ސްރީލަންކާއަށް ދިމާވެފައިވާ ދަތި ހާލަތުން އަރައިގަތުމަށް ޕީއެސްއެމްއިން އިސްނަގައިގެން ރާއްޖޭގެ އެހެން މީޑިއާތަކާއި ގުޅިގެން ޚާއްސަ ޓެލެތޯނެއް މިހާރު ފަށާފައިވާއިރު، މި ޓެލެތޯނުގައި އެންމެހާ ދިވެހިން ބައިވެރިވެ، އަވައްޓެރި ސިލޯނަށް އެހީގެ އަތެއް ފޯރުކޮށްދިނުން މުހިންމެވެ.
މިއަދު ހެނދުނު9:00 ގައި ފެށި މި ތެލެތޯން ކުރިޔަށް ދާނީ މިރޭ މެންދަމު1:00 ގެ ނިޔަލަށެވެ.
މި ޓެލެތޯން ކުރިޔަށް ދާއިރު، މީޑިއާ ޓެލެތޯންއަށް އެހީތެރިވާން ބޭނުންވާ ފަރާތްތަކުން ބީއެމްއެލްގެ އެކައުންޓްތަކަށް އަދި ޓީވީ ބިލްޑިންގއާއި މާލޭގެ އެކި ސަރަޙައްދުތަކުގައި ބަހައްޓާފައިވާ ފޮށިތަކަށް އެހީތެރިކަން ފޯރުކޮށްދިނުމުގެ ފުރުސަތުވަނީ ހުޅުވާލާފައެވެ.
މި ޓެލެތޯންގައި ބައިވެރިވުމަށް ފައިސާ ޖަމާކުރުމަށް ހުޅުވާލާފައިވާ އެކައުންޓް ތަކަކީ:
ދިވެހި ފައިސާއިން ނަމަ: 7730000796107(Ceylon Aaeku Dhiveheen)
ޑޮލަރުން އެހީތެރިކަން ފޯރުކޮށްދިނުމަށް އެދޭނަމަ: 7730000796106 ( Ceylon Aaeku Dhiveheen)
މީގެ އިތރުން ކިއުއާރު ކޯޑު ސްކޭން ކޮށްލައިގެންވެސް އެހީތެރިކަން ފޯރުކޮށްދެވޭނެއެވެ.
މިއީ މީޑިއާތަކުން ހިންގާ ޓެލެތޯނެއް ނަމަވެސް މިއީ މުޅި ދިވެހިރާއްޖޭގެ ރައްޔިތުންގެ ފަރާތުން ކުރާ ކަމެއްކަމުގައި ޓެލެތޯން ހިންގުމުގައި އިސްކޮށް ހަރަކާތްތެރިވާ ފަރާތްތަކުން ވަނީ ބުނެފައެވެ.
ނޮވެންބަރު 26 ވަނަ ދުވަހުންފެށިގެން ސްރީލަންކާއަށް ކުރަމުންދާ ވިއްސާރައިގައި އެތައް ބަޔަކު މަރުވެ، ބޮޑެތި ގެއްލުންތަކެއް އެ ޤައުމަށް ވަނީ ވެފައެވެ. ލަންކާއަކީ އަވައްޓެރި ޤައުމަކަށް ވެފައި ދިވެހީންގެ ގިނަ ބަޔަކު ދިރިއުޅެމުންދާ ޤައުމެކެވެ.
ދިވެހިންނަކީ ޒަމާނުންސުރެ މިފަދަ ހާލަތްތަކުގައި އެއްބައިވަންތަކަން ދައްކުވައި ދެއްވައި، އެހީތެރިކަން ދެއްވަމުން އަންނަ ނަމޫނާ ޤައުމެކެވެ. އެހެންކަމުން މިއަދުވެސް ދިވެހީން އަތުކުރި އޮޅާލައި، އެހީތެރިވަމާތޯއެވެ.
