އައްޑޫސިޓީ ފޭދޫ ބަނދަރު ބޭރުގައި އަޅައިފައި އޮތް ޑައިވިން ދޯންޏެއްގައި ރޯވެގެން އެމްއެންޑީއެފުން ހަރަކާތްތެރިވާން ފަށްޓަވައިފިއެވެ.
އެމްއެންޑީއެފުން ވިދާޅުވީ ފޭދޫ ބަނދަރު ބޭރުގައި އަޅައިފައި އޮތް ޑައިވިން ދޯންޏެއްގައި އަލިފާން ރޯވެގެން ސަދަން އޭރިއާ ކޮމާންޑް ފަޔާ ސްޓޭޝަނުން ހަރަކާތްތެރިވަމުން ގެންދަވާކަމުގައެވެ.
ސޯޝަލް މީޑިއާގައި ދައުރުވަމުން ދާ މި ހާދިސާގެ ވީޑިއޯ އިން ފެންނަގޮތުގައި އެ ދޯނީގައި ވަނީ ވަރަށް ބޮޑަށް އަލިފާން ހިފާފައެވެ. އަދި އެދޯނި ކައިރީގައި ސަފާރީއަކާއި އިތުރު ލޯންޗުފަހަރުވެސް ޙަރަކާތްތެރިވަމުންދާ މަންޒަރު ވޑީއޯއިން ފެނެއެވެ.
މިހާދިސާ ހިނގި އިރު ޑައިވިން ދޯނީގައި ބަޔަކު ތިބިކަމެއް ނުވަތަ ނޫންކަމެއް އަދި އެއްވެސް މީހަކަށް އަނިޔާއެއް ލިބުނުކަމެއް އަދި މިހާތަނަށް ވަނީ ސާފުވާގޮތް ނުވެފައެވެ.
އެންއެންޑީއެފުން ވިދާޅުވީ މިހާދިސާގެ މަޢުލޫމާތު ލިބުނުވަރަކުން ޙިއްޞާ ކުރައްވާނެ ކަމުގައެވެ.
