ފްރާންސްގެ ފޯވާޑް، ކީލިއަން އެމްބާޕޭ، ހަތް އަހަރަށް ފަހު ޕީއެސްޖީ ދޫކޮށް އެހެން ކުލަބަކަށް ބަދަލުވާން ނިންމާ އެކަން އިއުލާންކޮށްފި އެވެ.
މި ސީޒަނަށް ފަހު އެމްބާޕޭ ޕީއެސްޖީ ދޫކޮށްލާނެ ކަމަށް ކުރިންވެސް ބެލެވުނުއިރު، ރޭ ޝޯޝަލް މީޑިއާގައި އާންމުކުރި ވީޑިއޯގައި އެމްބާޕޭ ބުނީ، އޭނާ އަންނަ ސީޒަނުގައި ޕީއެސްޖީ އިން ނުފެންނާނެ ކަމަށެވެ.
ވީޑިއޯގައި އެމްބާޕޭ ބުނީ އޭނާ ހަތް އަހަރަށްފަހު ޕީއެސްޖީ ދޫކޮށްލަން ނިންމައިފިން ކަމަށާއި މިއީ ފުޓްބޯޅަ ކެރިއަރުގައި ނިންމި އެންމެ އުނދަގޫ ނިންމުންކަމަށެވެ.
އެމްބާޕޭ ބުނީ، ޕީއެސްޖީއާ އެކު ހޭދަކުރި ހަތް އަހަރުގެ ތެރޭގައި ވަރަށް ބައިވަރު ކަންކަން ދަސްވި ކަމަށާއި، ހާއްސަކޮށް ކުޅުންތެރިއެއްގެ ގޮތުގައި ފުރިހަމަ ވުމަށް ޕީއެސްޖީ އިން ދަސްވި ކަމަށެވެ.
އިތުރަށް އޭނާ ބުނީ ޕީއެސްޖީ އަކީ ފްރާންސްގެ އެންމެ މޮޅު އަދި ދުނިޔޭގެވެސް މޮޅެތި ޓީމުތަކުގެ ތެރޭގައި ހިމެނޭ ޓީމެއްކަމަށެވެ. އަދި މި ތަނުން ދުނިޔޭގެ ނަން މަޝްހޫރު އެތައް ކުޅުންތެރިންނާއެކު ކުޅެވިއްޖެކަމަށާއި އެ ކުޅުންތެރިންގެ ފަރާތުން ލިބުނު ތަޖުރިބާއާއި އެކު އިތުރަށް ބިލްޑްއަޕްވާން ދަސްވެފައިވާކަމަށް ވެސް އޭނާ ބުނެފައިވެއެވެ.
ޕީއެސްޖީ ދޫކޮށް އެމްބާޕޭ އެހެން ކުލަބަކަށް ބަދަލުވާނެކަން އޭނާ ހާމަކޮށްފައިވާއިރު، އޭނާ ދާނެ ކަމަށް ބެލެވެނީ ސްޕެއިންގެ ޗެމްޕިއަން ރެއާލް މެޑްރިޑް އަށެވެ. ރެއާލުން ވަނީ މިދިޔަ ތިން ސީޒަނުގައިވެސް އެމްބާޕޭ ހޯދަން މަސައްކަތް ކޮށްފަ އެވެ. އެކަމަކު އެއިން ކޮންމެ ފަހަރަކު އެމްބާޕޭ ވަނީ ރެއާލުގެ ހުށަހެޅުމަށް ނޫނެކޭ ބުނެފަ އެވެ.
އެމްބާޕޭ ޕީއެސްޖީ ދޫކޮށްލާނެކަން ހާމަކޮށްފައިވާއިރު، އޭނާ އެހެން ކުލަބަކަށް ބަދަލުވާނަމަ ދެން އެއްވެސް ކުލަބަކަށް އޭނާ ހޯދުމަށް ބިޑް ކުރާކަށް ނުޖެހޭނެ އެވެ. އެއީ އެމްބާޕޭ ޕީއެސްޖީ އާއެކު ހަދާފައިވާ އެއްބަސްވުން މި ސީޒަނުގެ ނިޔަލަށް ހަމަވާނެ އެވެ.
އެމްބާޕޭ ޕީއެސްޖީ އަށް ކުޅެދިން 306 މެޗުގައި އޭނާ ވަނީ 255 ގޯލު ޖަހާ 96 ގޯލު ޖަހަން އެހީތެރިވެދީފަ އެވެ. އަދި ޕީއެސްޖީ އާއެކު ހަތް ފަހަރު ފްރެންޗް ލީގު ވަނީ ކާމިޔާބު ކޮށްފަ އެވެ.
