ރާއްޖޭގެ އެކި ކަންކޮޅުތަކުގައި ސަރުކާރުން ފަށާފައިވާ ތަރައްގީގެ މަޝްރޫއުތައް ހުއްޓިފައިވަނީ ރަށްރަށުގެ ކައުންސިލްތަކުގައި އެމްޑީޕީގެ މެޖޯރިޓީ އޮތުމުން ނޫން ކަމަށާއި، އެއީ ސަރުކާރުގެ ތެރެއިން އިންތިޒާމުތައް ހަމަނުޖެހިގެން ދިމާވާ ކަމެއް ކަމަށް އިދިކޮޅު އެމްޑީޕީން ބުނެފިއެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން، އެ ޕާޓީގެ ލޯކަލް ކައުންސިލް އިންތިހާބުގެ ކެމްޕެއިން ޑެޕިއުޓީ މެނޭޖަރު އަދި ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު ވިދާޅުވީ، އަންނަ އޭޕްރީލް މަހު ބޭއްވުމަށް ހަމަޖެހިފައިވާ އިންތިހާބުގެ ކެމްޕެއިންގައި ސަރުކާރުން ރައްޔިތުންނަށް އޮޅުވާލަމުންދާ ކަމަށެވެ. އެގޮތުން މަޝްރޫއުތައް ހުއްޓެނީ އެމްޑީޕީ ކައުންސިލްތަކުން ހުރަސްއަޅާތީ ކަމަށް ބުނެ ދައްކާ ވާހަކަތަކީ ހަގީގަތާ ހިލާފު ވާހަކަތަކެއް ކަމަށް އޭނާ ވިދާޅުވިއެވެ.
”މަޝްރޫއުތައް ހުއްޓިގެން މިއުޅެނީ މަޝްރޫއުތައް ހިންގުމުގެ ގާބިލުކަން ނުވަތަ އެކަމަށް ބޭނުންވާ ފައިސާއާއި އިންތިޒާމުތައް ސަރުކާރުގެ ތެރެއިން އެކުލަވާނުލެވިގެން ނުވަތަ ހަމަނުޖެހިގެން،“ ނިޔާޒު ވިދާޅުވިއެވެ.
ނިޔާޒު އިތުރަށް ފާހަގަކުރެއްވި ގޮތުގައި، ކައުންސިލްތަކުން ބިން ހަވާލުނުކުރާތީ މަޝްރޫއުތައް ކުރިއަށް ނުދާ ކަމަށް ސަރުކާރުން ބުނާއިރު، ބިން ހަމަނުޖެހެނީސް މަޝްރޫއެއްގެ ބިންގާ އެޅޭނެ ގޮތެއް ނޯންނާނެއެވެ. އޭނާ ތުހުމަތު ކުރެއްވި ގޮތުގައި މިއީ ކައުންސިލްތަކުގެ އަގުވައްޓާލައި، ކައުންސިލްތަކަކީ ރައީސް އޮފީހުން އަންގާ އެންގުންތައް އެކަނި ތަންފީޒުކުރާ ތަނަކަށް ހެދުމަށް ސަރުކާރުން ހިންގާ އަމަލެކެވެ.
މީގެ އިތުރުން، މި ބައްދަލުވުމުގައި ވާހަކަދައްކަވަމުން އެމްޑީޕީގެ ގައުމީ މަޖިލީހުގެ ވިލިނގިލި ދާއިރާގެ މެންބަރު ހުސައިން ހަސަން ވަނީ އިލެކްޝަންސް ކޮމިޝަން (އީސީ) އަށް ބޮޑެތި ތުހުމަތުތަކެއް ކުރައްވާފައެވެ. އޭނާ ވިދާޅުވީ، އީސީގެ ޕޯޓަލް މެދުވެރިކޮށް އަމިއްލަ ކެނޑިޑޭޓުންނަށް ތާއީދުކުރާ މީހުންގެ މައުލޫމާތު ވަގުތުން ވެރިކަން ކުރާ ޕީއެންސީއަށް ލިބޭ ކަމުގެ ޝަކުވާ ލިބެމުންދާ ކަމަށެވެ.
”އޭގެ މާނައަކީ އެބޭފުޅުންގެ ޕޯޓަލްއަށް، އިލެކްޝަން ކޮމިޝަނުގެ މި ޕޯޓަލްއަށް އެކްސެސް އެބައޮތޭ ޕީއެންސީއަށް،“ ހުސައިން ވިދާޅުވިއެވެ.
ހުސައިން އިތުރަށް ތުހުމަތު ކުރެއްވި ގޮތުގައި، ރައީސް އޮފީހުގައި ސިއްރު ބައްދަލުވުންތަކެއް ބާއްވައިގެން އިންތިހާބު އޮޅުވާލުމަށް އީސީން މަސައްކަތް ކުރަމުންދާ ކަމަށާއި، މި ހުރިހާ ކަމަކީ އިންތިހާބަށް ނުފޫޒު ފޯރުވުމަށް ސަރުކާރުން ހިންގާ އަމަލުތަކެއް ކަމަށެވެ.
