ކ. ގުރައިދޫގައި ގެނބިގެން ކުޑަ ކުއްޖަކު މަރުވެއްޖެއެވެ.
މިއަދު މެންދުރު ހިނގި މިހާދިސާގައި މަރުވެގައިވަނީ އުމުރުން ދެ އަހަރުގެ އަންހެން ކުއްޖެކެވެ.
ފެންވަރު އެމްވީ އަށް މައުލޫމާތު ދެއްވަމުން ގުރައިދޫ ކައުންސިލްގެ ރައީސް ހުސައިން ޔާމިން ވިދާޅުވީ މަރުވި ކުޑަ ކުއްޖާގެ ގެ ހުންނަނީ މޫދާއި ކައިރީގައިކަމަށެވެ. އަދި މި ހާދިސާ ހިނގީ ކުޑަކުއްޖާ އަށް ކާންދިނުމަށް ފަހު ތަށި ދޮންނަން ކުއްޖާގެ މަންމަ ދިޔަވަގުތު ކަމަށެވެ.
”ކުޑަކުއްޖާގެ މަންމަ ކުއްޖާއަށް ކާންދިނުމަށް ފަހު ތަށިދޮންނަން ގޭތެރެއަށް ވަތްވަގުތު މިކަމެއް ހިނގީ. ގައިގަޑަކަށް ފަސްވަރަކަށް މިނެޓްވެސް ނުވާނެ. ގެ ހުންނަނީ މޫދާ ވަރަށް ކައިރީގަ“ : ގުރައިދޫ ކައުންސިލްގެ ރައީސް
ޔާމިން އިތުރަށް ވިދާޅުވީ އެގެއަކީ އިތުރު މީހުންވެސް އުޅޭ ގެއެއްކަމަށާ، ނަމަވެސް އެވަގުތު އެންމެނަށްވެސް ތިބެވުނީ ގޭތެރޭގައިކަމަށެވެ.
ގުރައިދޫން މަރުވި ކުޑަ އަންހެން ކުއްޖާ ގެ ކަށުކަމާކެމީގެ ކަންކަން މިހާރު ދަނީ ކުރަމުންނެވެ.
