މޯލްޑިވްސް ސްޕޯޓްސް އެވޯޑުގެ ސްޕެޝަލް ރިކޮގްނިޝަން އެވޯޑް، ކުޅިވަރު ނޫސްވެރިޔާ ސާއިދު އަހުމަދަށް ލިބިއްޖެއެވެ.
ޒުވާނުންގެ މަރުކަޒުގައި ރޭ ބޭއްވި މޯލްޑިވްސް ސްޕޯޓްސް އެވޯޑް 2025 ހަފްލާގައި ސާއިދުމަށް މި އެވޯޑް ހަވާލުކޮށްދެއްވީ ކުޅިވަރާއި ބެހޭ ވަޒީރު ޢަބްދުﷲ ރާފިއުއެވެ.
ސާއިދުގެ ނޫސްވެރިކަމުގެ ހަޔާތުގައި އޭނާ އަންނަނީ 2009 ވަނަ އަހަރުން ފެށިގެން ކުޅިވަރުގެ ދާއިރާގެ ހަބަރުތައް އާއްމުންނާ ހަމަޔަށް ގެނެސްދެމުންނެވެ. ކުޅިވަރު ނޫސްވެރިއެއްގެ އިތުރުން ސާއިދަކީ ކުޅަދާނަ ކޮމަންޓޭޓަރެކެވެ.
މިފަހަރުގެ ސްޕޯޓްސް އެވޯޑްގައި ސާއިދުއަށް ސްޕެޝަލް ރިކގްނިޝަން އެވޯޑް ލިބިފައިވަނީ، ކުރިމަތިވި ބަލިހާލަތާއެކުވެސް ކުޅިވަރަށް ހިދުމަތްކުރުމުގައި ދެމިހުރީތީއެވެ.
ސާއިދުގެ ދެ ކިޑްނީ ފެއިލްވެ ޤަވައިދުން ޑައިލިސިސް ހަދަން ޖެހުނު ނަމަވެސް އޭނާ އަންނަނީ، ކުރިއެކޭ އެއްގޮތަށް ކުޅިވަރުގެ ހަބަރުތައް އާއްމުނަށް ގެނެސްދިނުމަށް ވަރުބަލިކަމެއްނެތި މަސައްކަތްކުރަމުންނެވެ.
ކުޅިވަރު ހަބަރުތައް ގެނެސްދިނުމުގައި 16 އަހަރު ހޭދަކޮށްފައިވާ ސާއިދު ވަނީ ރާއްޖެ އާއި ރާއްޖެއިން ބޭރުގައި ބޭއްވުނު ގިަނ މުބާރާތްތަކެއްގެ ހަބަރުތައް ކަވަރުކޮށްދީފައެވެ.
ސާއިދު ވަނީ މީގެ ކުރިން ސަން އެފްއެމްގައިވެސް މަސައްކަތްކޮށްފައެވެ. އޭނާ މިހާރު މަސައްކަތް ކުރަނީ ޕަބްލިކް ސާވިސް މީޑިއާގެ ޕީއެސްއެމް ސްޕޯޓްސްގެ ޒިންމާދާރު އެއް ވެރިޔާއެވެ.
