އިނިގިރޭސި ޕްރިމިއަރ ލީގު ތާވަލްގެ ދެވަނާގައި އޮތް މެންޗެސްޓަރ ޔުނައިޓެޑް އަތުން މޮޅުވެ, ގަދަ ހަތަރެއްގެ ޖާގައެއް ހޯދުމުގެ ފުރުޞަތު ލިވަޕޫލުން ބޮޑުކޮށްފިއެވެ. 4-2 ން މެންޗެސްޓަރ ޔުނައިޓެޑް ބަލިކޮށް މިވަގުތު 4 ވަނާގައި އޮތް ލިވަޕޫލަށް ބާކީ ތިން މެޗު އޮތުމުން އަދި ފުރުޞަތު އެބައޮތެވެ.
މެންޗެސްޓަރ ޔުނައިޓެޑް ސަޕޯރޓަރުންގެ އަޅުތާލުގެ ސަބަބުން ފަސްކުރި މެޗު ލިވަޕޫލުން ރޭ ކާމިޔާބުކުރީ މެންޗެސްޓަރ ޔުނައިޓެޑުން ފުރަތަމަ ލަނޑު ޖަހާ ކުރި ހޯދާފައިވަނިކޮށެވެ. 10 ވަނަ މިނިޓްގައި ލީޑް ހޯދީ ބުރޫނޯ ފާނަންޑޭޒްއެވެ.ލިވަޕޫލަށް އެއްވަނަކޮށްދިނީ ޖޮޓާއެވެ. ހާފް ނިމުމުގެ ކުރިން އިތުތު ވަގުތުގައި ލިވަޕޫލުން ކުރި ހޯދީ ފިރްމީނޯ ޖެހި ލަނޑުންނެވެ. ދެވަނަ ހާފް ފަށައިގެން ދެވަނަ މިނިޓްގައި ލީޑް ފުޅާކޮށްދިނީވެސް ފިރްމީނޯއެވެ. ކަވާނީ ލަނޑު ޖަހައި ފަރަޤު ކުޑަކޮށްދިން ނަމަވެސް މެޗުގެ އެންމެ ފަހު މިނިޓްގައި ޖޯންސް ޖެހި ލަނޑާއެކު ލިަޕޫލުން މުހިއްމު މޮޅެއް ހޯދިއެވެ.
ލިވަޕޫލަށް ކުރިއަށް އޮތް ވެސްޓްބްރޮމްވިޗް ކާމިޔާބުކޮށްގެން ގަދަހަތަރެއްގެ ޖާގައަކާ ޕޮއިންޓަކަށް ކައިރިއަށް ޖެހިލެވޭނެއެވެ. ނަމަވެސް ލިވަޕޫލަށް ފުރުޞަތު އޮތީ ލެސްޓަރ ސިޓީ ނުވަަތަ ޗެލްސީން ޕޮއިންޓެއް ގެއްލުވާލައިގެންނެވެ. އެދެޓީމް އެއްޓީމް އަނެއްޓީމާ ވާދަކުރަން ޖެހޭ މެޗު އޮތުމަކީ ލިވަޕޫލަށް ބޮޑު ހިތްހަމަޖެހުމެކެވެ.
