އަންނަ އޭޕްރީލް މަހުގެ 4 ވަނަދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގައި ވޯޓުލުމަށް ރަޖިސްޓްރީކޮށްފައިވާ ފޮށިތަކުގެ ލިސްޓް އިލެކްޝަންސް ކޮމިޝަނުން އާންމުކޮށް، އެ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލައިފިއެވެ.
އިލެކްސަންސް ކޮމިޝަނުން ހާމަކުރެއްވިގޮތުގައި އެޕްރީލް 4 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓު 2026 ގައި ވޯޓުލާން ރަޖިސްޓަރީކޮށްފައިވާ ފޮށީގެ މަޢުލޫމާތު ހިމެނޭ ރަޖިސްޓަރީ ޢާންމުކޮށް، ޝަކުވާ ހުށަހެޅުމުގެ ފުރުޞަތު މިއަދު ހެނދުނު 10:00 އިން ފެށިގެން މާދަމާ މެންދުރުފަހު 1:30 ގެ ނިޔަލަށް ވަނީ ހުޅުވާލައިފައެވެ.
ވޯޓުލާން ރަޖިސްޓްރީކޮށްފައިވާ ފޮށީގެ މަޢުލޫމާތު އިލެކްޝަންސް ކޮމިޝަނުގެ ވެބްސައިޓް މެދުވެރިކޮށް ބެލޭނެއެވެ. މީގެ އިތުރުން، ފޯނުގެ މެސެޖް މެދުވެރިކޮށްވެސް މި މަޢުލޫމާތު ސާފުކުރެވޭނެއެވެ. އެގޮތުން ވީ.އާރު (ޖާގައެއް) އައިޑީކާޑު ނަންބަރު ޖެހުމަށްފަހު 1414 އަށް އެސްއެމްއެސް ކުރުމުން ރަޖިސްޓްރީވެފައިވާ ފޮށީގެ މަޢުލޫމާތު ލިބޭނެއެވެ. ޝަކުވާ ހުށަހަޅަން ބޭނުންވާ ފަރާތްތަކަށް ކޮމިޝަނުގެ އޮންލައިން ރަޖިސްޓަރީ ޕޯޓަލް މެދުވެރިކޮށް އެ ފުރުސަތު ވަނީ ފަހިކޮށްދީފައެވެ.
