ފައްސިވާ މީހުންގެ ޢަދަދު މަދުމަދުން އިތުރުވެ މިއަދު ރާއްޖެއިން ކޮވިޑް19 އަށް ފައްސިވީ 91 މީހުންނެވެ.
ހެލްތު ޕްރޮޓެކްޝަން އެޖެންސީ (އެޗް.ޕީ.އޭ) އިން މިރޭ އާންމުކުރި ތަފާސް ހިސާބުތަކުން ދައްކާ ގޮތުގައި، ފާއިތުވި 24 ގަޑިއިރުތެރޭގައި ޖުމްލަ 7،999 ސާމްޕަލް ވަނީ ނަގާފައެވެ. އޭގެތެރެއިން މާލެއިން ފައްސިވެފައި ވަނީ 23 މީހުންނެވެ. އަދި މީހުން ދިރިއުޅޭ ރަށްރަށުން 61 މީހުން ފައްސިވެފައިވެއެވެ. މީގެ އިތުރުން ރާއްޖޭގައި މިހާރު ހިންގާ ރިސޯޓުތަކުން ވެސް 7 މީހުން ވަނީ ފައްސިވެފައެވެ.
އެޗް.ޕީ.އޭގެ ތަފާސް ހިސާބުތަކަށް އިތުރަށް ބަލާލާއިރު ރާއްޖޭގައި މިހާރު ކޮވިޑް19 އަށް ފައްސިވެ 2،497 މީހުން ދަނީ ފަރުވާ ކުރަމުންނެވެ. އޭގެތެރެއިން 15 މީހުންނަށް ފަރުވާ ދެމުންދަނީ ހޮސްޕިޓަލްގައި އެނދުމަތި ކޮށްގެންނެވެ.
މިއަދުގެ އަދަދުތަކާއެކު މިހާތަނަށް މުޅި ރާއްޖެއިން ޖުމްލަ 75،162 މީހުން ފައްސިވެފައިވާ ކަމަށް އެޗް.ޕީ.އޭއިން ހާމަ ކޮށްފައިވާ ހިސާބުތަކުން ދައްކައެވެ. އޭގެތެރެއިން 72،439 މީހުން ވަނީ ﷲ ގެ ރަޙްމަތުން ބަލިން ފަސޭހަވެފައެވެ.
ކޮވިޑް19 ގައި ރާއްޖެއިން ދުނިޔެ ދޫކޮށްފައި ވަނީ 214 މީހުންނެވެ.
