ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ނ. ވެލިދޫގައި ސީޕްލޭންގެ ހިދުމަތް ފެށުމަށް އެއްބަސްވުމުގައި ސޮއިކޮށްފިއެވެ.
ވެލިދޫއަށް ސީޕްލޭންގެ ފުރަތަމަ ޝެޑިއުލް ދަތުރު އޮތީ އަންނަ ޖެނުއަރީ މަހުގެ 23 ވަނަ ދުވަހެވެ. މޯލްޑިވިއަން އިން ނިންމާފައި ވަނީ އަންނަ ޖެނުއަރީ މަހުގެ 23 ވަނަ ދުވަހުން ފެށިގެން މާލެ އާއި ވެލިދޫއާ ދެމެދު ހަފްތާއަކު ދެ ދުވަހު ސީޕްލޭން ދަތުރުތައް ބާއްވާށެވެ. އެއީ ކޮންމެ ހަފްތެއްގެ ބުދަ އަދި ހުކުރުގައެވެ. މި ހިދުމަތް އެރަށަށް ފެށުމާއި ގުޅިގެން ދިވެހިންނަށް ހާއްސަ ޕްރޮމޯޝަނަލް އަގެއްވެސް މޯލްޑިވިއަން އިން ހަމަޖައްސާފައި ވެއެވެ. އެއީ ކޮޅަކަށް 999ރ. އެވެ.
ވެލިދޫ ކައުންސިލާއި މޯލްޑިިވިއަންއާ ދެމެދު މިިއަދު އެއްބަސްވުމުގައި ސޮއިކޮށްފައިވާއިރު، ވެލިދޫގައި ސީ ޕްލޭންގެ ހިދުމަތް ފަށައި ސީޕްލޭނަށް ހާއްސަ ޕްލެޓްފޯމެއް ގާއިމުކުރާނެ ކަމަށް މިއަހަރު ޖުލައި މަހު ރައީސް ވަނި އިއުލާންކުރައްވާފައެވެ. މި ޕްލެޓްފޯމާއެކު ވެލިދޫގައި ދާއިމީކޮށް ސީޕްލޭންގެ ހިދުމަތް ލިބިގެންދާނެއެވެ.
މޯލްޑިވިއަން އިން މިހާރުވެސް ރިސޯޓްތަކުގެ އިތުރުން، ކަމަދޫ، ފުޅަދޫ އަށް ސީޕްލޭން ދަތުރުތައް ކުރެއެވެ.
ބުކިން އަދި އިތުރު މައުލޫމާތު ހޯދުމަށް [email protected] އަށް ނޫނީ 1671 އަށް ގުޅައިގެން ކުރިއަށް ގެންދެވޭނެއެވެ.
މި ހިދުމަތް ވެލިދޫއަށް ފެށުން ވެގެން ދާނީ ނ. އަތޮޅުގެ ރަށްތައް ބަލައިލަން ދާންވެސް މިއީ ރަނުގެ ފުރުސަތަކަށެވެ. މިގޮތުން މި އަތޮޅުގެ ރަށްތައް ތަޖުރިބާ ކޮށްލަން ދަތުރުވެރިންނަށް ފަސޭހަ މަގެއް ފަހިވެގެންދާނެއެވެ. މީގެ ތެރޭގައި ރީތި ގޮނޑުދޮށްތަކާއި، ރަށްރަށުގެ ވައްޓަފާޅި އާއި ސަގާފަތާއި ކެއުންތަކާއި، މީހުންނާއި ބައްދަލުވެ ގުޅުން ބަދަހި ކުރަންވެސް މިއީ ރަނުގެ ފުރުސަތަކަށް ވެގެން ދާނެއެވެ.
