ވިލިމާލޭގައި ހުރި ދުވަސްވީ ތާރީޚީ ދެ ނިކަގަސް ކަނޑާލުމަށް ސަރުކާރުން ނިންމެވުމާ ގުޅިގެން، އެ ގަސްތައް ނުކެނޑުމަށް ކުރީގެ ރައީސް މުހައްމަދު ނަޝީދު ގޮވާލައްވައިފިއެވެ.
100 އަހަރަށްވުރެ ގިނަ ދުވަހުގެ ތަރިކައެއް ކަމަށް ސިފަކުރައްވައި ނަޝީދު މިކަމާ ކަންބޮޑުވުން ފާޅުކުރައްވާފައި މިވަނީ، ރައީސް ޑރ. މުހައްމަދު މުއިއްޒު އެކަން އިޢުލާނުކުރެއްވިތާ ކުޑަ ދުވަސްކޮޅެއް ފަހުންނެވެ.
ރައީސް ޑރ. މުއިއްޒު މިދިޔަ އާދިއްތަ ދުވަހު ވިލިމާލޭގައި ބޭއްވެވި ރައްޔިތުންގެ ބައްދަލުވުމެއްގައި، ބައެއް ރައްޔިތުން ވަނީ އެރަށުގައި ހުރި މި ދެ ނިކަގަސް ކަނޑާލުމަށް އެދިފައެވެ. އެ ޖަލްސާއަށް ދިޔަ މީހުންގެ މެދުގައި އަތް އުފުލައިގެން ނެގުނު ވޯޓަކުން މިގަސްތައް ކަނޑާލަން ނިންމިކަން ރައީސް އެރޭ އިއުލާން ކުރެއްވިއެވެ.
ރައީސްގެ މި ނިންމެވުމާ އެކު، ތިމާވެށީގެ ހިމާޔަތުގައި އަޑުއުފުލާ ފަރާތްތަކުން ވަނީ ސޯޝަލް މީޑިއާގައި ކަންބޮޑުވުން ފާޅުކޮށްފައެވެ. މީގެ ރައްދުގައި ރައީސް ވިދާޅުވެފައިވަނީ، ވިލިމާލެއިން ނަގާ ދެ ނިކަގަހުގެ ބަދަލުގައި އެ ރަށުގައި 300 ގަސް އިންދާނެ ކަމަށެވެ.
ނަމަވެސް، ކުރީގެ ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ވިލިމާލޭގައި ހުރި ނިކަގަހަކީ ސުލްޠާން ޝަމްސުއްދީން ފުވައްމުލަކުން ގެނެސް އެރަށުގައި ބަހައްޓާފައި ހުރިއިރު ވެސް ބިޔަކޮށް ހުރި ގަހެއް ކަމަށެވެ. އަދި ވިލިނގިލީގައި ޖަލު ހުރި ދުވަސްވަރު ސިޔާސީ ކުށްވެރިން ލައްވާ ބުރަ މަސައްކަތް ކުރުވާފައި ގެނެސް މެންދުރު މަޑުޖެހިލަން ތަންވަޅެއް ދޭން ބައިތިއްބާފައި ތިބީ ވެސް އެ ގަހުގެ ކައިރީގައި ކަމަށް ނަޝީދު ހިއްސާކުރެއްވިއެވެ.
Villimalé nika gahakee Shamsuddin Radhun Fuvahmulakah fahu gennaavaafa e rashuga bahattavvaafa hunnevi iruves biyakoh huri gaheh.
Villingili jalu huri dhuvasvaru siyaasee kuhverin lavvaa bura masahkaiy kuruvaafa genes mendhuru madujehilan thanvalheh dheyn baithibbaafa thibey…— Mohamed Nasheed (@MohamedNasheed) November 26, 2025
މީގެއިތުރުން ނަޝީދު ފާހަގަކުރައްވާފައިވަނީ، މިއީ 100 އަހަރަށް ދާ ތަރިކައެއް ކަމަށާއި، އެހެންކަމުން މި ގަސް ކަނޑާ ނުލުމަށް ގޮވާލައްވާ ކަމަށެވެ.
ވިލިމާލޭގެ ނިކަގަސްތައް ކަނޑާލުމުގެ އިތުރަށް، އާންމުންނަށް އުނދަގޫވާތީ މައްޗަންގޮޅި ސަހަރާގައި ހުރި ނިކަގަސް ނެގުމަށް ވެސް ސަރުކާރުން ވަނީ ނިންމާފައެވެ. މިގޮތަށް ތާރީޚީ އަދި ދުވަސްވީ ގަސްތައް ނެގުމުގެ ސަބަބުން، ތިމާވެށީގެ އިތުރުން ތާރީޚީ އަދި ސަގާފީ ތަރިކަތަކަށް ލިބޭ ގެއްލުންތަކާ މެދު ކަންބޮޑުވުން ފާޅުކުރާ ފަރާތްތައް ދަނީ ގިނަވަމުންނެވެ.
