މި އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ކުރީގެ ރައީސް، ރައީސް އަބްދުﷲ ޔާމީން އަބުދުލްޤައްޔޫމަށް ކުރިމަތިލެވޭނެ ކަމުގެ ފުރިހަމަ ޔަގީންކަން އޮތް ކަމުގައި އިދިކޮޅު މައި ކޯލިޝަން ހިންގުމާ ވަގުތީ ގޮތުން ހަވާލުވެ ހުންނެވި ޕީއެންސީގެ ރައީސް، ރައްޔިތުންގެ މަޖިލީހުގެ ލ.ފޮނަދޫ ދާއިރާގެ ކުރީގެ މެމްބަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.
އިދިކޮޅު މައި ކޯލިޝަނުން މިހެން ވިދާޅުވި އިރު އިދިކޮޅު އެންމެބޮޑު ކޯލިޝަންގެ ރިޔާސީ ޓިކެޓު އިދިކޮޅު ޕީޕީއެމް، ޕީއެންސީ ހިމެނޭ ކޯލިޝަނުގެ ފަރާތުން ވާދަކުރައްވާނެ ކެންޑިޑޭޓަކީ ކުރީގެ ރައީސް ޢަބްދުﷲ ޔާމިން އަބްދުލް ޤައްޔޫމުކަމަށް ޕީޕީއެމްގެ ސެނެޓުން ނިންމާފައިވުމާއިއެކު ރިޔާސީ ޓިކެޓް ރައީސް ޔާމީނަށް ރަސްމީކޮށް އަރުވާފައިވަނީ 2022 ވަނަ އަހަރުގެ އޯގަސްޓްމަހުގެ 19 ވަނަ ދުވަހުރޭ ބޭއްވި ޚާއްޞަ ބޮޑު ޖަލްސާގައެވެ.
އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އަދުރޭ ވިދާޅުވީ އިދިކޮޅު މައި ކޯލިޝަންގެ ލީޑަރު، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ރައީސް، ރައީސް އަބްދުﷲ ޔާމީން އަބުދުލްޤައްޔޫމަށް އަންނަ ރިޔާސީ އިންތިޚާބުގައި ވާދަކުރުމުގެ ފުރުޞަތު ލިބޭނެކަމުގެ ފުރިހަމަ ޔަގީންކަން އޮތްކަމުގަ އެވެ.
ކުރިއަށްއޮތް ރިޔާސީ އިންތިޚާބުގައި ވާދަކުރުމުގެ ފުރުޞަތު ހުޅުވާލުމާއިއެކު ރައީސް ޔާމީންގެ ކެނޑިޑެންސީ ފައިލް ކުރެވޭނެ ކަމުގެ ޔަޤީންކަން އެބައޮތް ކަމަށާއި، ރައީސް ޔާމީނުގެ ކެންޑިޑެންސީ ފައިލްކުރާތާ 48 ގަޑިއިރު ތެރޭގައި ރައީސް ޔާމީނުގެ މައްސަލައާއި ގުޅޭގޮތުން ގޮތެއް ނިންމަން ސްޕްރީމް ކޯޓަށް ޖެހޭނެ ކަމަށްވެސް އަދުރޭ ވިދާޅުވި އެވެ.
ކްރިމިނަލް ކޯޓުގައި ކުރިއަށް ގެންދާ ރ. ފުއްގިރި ކުއްޔަށް ދިނުމުގެ މައްސަލައިގައި ރައީސް ޔާމީންގެ މައްޗަށް ކުރާ ދައުވާގެ އަޑުއެހުންތައް ލައިވް ނުކުރާ ސަބަބު އޮޅުން ފިލުވުމަށް އިދިކޮޅު ކޯލިޝަނުން ކްރިމިނަލް ކޯޓަށް ގޮސްފައިވާ ކަމަށްވެސް އަދުރޭ ވިދާޅުވިއެވެ. ނަމަވެސް އިސް ގާޟީއާ ބައްދަލު ނުކުރެއްވުނު ކަމަށާއި ތިން ދުވަސް ފަހުން އިސް ގާޟީ އަށް ސިޓީ ލިބިލެއްވުމުން، ޖަވާބެއް ދެއްވާނެ ކަމަށް ކޯޓުން ބުނެފައިވާ ކަމަށް ވެސް އަދުރޭ ވިދާޅުވި އެވެ.
ރައީސް ޔާމީން ވެރިކަމަށް ގެނައުމަށް ކުރައްވަމުންގެންދަވާ މަސައްކަތްތަކުގައި ހުރި ގޮންޖެހުންތަކާއި ގުޅިގެން އަދުރޭ ވިދާޅުވީ މިމަސައްކަތަކީ ބުރަ އަދި ހުރަސްތައް ގިނަ މަސައްކަތެއްކަން އެނގިލައްވާ ކަމުގައެވެ. ނަމަވެސް މިމަސައްކަތާއި ކުރިމަތި ލައްވަނީ ދިމާވާ ކޮންމެ ހުރަހެއް ގިރާކޮށް ދިމާވާ ކޮންމެ ގޮންޖެހުމަކާއި ކުރިމަތިލައްވައި ވަރަށް ސާބިތު ކަމާއިއެކު، ކެރިހުރެގެން ކަމަށްވެސް އަދުރޭ ވިދާޅުވިއެވެ.
ރައީސް ޔާމީން ވެރިކަމަށް ގެނައުމަށް މަސައްކަތް އިދިކޮޅު ޕްރޮގްރެސިވް ކޯލިޝަނުން ކުރަމުންދާއިރު، ރައީސް ޔާމީނަކީ ސަރުކާރަށްވެސް އަދި މިއިންތިޚާބުގައި ވާދަކުރާ އެހެން ކެނޑިޑޭޓުންވެސް އެންމެ ޖެހިލުންވާ ކެނޑިޑޭޓެވެ. ރައީސް ޔާމީނާއި ޓިކެޓް ހަވާލުކުރުމަށް ބޭއްވި ޖަލްސާގައިވެސް އެތައް ހާސް ބަޔަކު ބައިވެރިވެފައިވާއިރު، ރައީސް ޔާމީނަށް އޮތް ތާއީދަކީ ރާއްޖޭގެ ތަރައްޤީއަށް އެމަނިކުފާނު ކޮށްދެއްވާފައިވާ ނުހަނު އަގުހުރި ހަރުދަނާ ބުރަ މަސައްކަތްތަކުގެ ސަބަބުން އޮތް ތާއީދެއްކަަށް އިދިކޮޅު ކޯލިޝަނުން ދަނީ ބުނަމުންނެވެ.
އިދިކޮޅު ކޯލިޝަނުން ބުނަމުންދަނީ ދެންވެސް ރާއްޖެ ތަރައްޤީ ކުރެވޭނީ ރައީސް ޔާމީނަށް ކަމުގައެވެ. އަދި 2023ގައި އޮންނަ ރިޔާސީ އިންތިޚާބް ކާމިޔާބުކޮށް ރައީސް ޔާމީން ވެރިކަމަށް ގެނައުމަކީ ދިވެހިރާއްޖޭގެ ތަރައްޤީއަށްޓަކައި ކޮންމެ ދިވެހި ދަރިއަކުވެސް ކުރަންޖެހޭ އެންމެ މުހިންމު މަސައްކަތްކަމަށްވެސް އިދިކޮޅު ކޯލިޝަނުން ދަނީ ބުނަމުންނެވެ.
