ވެލާނާގެ އާއި އޮލިމްޕަސް ރަހުނުކުރަން އުޅޭ ކަމަށް ބުނެ ދެކެވޭ ވާހަކަތައް ފިނޭންސް މިނިސްޓަރު އިބްރާހިމް އަމީރު ދޮގުކުރައްވައިފިއެވެ.
މިނިސްޓަރ ވިދާޅުވި ގޮތުގައި ސަރުކާރުން އިތުރު ލޯނުތަކެއް ނަގަން އެއްވެސް އިމާރާތެއް ރަހުނު ކުރަން ނިންމާފައި ނުވާ ކަމަށެވެ.
މިނިސްޓަރ އަމީރު މިހެން ވިދާޅުވީ މިނިސްޓްރީގެ އިސް އޮފިޝަލަކާ ހަވާލާދީ ބައެއް މީޑިޔާތަކުން ފަތުރަމުންދާ ވެލާނާގެ އަދި އޮލިމްޕަސް ރަހުނުކުރަން ނިންމާފައިވާ ކަމުގެ ވާހަކަތަކާއި ގުޅިގެންނެވެ.
ބައެއް މީޑިޔާތަކުގައި ބުނާގޮތުން މިދެއިމާރާތް ރަހުނުކުރަން ފިނޭންސް މިނިސްޓްރީން ވަނީ ނިންމާފައެވެ. އެހެންނަމަވެސް މިނިސްޓަރ އަމީރު ވިދާޅުވަނީ އެފަދަ ކަމެއް ކުރުމަށް ވިސްނާފައި ނެތްކަމަށެވެ.
ސަރުކާރަށް ލޯނު ހޯދުމުގެ ގޮތުން ފިނޭންސް މިނިސްޓްރީން ވަނީ މީގެ ކުރިންވެސް ދަރުމަވަންތަ ހޮސްޕިޓަލް ރަހުނުކޮށްގެން 100 މިލިއަން ޑޮލަރު (1.5 ބިލިއަން ރުފިޔާ) ހޯދާފައެވެ. މިޚަބަރުތައް ފެތުރެން ފެށުމުން ފިނޭންސް މިނިސްޓްރީން ވަނީ އެޚަބަރުތައް ދޮގުކޮށްފައެވެ. ނަމަވެސް މިދިޔަ އަހަރު ކްރެޑިޓް ސުއިޒް އާއި އެމިރޭޓްސް އެންބީޑީ ކެޕިޓަލްގެ އިތުރުން އެސްއެސްބީސީ އަދި އިސްލާމިކް ކޯޕަރޭޝަން ފޯ ދަ ޑިވެލޮޕްމެންޓް އޮފް ޕްރައިވެޓް ސެކްޓާ (އައިސީޑީ) މެދުވެރި ވެގެން އިޝޫކުރި 200 މިލިއަން ޑޮލަރުގެ ސުކޫކުން، ސަރުކާރުން މިވަނީ 100 މިލިއަން ޑޮލަރު ހޯދާފައެވެ.
