އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކްރިސްޓަލް ޕެލަސްއާއި ދެކޮޅަށް ކުޅުނު މެޗުގައި ފަހަތުން އަރައި މޮޅުވެ، ލީގުގެ އެއްވަނައަށް ލިވަޕޫލުން ޖެހިލައިފިއެވެ.
ކްރިސްޓަލް ޕެލަސްގެ ދަނޑުގައި ލިވަޕޫލް ކުރި ހޯދީ 2-1 ނެވެ.
މި މެޗުގެ ފުރަތަމަ ހާފުގެ ކުޅުން ނިމިގެން ދިޔައީ އެއްވެސް ޓީމަކަށް ލަނޑެއް ނުޖެހި 0-0 އިން އެއްވަރުވެ އޮވެގެންނެވެ.
ދެވަނަ ހާފް ފަށައިގެން 12 ވަނަ މިނިޓްގައި ލިބުނު ޕެނަލްޓީ އަކުން ކްރިސްޓަލް ޕެލަސް އަށް ފުރަތަމަ ކުރި ހޯދައިދިނީ ޖީން ފިލިޕޭ މަޓޭޓާއެވެ. ލީޑުގައި އޮއްވައި ކްރިސްޓަލް ޕެލަސްއަށް މައްސަލަތަކާއި ކުރިމަތިވީ މެޗުގެ 75 ވަނަ މިނެޓުގައި ދެވަނަ ރީނދޫކާޑާއި އެކު ރަތްކާޑު ދައްކާ ޖޯޑަން އަޔޫ ދަނޑުން ފޮނުވާލި ހިސާބުންނެވެ. ލިވަޕޫލުން ނަތީޖާ ހަމަހަމަކުރީ ކްރިސްޓަލް ޕެލަސްގެ އެއް ކުޅުންތެރިއަކު މަދުވި ފަހުންނެވެ. ދެވަނަ ރީނދޫ ކާޑާއެކު އަޔޫ އަށް ދެއްކި ރަތްކާޑަށް ފަހު ޖެހިގެން އައި މިނިޓްގައި ލިވަޕޫލަށް ނަތީޖާ ހަމަހަމަކޮށްފައެވެ. ލިވަޕޫލަށް ނަތީޖާ ހަމަހަމަކޮށްދިނީ މުޙައްމަދު ސަލާހުއެވެ. މިއީ އޭނާ ލިވަޕޫލަށް ޖަހައިދިން 200 ވަނަ ލަނޑެވެ. މިއާއެކު ސަލާހް ހިމެނެނީ ލިވަޕޫލަށް 200 ލަނޑު ޖަހައިދިން ފަސް ކުޅުންތެރިންގެ ތެރޭގައެވެ. މެޗުން ލިވަޕޫލް މޮޅުކޮށްދިން ލަނޑު އިތުރު ވަގުތުގައި ޖެހީ ހާވީ އެލިއޮޓްއެވެ.
މި މޮޅާއެކު ލިވަޕޫލް ވަނީ ތާވަލްގެ އެއްވަނަ އަށް ޖެހިލާފައެވެ. އެއީ ދެވަނާގައި އޮތް އާސެނަލް އަށްވުރެ އިތުރަށް ޕޮއިންޓެއް ހޯދައިގެންނެވެ. އެއީ 16 މެޗުން 37 ޕޮއިންޓާ އެކުއެވެ. އާސެނަލް ވަނީ ރޭ އެސްޓަން ވިލާއަތުން 1-0 އިން ބަލިވެފައެވެ. އާސެނަލް ދެވަނާގައި އޮތީ 16 މެޗުން 36 ޕޮއިންޓާ އެކުއެވެ.
