއިން، ބައުވެ ހަލާކުވެ މާލޭގެ މަގުތަކަށް ދޫކޮށްލާފައިވާ 801 އުޅަނދު މި އަހަރު ތެރޭގައި ނަގައި އިޖުރާއަތްތައް ފުރިހަމަކުރުމަށްފަހު ނައްތާލާފައިވާކަމަށް ވިދާޅުވިއެވެ. އަދި މާލޭގެ ހޮސްޕިޓަލުތަކާއި ހާއްސަ އެހީއަށް ބޭނުންވާ ފަރާތްތަކަށް ހާއްސަ ކުރެވިފައިވާ ރޭންޕުތަކުގެ މަތީގައި ޕާކުކޮށްފައި ހުންނަ އުޅަނދުތަކާއި މިސްކިތްތަކާއި ދަރިވަރުން ސްކޫލަށް ވަދެ ނުކުތުމަށް ދަތިވާގޮތަށް ޕާކުކޮށްފައި ހުންނަ އުޅަދުތަކުގެ އިތުރުން ކަފިހިހުރަސް މަތީގައި ޕާކުކޮށްފައި ހުންނަ އުޅަދުތައް ނެގުމުގެ މަސައްކަތް ކޮންމެ ދުވަހަކު ވެސް ކުރަމުންގެންދާކަމަށާ މިގޮތުން މި އަހަރު މިހާތަނަށް 7442 އުޅަނދު ނަގާފައިވާކަމަށެވެ. މީގެ ތެރެއިން، ގާނޫގައި ބަޔާންކޮށްފައިވާ މުއްދަތުގެ ތެރޭގައި ވެރިފަރާތުން ހަވާލުވާން ނައުމުގެ ސަބަބުން، ދެފޮރުޅުލީ 899 އުޅަނދާއި، ހަތަރުފުރޮޅުލީ 106 އުޅަނދު އިޖުރާއަތްތައް ފުރިހަމަކުރުމަށްފަހު ނައްތާލާފައިވާ ކަމަށް ވިދާޅުވިއެވެ.
ހަމައެހެންމެ، އެކްސިޑެންޓްތަކުގެ ތެރޭގައި ނުރައްކާތެރި 97 އެކްސިޑެންޓް ފާހަގަ ކުރެވިފައިވާ ކަމަށާއި
މާލޭގެ މަގުތަކަކީ އަމާން ރައްކާތެރި ތަނަކަށް ހެދުމަށް ފުލުހުން ކުރަމުންދާ މަސައްކަތުގެ ތެރެއިން، ނުރައްކާތެރިކޮށް ނުވަތަ ފަރުވާކުޑަކޮށް އުޅަނދު ދުއްވުމުގެ ކުށުގައި 156 މީހުންނާ މެދު ފިޔަވަޅުއަޅައި އަދި 30 ދުވަހުގެ މުއްދަތަށް އުޅަނދު ފުލުހުންގެ ބެލުމުގެ ދަށަށް ގެނެވިފައިވާކަމަށް ވިދާޅުވިއެވެ. އަދި ފުލުހުންގެ ބެލުމުގެ ދަށަށް ގެނެވޭ އެއްގަމު އުޅަނދާ ބެހޭ ގަވާއިދަށް ގެނެވުނު 2 ވަނަ އިސްލާހު ތަންފިޒުކުރަން ފެށުމާއެކު، ލައިސަންސް ނެތި އެއްގަމު އުޅަނދު ދުއްވުން މަދުވެފައިވާކަން ފާހަގަކުރައްވަމުން ވިދާޅުވީ، 2024 ވަނަ އަހަރު ދެ ފުރޮޅުލީ 3079 އުޅަނދާއި، ހަތަރު ފުރޮޅުލީ 133 އުޅަނދު ފުލުހުންގެ ބެލުމުގެ ދަށުގައި ހިފެހެއްޓިފައިވީ ނަމަވެސް މި އަހަރު ހިފެހެއްޓިފައިވަނީ ދެ ފުރޮޅުލީ 2737 އުޅަނދާއި، ހަތަރު ފުރޮޅުލީ 208 އުޅަނދު ކަމަށެވެ.
ނޫސްވެރިންގެ ސުވާލުތަކަށް ޖަވާބުދިނުމާއެކު ކުރިއަށް ގެންދިޔަ މި ބައްދަލުވުުގައި ސުޕްރިންޓެންޑެންޓް އޮފް ޕޮލިސް އަޙްމަދު ފަޞީހް އިތުރަށް ވިދާޅުވީ، މަގުމަތީގެ ސަލާމަތާއި ރައްކާތެރިކަން ދަމަހައްޓައި ނަގަހައްޓާނެ އައު ޖީލެއް ބިނާކުުރުމަށް މިނިސްޓްރީ އޮފް އެޑިއުކޭޝަނާ ގުޅިގެން މި އަހަރުގެ މިހާތަނަށް 17 ސްކޫލެއްގައި 549 ދަރިވަރުން ތަމްރީނުކުރެވި މި 17 ސްކޫލްގެ ހުރިހާ ދަރިވަރުންނާއި ބެލެނިވެރިން އަދި މުދައްރިސުން ހިމެނޭގޮތަށް، މަގުމަތީގެ ސަލާމަތާއި ރައްކާތެރިކަމާ ގުޅުންހުރި މައުލޫމާތު ހިއްސާކުރެވިފައިވާކަމަށާ އަދި އާއްމުކޮށް ވެހިކަލް ދުއްވާ ފަރާތްތަކަށް އަމާޒުކޮށްގެން ހިންގުނު 10 ތަމްރީނު ޕްރޮގްރާމްގެ ތެރެއިން މަގުމަތީގެ ސަލާމަތާއި ރައްކާތެރިކަމާ ގުޅުންހުރި ކަންކަމަށް ހޭލުންތެރިކުރުވުމަށް 1070 މީހަކަށް މައުލޫމާތު ދީފައިވާ ކަމަށެވެ. އަދި މަގު ބޭނުންކުރާ ފަރާތްތަކަށް ހާއްސަ މެސެޖުތައް ދިނުމާއި މައުލޫމާތު ފޯރުކޮށް ދިނުމުގެ ހަރަކާތްތައް ވެސް މާލެއާއި އަތޮޅު ތެރޭގައި ކުރިއަށް ގެންގޮސްފައިވާ ކަމަށާއި ރައްކާ ރޯޑް ޝޯވ ށ. އަތޮޅާއި. ގއ. އަތޮޅުގައި ގިނަ ހަރަކާތްތަކަކާއެކު ކުރިއަށް ގެންދެވި ގިނަ ބަޔަކު މަގުމަތީގެ ސަލާމަތާއި ރައްކާތެރިކަމަށް އަހުލުވެރިކުރެވިފައިވާ ކަމަށެވެ. އަދި މަގުމަތީގެ ސަލާމަތާއި ރައްކާތެރިކަމަށް އަހުލުވެރިކުރުވުމަށް މީސްމީޑިއާގެ ވަސީލަތްތައް މެދުވެރިކޮށް ކޮށްފައިވާ ޕޯސްޓުތަކަށް ތިން މިލިއަނަށްވުރެ ގިނަ ވިއުސް ލިބިފައިވާކަން ފާހަގަ ކުރެއްވިއެވެ.
