ދިވެހި ފުލުހުންގެ ބެލުމުގެ ދަށުގައިހުރި ސިނގިރޭޓުތަކެއް ގެއްލުނު މައްސަލަ ތަޙްޤީޤްކޮށް މިކަމުގައި ޤާނޫނީ ފިޔަވަޅުއަޅުއްވާނެކަމުގައި ފުލުހުން ހާމަކުރައްވައިފި އެވެ.
މި މައްސަލައާއި ގުޅިގެން ފުލުހުން ނެރުނު ނޫސްބަޔާނެއްގައި ބުނެފައިވަނީ ފުލުހުންގެ ބެލުމުގެ ދަށުގައި ހުންނަ ތަކެތި ގެއްލުމަކީ އެއްވެސް ހާލަތެއްގައި ބަލައިގަނެވޭނެ ކަންކަން ނޫން ކަމަށާއި މިމައްސަލަ ބަލަމުން ގެނަދަވާކަމުގައެވެ.
ފުލުހުންގެ މުއައްސަސާގެ އަޚުލާގީ މިންގަނޑުތަކާއި އަސާސީ އުސޫލުތަކާ ޚިލާފު ކޮންމެ ކަމަކީ ބޮޑު އިސްކަމެއް ދީގެން ތަޙްޤީގްކޮށް، ޤާނޫނީ ފިޔަވަޅު އަޅާނެ ކަންކަން ކަމުގައިވެސް އެ ބަޔާނުގައި ބުނެފައިވެއެވެ. އަދި ފުލުހުންގެ މުއައްސަސާއަށް ރައްޔިތުންކުރާ އިތުބާރު ގެއްލުވާލަން އެއްވެސް ފުލަހަކަށް ފުރުޞަތެއް ނުދެއްވާނެ ކަމަށްވެސް އެ ބަޔާނުގައި ބުނެފައިވެއެވެ.
ޤާނޫނާ ހިލާފަށް ރާއްޖެއަށް އެތެރެކޮށްފައިވާކަމަށް ތުހުމަތު ކުރެވިގެން ފުލުހުންގެ ބެލުމުގެ ދަށަށް ގެންގޮސްފައިވާ 32 ކާޓަން ސިނގިރޭޓް ވިލިމާލެ ޕޮލިސް ސްޓޭޝަންގެ ބެލުމުގެ ދަށުގައި ހުއްޓައި، އޭގެ ތެރެއިން ހަ ކާޓޫން ސިނގިރޭޓް މަދުވެފައިވާ ކަމުގައެވެ. މި 32 ކާޓަން ސިނގިރޭޓަކީ ބިދޭސީއެއްގެ އަތުން މެއި މަހުގެ 23 ވަނަ ދުވަހު ފުލުހުންގެ ބެލުމުގެ ދަށަށް ގެންގޮސްފައިވާ ތަކެތިކަމަށްވެސް އެ ބަޔާނުގައި ބުނެފައިވެއެވެ.
މިކަމަކީ ފުލުހުންގެ ފަރާތުން ފެންނަން ޖެހޭ އަހުލާގައި ހަރުދަނާ މަސައްކަތުގެ ރޫހާ ކަނޑައެޅިގެން ޚިލާފު ކަމެއް ކަމަށާއި، މިކަމުގައި ބައިވެރިވެފައިވާ ފަރާތް ނުވަތަ ފަރާތްތައް ދެނެގަނެ، އަޅަން ޖެހޭ ފިޔަވަޅުތައް އެޅުމަށް ކުރަން ޖެހޭ އެންމެހާ ކަންކަން ކުރާނެކަމަށްވެސް ފުލުހުންގެ ބަޔާނުގައި ބުނެފައިވެއެވެ.
ފުލުހުން ބުނީ އެ މުއައްސަސާގެ ހުރުމަތް ކުޑަކޮށް، އާންމު ރައްޔިތުން ފުލުހުންނަށް ކުރާ އިތުބާރު ގެއްލުވާލަން އެއްވެސް މުވައްޒަފަކަށް އެ އިދާރާއިން ފުރުޞަތު ނުދެއްވާނެކަމުގައެވެ. އަދި އެ މުއައްސަސާގެ ޚިދުމަތްތައް ބައްޓަން ކުރަމުން ދަނީ، ހުރިހާ ފުލުހުންނަކީ ނަޒާހަތްތެރިކަން ހިފަހައްޓައި، ސާބިތުކަމާ އެކީ ދެމިތިބެ އިހުލާސްތެރި ޚިދުމަތްތަކެއް ރައްޔިތުންނަށް ފޯރުކޮށްދޭ ބަޔަކަށް ހެދުމުގެ އަމާޒުގައިކަން ބަޔާނުގައި ވަނީ ފާހަގަކުރައްވާފައެވެ.
ފުލުހުން މިފަދަ ބަޔާނެއް ނެރެފައިވާއިރު ސިނގިރޭޓު ވަގަށް އެތެރެކުރުމާއި، ވަގަށް ނެގުމުގެ ބޮޑެތި މައްސަލަތަކެއް ފާއިތުވި އަހަރެއްހައި ދުވަހުގެ ތެރޭގައި ވަނީ ފެންމަތިވެފައެވެ.
މިމައްސަލަތައްވެސް ދިވެހި ފުލުހުން ގެންދަވަނީ ތަޙްޤީގު ކުރައްވަމުންވެ.
