އިދިކޮޅު އެންމެ ބޮޑު ސިޔާސީ ޕާޓީ، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަންކަމުގެ މަގާމުން ފައްޔާޒް އިސްމާއިލް ރޭ ކުއްލި ގޮތަކަށް އިސްތިއުފާ ދެއްވައިފިއެވެ.
ޕާޓީގެ ތެރޭގައި ހިނގަމުންދާ ”ފިތުނަ“އާއި، މާޒީގައި ހިތަށްވީ ތަދުގެ ބަދަލު ހޯދަން އުޅެގެން ޕާޓީއަށް ކުރިއެރުމެއް ނާންނާނެ ކަމަށް އޭނާ ވަނީ ގައުމީ މަޖިލީހުގެ ބައްދަލުވުމުގައި ހޫނު ބަސްތަކުން ފާހަގަކުރައްވައިފައެވެ.
ފައްޔާޒް އިސްތިއުފާ ދެއްވީ، ކުރިއަށް އޮތް ލޯކަލް ކައުންސިލް އިންތިހާބުގައި މާލޭގެ މޭޔަރުކަމަށް އެމްޑީޕީގެ ޓިކެޓު ހޯދުމުގެ ވާދަވެރިކަން ޕާޓީގެ އެތެރޭގައި ވަރަށް ބޮޑުވެފައިވާ ދަނޑިވަޅެއްގައެވެ.
އެމްޑީޕީގެ ގައުމީ މަޖިލީހުގެ ރޭގެ ބައްދަލުވުމުގައި ވާހަކަދައްކަވަމުން ފައްޔާޒް ވިދާޅުވީ، ޗެއާޕާސަންކަމުގެ މަގާމާ ހަވާލުވެވަޑައިގެންނެވި އިރުއްސުރެ ޕާޓީގެ ތެރޭގައި ހިޔާލު ތަފާތުވުންތައް އުފެދިފައިވާ ކަމަށެވެ. އޭނާގެ މަސައްކަތަކަށްވީ ކުރީގެ ރައީސް އިބްރާހިމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދާ ދެމެދު އޮތް ސިޔާސީ ހިޔާލު ތަފާތުވުންތައް ހައްލުކޮށް، އެކުގައި ކުރިއަށް ދެވޭނެ މަގެއް ހޯދުން ކަމުގައި ވިޔަސް، އެކަމުގައި އެދެވޭ ކުރިއެރުމެއް ލިބިފައި ނުވާ ކަމަށެވެ.
ކުރީގެ ރައީސް ސޯލިހުގެ ވެރިކަމުގައި އެ ދެބޭފުޅުންނާ ދެމެދު އުފެދުނު ސިޔާސީ ހިޔާލު ތަފާތުވުންތަކާ ގުޅިގެން ނަޝީދު ވަނީ އެމްޑީޕީން ވަކިވެވަޑައިގެން ”ދަ ޑިމޮކްރެޓްސް“ ނަމުގައި ސިޔާސީ ޕާޓީއެއް އުފައްދަވައިފައެވެ. އެހެންނަމަވެސް، މިދިޔަ ޖޫން މަހުގެ ތެރޭގައި ނަޝީދު އަލުން ޕާޓީއާ ގުޅިވަޑައިގެންނެވިއެވެ. ނަޝީދާއި އެމަނިކުފާނުގެ އަރިސް ބޭފުޅުން އެމްޑީޕީއާ އަލުން ގުޅިވަޑައިގަތުމުގައި އެންމެ މުހިންމު ރޯލެއް އަދާކުރެއްވީ ވެސް ފައްޔާޒެވެ.
ނަމަވެސް ނަޝީދު އެމްޑީޕީއާ ގުޅިވަޑައިގަތުމުން އެކަމާ ހިތްހަމަނުޖެހޭ ބަޔަކު އަދިވެސް ޕާޓީގެ ތެރޭގައި ތިބިކަން ފައްޔާޒް ވަނީ ރޭގެ ބައްދަލުވުމުގައި ނުސީދާ ގޮތެއްގައި ފާހަގަކުރައްވައިފައެވެ. އޭނާ ވިދާޅުވީ، ޗެއާޕާސަންގެ މަގާމުގައި ހުންނަވައިގެން އޭނާ އަބަދުވެސް މަސައްކަތް ކުރެއްވީ އެމްޑީޕީގެ އެތެރޭގައި އުފެދިފައިވާ ”ސްޕްލިޓް“ ނުވަތަ ބައިބައިވުން ނައްތާލަން ކަމަށެވެ.
ކުރިއަށް އޮތް ރިޔާސީ އިންތިހާބުގައި ވާދަކުރެއްވުމުގެ ޝައުގުވެރިކަން ފާޅުކުރެއްވި އެއް ބޭފުޅަކީ ފައްޔާޒެވެ. އޭނާ ވިދާޅުވީ، އޭނާގެ އެ ޝައުގުވެރިކަމުގެ ސަބަބުން ޕާޓީގެ މަސައްކަތްތައް ކުރިއަށް ގެންދިއުމުގައި ބޮޑެތި ގޮންޖެހުންތަކެއް ދިމާވާ ކަމަށެވެ. ޗެއާޕާސަން ކަމުގައި ހުންނަވައިގެން ކުރައްވާ ކަންކަމަކީ އޭނާއަށް ފައިދާވެދާނެ ކަންކަން ކަމަށް ބައެއް ބޭފުޅުންނަށް ހީވެދާނެތީ ”ފަހަތަށް“ ނުވަތަ ”ހިޔަނި“ އެޅުމުގެ ފުރުސަތު އެޅިދާނެ ކަމަށް ފައްޔާޒް ވިދާޅުވިއެވެ.
”އަޅުގަނޑު ގަބޫލު ކުރަނީ ރަނގަޅަށް އެއްވެގެން ކަން ކުރިއަށް އޮތް އިންތިހާބުތައް ކާމިޔާބު ކުރެވޭނީ. އަޅުގަނޑުމެންގެ ހިތަށްވީ ތަދުގެ ބަދަލު ހޯދަން އުޅެގެން އަޅުގަނޑުމެންނަށް ކުރިއެރުން ލިބޭ ތަނެއް ނުފެނޭ،…އަޅުގަނޑު ގަބޫލު ކުރާ ގޮތުގައި ސިޔާސީ ލީޑަރުންނަކީ އެކަހަލަ އިހްސާސްތަކުގެ މައްޗަށް އެރެން ޖެހޭނެ ބައެއް. އެ އިހްސާސްތަކުގެ މައްޗަށް އަރައި، ގައުމާއި ރައްޔިތުންނަށް ފައިދާވާނެ ނިންމުންތަކެއް ނިންމަން ޖެހޭ ބައެއް.“ ފައްޔާޒް ވިދާޅުވިއެވެ.
އެމްޑީޕީގެ އެތެރޭގައި މިހާރު އޮތް ”ފިތުނަ“ ނައްތާލުން ނުވަތަ އެ ވިސްނުން ބަދަލުކުރަންޖެހޭ ބަޔަކީ އެ ޕާޓީގެ ލީޑަޝިޕާއި ގައުމީ މަޖިލީހުގެ މެމްބަރުން ކަމަށް ވެސް ފައްޔާޒް ވަނީ ފާހަގަކުރައްވައިފައެވެ.
ފައްޔާޒްގެ މި އިސްތިއުފާ އައީ، އަންނަ އަހަރު ބާއްވާ ލޯކަލް ކައުންސިލްތަކުގެ އިންތިހާބުގައި މާލޭގެ މޭޔަރުކަމުގެ ޓިކެޓަށް އެމްޑީޕީގެ ތެރެއިން މިހާރުގެ މޭޔަރު އާދަމް އާޒިމާއި މަޖިލީހުގެ މެދުހެންވޭރު ދާއިރާގެ ކުރީގެ މެމްބަރު އަލީ އާޒިމް ވާދަކުރައްވަމުންދާ ދަނޑިވަޅެއްގައެވެ. އާދަމް އާޒިމްގެ ފަހަތުގައި ރައީސް ސޯލިހާއި އެމަނިކުފާނުގެ ސަޕޯޓަރުން ތިއްބަވާއިރު، އަލީ އާޒިމްގެ ފަހަތުގައި ރައީސް ނަޝީދާއި އެމަނިކުފާނުގެ ސަޕޯޓަރުން ތިއްބަވައެވެ. މިއީ ޕާޓީގެ ތެރޭގައި އޮތް ދެ ފެކްޝަންގެ ހޫނު ވާދައެއްގެ ގޮތުގައި ސިފަކުރެވޭ ކަމެކެވެ.
