ކުޅުދުއްފުށިން ގެއްލިގެން ހޯދަމުންދިއަ 16 އަހަރުގެ އަންހެން ކުއްޖާ އަނބުރައިގަނެގެން ކުޅުދުއްފުށީ ރީޖަނަލް ހޮސްޕިޓަލްގައި ފަރުވާ ދެމުން ދަނިކޮށް ފެނިއްޖެއެވެ.
ފުލުހުން ވިދާޅުވީ ހދ. ކުޅުދުއްފުށިން 16 އަހަރުގެ އަންހެން ކުއްޖަކު ގެއްލިގެން ރޭ 22:24 ހާއިރު ފުލުހުންނަށް ރިޕޯޓްކޮށްފައިވާކަމުގަ އެވެ. އަދި އެ ކުއްޖާ ހޯދުމުގެ މަސައްކަތް ކުރަމުން ދަނިކޮށް، އެ ކުއްޖާ އަނބުރައިގަނެގެން ކުޅުދުއްފުށީ ރީޖަނަލް ހޮސްޕިޓަލަށް ގެންގޮސް ފަރުވާ ދެމުންދާކަމުގެ މަޢުލޫމާތު ރޭ 23:00 ހާއިރު އެ ހޮސްޕިޓަލުން ފުލުހުންނަށް ދީފައިވާކަމަށް ފުލުހުން ވިދާޅުވި އެވެ.
ކުޅުދުއްފުށި، ސަންސެޓް، ފާތުމަތު ތަހާޔާ އަޙްމަދު (16އ) ގެއްލިގެން މީސްމީޑިއާގައި ވެސް ވަނީ އެކަން އިޢްލާންކޮށްފަ އެެވެ.
މަޢުލޫމާތު ލިބިފައިވާ ގޮތުގައި ތަހާޔާ ނުފެނިގެން ފުލުހުންނަށް ރިޕޯޓްކޮށްފައިވަނީ “ސްމާރޓް ވެލީ” ޓިއުޝަން ސެންޓަރަށް ގޮސް ރޭ 9:15 ގައި ކްލާސް ނިމިގެންވެސް ގެއަށް ނުދިއުމުންނެވެ. މަޢުލޫމާތު ލިބިފައިވާ ގޮތުގައި އެ ކުއްޖާ އަނބުރައިގަނެފައި ވަނިކޮށް އެކުއްޖާ ހޮސްޕިޓަލަށް ގެންދިޔަ މީހާ ވަނީ އޭނާ ހޮސްޕިޓަލަށް ލުމަށްފަހު އެތަނުން ގޮސްފަ އެވެ.
މި މައްސަލައާ ގުޅިގެން ބަލަންޖެހޭ ކަންކަން ބަލަމުންދާކަމަށްވެސް ފުލުހުން ވިދާޅުވިއެވެ.
