ޢީދު ކުޅިވަރު ސިޔާސީކުރުން އެއީ ރަނގަޅު ކަމެއް ނޫން ކަމަށް މިނިސްޓަރ އޮފް އާރޓްސް ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވެއްޖެއެވެ.
އެކަމަނާ މިހެން ވިދާޅުވީ އިދިކޮޅު ޕީޕީއެމްއިން ޢީދާއި ގުޅުވައިގެން ހިންގި ހަރަކާތްތަކަށް ފާޑު ވިދާޅުވަމުން ކުރެއްވި ޓްވީޓެއްގައެވެ.
ޕީޕީއެމް އިން ވަނީ ރައީސް އިބްރާހީމް މުހައްމަދު ސޯލިހާއި އިންޑިއާގެ ބޮޑުވަޒީރު ނަރެންދްރާ މޯދީގެ ފޮޓޯ ބޭނުންކޮށްގެން ތައްޔާރު ކޮށްފައިވާ މާސްކުތައް އަޅައިގެން މާލޭގެ މަގުމަތީގައި ހަރަކާތެއް ކުރިއަށް ގެންގޮސްފައެވެ.
ހުދު ކުލައިގެ ފޮތި ގައިގައި އޮޅައިގެން ރައީސް ސާލިހާއި މޯދީ ސިފަވާގޮތަށް ތައްޔާރުކޮށްފައިވާ މާސްކުތައް އަޅައިގެން އަޑުގަދަކޮށް ލަވަޖަހަމުން، ރާއްޖޭގައި ތިބި އިންޑިއާ ސިފައިން ބޭރުކުރުމަށް ވެސް ވަނީ ގޮވާލާފައެވެ. އަދިި ސިލްސިލާކޮށް އެ ކޯލިޝަނުން ކުރިއަށް ގެންދާ ”އިންޑިއާ އައުޓް“ ގެ ހަރަކާތް ވެސް ވަނީ ބާއްވާފައެވެ.
މިކަމާއި ގުޅިގެން ޔުމްނާ ވިދާޅުވީ ސިޔާސީ މަގުސަދެއްގައި ވެސް އެއްވެސް ބައެއްގެ އަބުރަށް އަރައިގަނެ އިޖުތިމާއީ މިންގަނޑާއި ޚިލާފަށް ކަންކަން ކުރުމަކީ ބަލައި ގަނެވޭނެ ކަމެއް ނޫންކަމަށެވެ.
މީގެ އިތުރުން ގއ.ވިލިނގިލީގައި ނިވާކަން ކުޑަ ހެދުން ލައިގެން ހުށަހަޅައިގެން ދިން އައިޓަމާއި ގުޅިގެން ވެސް އެކަމަނާ ވަނީ ފާޑު ވިދާޅުވެފައެވެ.
އެގޮތުން ޔުމްނާ ވިދާޅުވީ ޢީދުގެ ކުޅިވަރުތަކުގައި ވެސް އަދި އެހެނިހެން ކުޅިވަރުތަކުގައި ވެސް ހެދުން އެޅުމުގެ ކޮންމެސް ކަހަލަ މިންގަނޑުތަކެއް ހުންނަންޖެހޭ ކަމަށެވެ. އަދި ޢީދަކީ ރަށުގެ ކުދި ބޮޑު އެންމެން އުފާކޮށް، އެއްވެ، ކުޅިވަރުތަކުގައި ބައިވެރިވާ އުފާވެރި ދުވަސްތަކެއް ކަމަށެވެ.
”މިދުވަސްތަކުގައި އީދާއި ގުޅިގެން ހިންގޭ އެކި ހަރަކާތްތަކުގައި ހެދުން އެޅުމުގައި މިންގަނޑެއް ގެންގުޅެން ޖެހޭ.“ ޔުމްނާ ވިދާޅުވިއެވެ.
