އެމްބިއުލާންސަށް ހާއްސަ ވަކި މުވައްސަސާއެއް އުފެއްދުމުގެ މަސައްކަތް ކުރަމުންދާކަމަށް ހެލްތު މިނިސްޓަރު އަހްމަދު ނަސީމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ހިއުމަން ރައިޓްސް ކޮމިޓީގެ މިއަދުގެ ބައްދަލުވުމުގައި ޖަވާބުދާރީވެވަޑައިގަންނަވަމުން މިނިސްޓަރު ނަސީމް ވިދާޅުވީ ރާއްޖޭގައި އެމްބިއުލާންސްއަށް ހާއްސަ ވަކި މުވައްސަސާއެއް އޮންނަން ޖެހޭކަމަށެވެ. އެހެންކަމުން އެފަދަ މުވައްސަސާއެއް އުފައްދަން މިހާރު މަސައްކަތް ކުރަމުންދާކަމަށާއި އެކަމާއި ބެހޭ ގޮތުން ފިނޭންސް މިނިސްޓްރީ އާއި އެވާހަކަތައް ހިއްސާކޮށްފައިވާނެކަމަށް މިނިސްޓަރ ވިދާޅުވިއެވެ.
ހެލްތު މިނިސްޓަރ އިތުރަށް ވިދާޅުވި ގޮތުގައި ފިނޭންސް މިނިސްޓަރ ވެސް ވަނީ މިކަމަށް އެއްބަސްވެ ވަޑައިގެންފައެވެ. އަދި އެމްބިއުލާންސްގެ ކަންތައްތަކަކީ ހެލްތު މިނިސްޓްރީން ކުރަން ޖެހޭ ކަމެއް ނޫން ކަމަށާއި އެކަމަށް ވަކި ހާއްސަ ޔުނިޓެއް ރާއްޖޭގައިވެސް އޮންނަން ޖެހޭނެ ކަމަށް މިނިސްޓަރ ފާހަގަކުރެއްވިއެވވެ.
”ފިނޭންސް މިނިސްޓަރުވެސް އަޅުގަނޑާއި މުޅިން އެއްބަސްވެ ވަޑައިގެންނެވި އެކަން ކުރަން ޖެހޭ ކަމަށް، އެހެންވީމަ އެކަމާއި ދޭތެރޭ އަޅުގަނޑުމެން މަސައްކަތް ކުރަމުން މި ގެންދަނީ“.
މާލެ ސަރަހައްދުގައި އެމްބިއުލާންސް ދިނުމަށް މިހާރު ވަނީ އިމާޖެންސީ މެޑިކަލް ސަރވިސްއެއް ތައާރަފްކޮށްފައެވެ. 100 ނަމްބަރަށް ގުޅާލުމުން މާލެ ސަރަހައްދުން އެމްބިއުލާންސްގެ ޚިދުމަތް ލިބިގެންދާނެއެވެ.
