ހއ.ދިއްދޫ އިން ކޮވިޑް-19 އަށް ޕޮޒިޓިވްވި މީހުންގެ އަދަދު 45 އަށް އަރައިފިއެވެ. ދިއްދޫން އިއްޔެ އެނިވެސް 22 މީހަކު ވަނީ ކޮވިޑް-19 އަށް ޕޮޒިޓިވް ވެފައެވެ.
ދިއްދޫން އިއްޔެ މިބައްޔަށް ޕޮޒިޓިވްވި 22 މީހުންގެ ތެރޭގައި ހިމެނެނީ ބަލީގެ އަލާމާތްތައް ހުރެގެން ފްލޫ ކްލިނިކަށް ދެއްކި 10 މީހަކާއި، ޑައިރެކްޓް ކޮންޓެކްޓްގެ ގޮތުގައި ފާހަގަކުރެވުނު މީހުންގެ ތެރެއިން ޕޮޒިޓިވްވި 11 މީހުންނެވެ. މީގެ އިތުރުން ދިއްދޫން ނެގުނު ރެންޑަމް ސާމްޕަލްތަކުގެ ތެރެއިން އެކަކު ވަނީ ކޮވިޑަށް ޕޮޒިޓިވް ވެފައެވެ.
ޖޫން މަހުގެ 24 ވަނަ ދުވަހު ދިއްދޫ ފުލޫ ކުލިނިކަށް ދެއްކި މީހަކު ޕޮޒިޓިވް ވުމާއި ގުޅިގެން އެރަށް ވަނީ ފުރަބަންދުގައެވެ. ދިއްދޫ ފުރަބަންދު ކޮށްފައިވާއިރު އަނެއްކާވެސް ދިއްދޫގެ ޙާލަތު މިވަނީ ގޯސް ވާން ފަށައިފައެވެ.
މި ހިނގާ ޖޫން މަހުގެ 25 ވަނަ ދުވަހު ހއ. އަތޮޅު ހޮސްޕިޓަލުގައި ނިޔާވި މީހަކު ވަނީ ކޮވިޑް19 އަށް ޕޮޒިޓިވް ވެފައެވެ. އެއާއި އެކު މި ބަލީގައި ދިއްދޫން ނިޔާވި މީހުންގެ އަދަދު މިވަނީ 2 އަކަށް އަރާފަ އެވެ.
ދިއްދޫ ހޮސްޕިޓަލުން ހުއްޓުމެއް ނެތި ކޮންޓެކްޓް ޓްރޭސިންގެ މަސައްކަތްތައް ކުރިއަށް ގެންދާއިރު ދިއްދޫގެ ގިނަ ގެތަކެއްގައި އެތައް ބަޔަކު ވަނީ ކަރަންޓީނު ކުރެވިފައެވެ.
ކޮންޓެކްޓް ޓްރޭސިންގ ޓީމުން މިހައިތަނަށް ޖުމްލަ 420ސާމްޕަލް ނަގާފައިވާއިރު ނަތީޖާ ނުލިބޭ 69 ސާމްޕަލް ހިމެނެއެވެ.
ދުނިޔޭގައި ކަންކޮޅުތަކުގައި ފެތުރެމުންމިދާ ނުރައްކައުތެރި ކޮވިޑް-19ގެ ޙާލަތު ރާއްޖޭގައި މިއަށްވުރެ ގޯސްވެ، އެތައް ބަޔަކު ނުރައްކަލުގެ ތެރެއަށް ވެއްޓުމުގެ ކުރިން ހުރިހައި ފަރާތްތަކުން އާ ހިއްރާއި އަޒުމާއި އެކު ގުޅިގެން ކަމާބެހޭ މާހިރުންނާއި ޞިއްހީ ޚިދުމަތްތެރިން ދެއްވާ ރަނގަޅު އިރުޝާދުތަކަށް ބޯލަނބައި ކިޔަމަންވުމަކީ މި ނުރައްކައުތެރި ބަލިމަޑުކަމުން ސަލާމަތްވުމަށް ކުރެވިދާނެ ވަރަށް މުހިއްމު ކަމެއްކަން މި ފުރުޞަތުގައި ހަނދުމަފުޅުކޮށް އަރުވަމެވެ.
