މިހާރު މިއޮތް ރައީސް ޑރ. މުޙައްމަދު މުއިއްޒުގެ ސަރުކާރުން ހަދަނީ ކަނޑައެޅިގެން ދޮގެއްކަމަށާއި ޒަކާތު ފަންޑު މެނޭޖުކުރުމަށް ރަނގަޅު ގާނޫނެއް ހެދިފައި ނެތްކަމަށް ޕީއެންއެފްގެ ސެކެޓްރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.
ރާއްޖޭގައި ޒަކާތާ ގުޅޭ ކަންކަން ސަރުކާރުން ކުރިއަށް ގެންދަނީ ވަރަށް ހަރުދަނާ ކަމާއެކު ކަމަށާއި މިނިސްޓަރަކު ނުވަތަ އޮފީހުގެ ވެރިއަކަށް ހުންނަވާ ބޭފުޅަކަށް ޒަކާތުން ވައްކަން ނުކުރެވޭނެ ކަމަށް އިސްލާމިކް އެފެއާޒް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވި ވިދާޅުވުމަށް ރައްދުދެއްވާ އެކްސްގައި މަލީހު ވިދާޅުވީ އެއީ ކަނޑައެޅިގެން ދޮގެއްކަމަށާއި ޒަކާތު ފަންޑު މެނޭޖުކުރުމަށް ރަނގަޅު ގާނޫނެއް ހެދިފައި ނެތްކަމަށެވެ.
އަދި މިވަގުތުވެސް ޒަކާތު ފަންޑު މެނޭޖްކުރުމާއި އެހީދިނުމަށް ރަނގަޅު އުސޫލުތަކެއް ނެތްކަމަށާއި ބޭރު ޤައުމެއްގެ ފޭކު ޖަމްޢިއްޔާއަކަށް ލާރި ފޮނުވާ އެޖީބަށް ލިޔަސް އެނގޭނެ ގޮތެއް ނެތްކަމަށާއި އެކަން އޮތީ މިނިސްޓަރ ބޭނުންވާ މީހަކަށް ދެވޭ ގޮތަށްކަމަށް މަލީހު ވިދާޅުވިއެވެ.
”ކަނޑަ އެޅިގެން ދޮގެއް. ޒަކާތު ފަންޑު މެނޭޖުކުރުމަށް ރަނގަޅު ޤާނޫނެއް ނެތް.އަދި މިވަގުތުވެސް ފަންޑު މެނޭޖްކުރުމާއި އެހީދިނުމަށް ރަނގަޅު އުސޫލުތަކެއް ނެތް.ބޭރު ޤައުމެއްގެ ފޭކު ޖަމްޢިއްޔާއަކަށް ލާރި ފޮނުވާ އެޖީބަށް ލިޔަސް އެނގޭނެ ގޮތެއް ނެތް.މިނިސްޓަރ ބޭނުންވާ މީހަކަށް ދެވޭ ގޮތަށް.“ މަލީހު އެކްސްގައި ވިދާޅުވެފައިވެއެވެ.
